Legal Advice on Family Problem : తన భర్త మరో మహిళతో సహజీవనం చేస్తూ కుటుంబానికి దూరంగా ఉన్నాడు. ఇటీవల వారిద్దరూ రోడ్డు ప్రమాదంలో మరణించారు. అయితే.. వారిద్దరూ కలిసి సంపాదించిన ఆస్తి ఉంది. అది తన పిల్లలకు దక్కుతుందా? అని న్యాయ నిపుణుల సహాయం కోరుతోంది భార్య. మరి, న్యాయనిపుణులు ఎలాంటి సలహాలు, సూచనలు అందించారో ఇప్పుడు చూద్దాం..
ఇదీ సమస్య..
"మాకు ఇద్దరు పిల్లలు. మా వారు వ్యాపారం చేసేవారు. ఆయన నాకు విడాకులు ఇవ్వకుండానే మరో మహిళతో సహజీవనం చేశారు. ఆమె తన భర్తకు విడాకులు ఇచ్చి మా ఆయనతో ఉండేది. ఈ మధ్య జరిగిన ఒక రోడ్డు ప్రమాదంలో మా ఆయన, ఆమె ఇద్దరూ చనిపోయారు. అయితే.. అంతకు ముందు ఆ మహిళ, నా భర్త జాయింట్ ప్రాపర్టీగా కలిసి ఒక ఫ్లాట్‌ కొన్నారు. ఇప్పుడు అది మా పిల్లలకు వచ్చే అవకాశం ఉందా? నాకు చిన్న ఉద్యోగం తప్ప ఎలాంటి ఆధారమూ లేదు. నేను ఏం చేయాలి?" అంటూ ఓ సోదరి న్యాయ నిపుణులు సలహా కోరుతున్నారు. ఈ సమస్యకు ప్రముఖ న్యాయవాది జి. వరలక్ష్మి ఎలాంటి సమాధానం ఇచ్చారంటే..
వీలునామా రాయకపోతే మాత్రమే..
మీ వారు చేసిన సహజీవనానికి చట్టబద్ధత లేదు. అయితే, వారు కొన్న ఫ్లాట్‌ ఎవరి సంపాదనతో తీసుకున్నారో తెలియాలి. సాధారణంగా జాయింట్ ప్రాపర్టీ ఏదైనా కూడా.. ఆస్తి ఇద్దరికీ సమానంగా చెందుతుంది. అయితే.. మీ భర్త ఎవరికైనా వీలునామా రాస్తే ఆ ఆస్తి వారికి దక్కుతుంది. ఒకవేళ రాయకపోతే మాత్రం ఆయన వాటా మీకు దక్కాలని మీరు కోరవచ్చు. ఆస్తిలోని ఆయన భాగాన్ని మీ పేరిట మ్యూటేషన్‌ చేయించుకోవచ్చు.
"మీ భర్తతో సహజీవనం చేసిన మహిళకు.. పిల్లలు, పేరెంట్స్, తోబుట్టువులు ఎవరైనా ఉంటే ఆమె భాగం వారికి చెందుతుంది. లేకపోతే.. ఆమె పేరెంట్స్, తోడబుట్టినవాళ్లు ఆమె ఆస్తి భాగానికి వారసులు అవుతారు. కాబట్టి, ముందు మీరు మధ్యవర్తులతో ఆవిడ తరఫు వారిని కలిసి సమస్య పరిష్కారమయ్యేలా ప్రయత్నించండి." -జి. వరలక్ష్మి (ప్రముఖ న్యాయవాది)
"మీరు ఆర్థిక ఇబ్బందుల్లో ఉన్నారు కాబట్టి, మీ మామగారికి పిత్రార్జితపు ఆస్తులు ఉంటే.. వారికి మిమ్మల్ని పోషించగలశక్తి ఉంటే.. హిందూ వివాహచట్టంలోని సెక్షన్‌-19 ప్రకారం మెయింటెనెన్స్‌ కోరవచ్చు. ఈ మేరకు కేసు ఫైల్ చేయవచ్చు. అలాగే.. మీ భర్తకి పిత్రార్జితపు ఆస్తిలో వాటా ఉంటే దానికోసం మీ పిల్లల తరఫున ఒక భాగస్వామ్య కూడా దావా వేయవచ్చు. ఈ లావాదేవీల నిర్వహణకు డబ్బు ఖర్చు చేసే స్థోమత మీకు లేకపోతే.. వీలైనంత త్వరగా లీగల్‌ సర్వీసెస్‌ అథారిటీని సంప్రదించండి. వారు మీ సమస్య పరిష్కార మార్గం చూపిస్తారు" అని జి.వరలక్ష్మి చెబుతున్నారు.
Note: ఇక్కడ మీకు అందించిన సమాచారం, సూచనలు అన్నీ మీ అవగాహన కోసం మాత్రమే. న్యాయవాదుల సలహాలు, చట్ట ప్రకారం పాటించాల్సిన సూచనల ప్రకారమే ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత న్యాయవాది సలహాలు తీసుకోవడమే మంచిది.
ఇవి కూడా చదవండి :
ఆడపిల్లలకు తల్లిదండ్రులను చూసుకునే బాధ్యత ఉండదా? - న్యాయ నిపుణుల సమాధానమిదే!
