అదుర్స్​ అనిపించే "మరమరాల వడలు" - కేవలం నిమిషాల్లోనే రెడీ - టేస్ట్​ వేరే లెవల్​!

-మరమరాలతో ముంత మసాలా, ఉగ్గాని మాత్రమే కాదు ఇలా వడలు వేసుకోవచ్చు -బ్రేక్​ఫాస్ట్​, ఈవెనింగ్​ స్నాక్స్​కు బెస్ట్​ ఆప్షన్​!

How To Make Maramarala Vada : వడలు అంటే చాలా మందికి ఇష్టం. కానీ, వీటిని ఇంట్లో తయారు చేయాలంటే చాలా పెద్ద ప్రాసెస్​. మినపప్పు నానబెట్టి, రుబ్బుకోవాలి. ఆ తర్వాత వడలు వేసుకోవాలి. అందుకే చాలా మంది వీటిని ఇంట్లో చేయడం మానేస్తుంటారు. ఒకవేళ తినాలనిపిస్తే హోటల్​కు వెళ్లడమో, ఇంటికే ఆర్డర్​ పెట్టుకోవడం చేస్తుంటారు. అయితే ఇకపై వడలు తినాలనిపిస్తే గంటల గంటలు వెయిట్​ చేయాల్సిన పని లేకుండా కేవలం నిమిషాల్లోనే మరమరాలతో సూపర్​ టేస్టీ అండ్​ క్రిస్పీగా ఉండే వడలు చేసుకోవచ్చు. చాలా ఈజీగా ప్రిపేర్​ చేసుకోవచ్చు. పైగా టేస్ట్​ మినప వడలను మించి ఉంటుంది. మరి దీనికి కావాల్సిన పదార్థాలు, తయారీ విధానం ఈ స్టోరీలో చూద్దాం.

కావాల్సిన పదార్థాలు :

• మరమరాలు - ఒకటిన్నర కప్పులు
• ఉల్లిపాయ - 1
• పచ్చిమిర్చి -2
• కరివేపాకు - 2 రెమ్మలు
• ఉప్పు- రుచికి సరిపడా
• కారం - అర టీ స్పూన్​
• గరం మసాలా - పావు టీ స్పూన్​
• ధనియాల పొడి - పావు టీ స్పూన్​
• జీలకర్ర పొడి - పావు టీ స్పూన్​
• అల్లం పేస్ట్​ - అర టేబుల్ స్పూన్
• బియ్యం పిండి - రెండు చెంచాలు
• మైదా - రెండు చెంచాలు

తయారీ విధానం :

• ముందుగా మరమరాలను ఒక గిన్నెలోకి తీసుకుని అందులో నీళ్లు పోసి ఓ 5 నిమిషాలు పక్కకు పెట్టాలి.
• ఈ లోపు ఉల్లిపాయ, కరివేపాకు, పచ్చిమిర్చిని సన్నగా కట్​ చేసి పక్కకు పెట్టుకోవాలి.
• మరమరాలు నానిన తర్వాత నీళ్లు లేకుండా పిండుకుంటూ ఓ బౌల్​లోకి తీసుకోవాలి. ఇలా మరమరాలను మొత్తం గిన్నెలోకి తీసుకోవాలి.
• అందులోకి సన్నగా తరిగిన ఉల్లిపాయ, పచ్చిమిర్చి, కరివేపాకు తరుగు వేయాలి. అలాగే రుచికి సరిపడా ఉప్పు, కారం, గరం మసాలా, ధనియాల పొడి, జీలకర్ర పొడి, అల్లం వెల్లుల్లి పేస్ట్​, బియ్యప్పిండి, మైదా వేసుకోవాలి. మైదా ఇష్టం లేకపోతే దాని బదులు శనగపిండి వేసుకోవాలి.
• ఇలా వేసుకున్న తర్వాత మసాలాలు మొత్తం మరమరాలకు పట్టే విధంగా బాగా కలుపుకోవాలి.
• ఆ తర్వాత కొద్దికొద్దిగా నీళ్లు చిలకరించుకుంటూ మరమరాలను ముద్దగా వచ్చే వరకు కలుపుకోవాలి.
• అలా కలుపుకున్న తర్వాత మరమరాల మిశ్రమాన్ని కొంచెం తీసుకుని ఉండలాగ చేసి అరచేతిలో పెట్టి వడలుగా ఒత్తుకుని ఓ ప్లేట్​లోకి తీసుకోవాలి. ఇలా మరమరాల మిశ్రమాన్ని మొత్తం వడలుగా ఒత్తుకోవాలి.
• ఇప్పుడు స్టవ్​ ఆన్​ చేసి కడాయి పెట్టి డీప్​ ఫ్రైకి సరిపడా నూనె పోసుకోవాలి.
• నూనె బాగా కాలిన తర్వాత ముందే సిద్ధం చేసుకున్న వడలను నూనెలో వేసి మీడియం ఫ్లేమ్​లో రెండు వైపులా ఎర్రగా కాల్చుకోవాలి. ఇలా తయారు చేసిన వడలన్నింటినీ నూనెలో వేసి కాల్చుకోవాలి.
• అంతే ఎంతో టేస్టీగా ఉండే మరమరాల వడలు రెడీ. కేవలం నిమిషాల్లోనే ప్రిపేర్​ చేసుకునే ఈ వడలను ఏదైనా చట్నీతో లేదా విడిగా తిన్నా అద్దిరిపోతాయి. నచ్చితే మీరూ ట్రై చేసుకోండి. బ్రేక్​ఫాస్ట్​కు సూపర్​ ఆప్షన్​.