Paneer Mughlai Dum Biryani Recipe: బిర్యానీ అనగానే నాన్ వెజ్ ప్రియుల నోట్లో లాలాజలం ఊరుతుంది. అయితే.. ఎప్పుడూ రొటీన్ బిర్యానీ తింటే అంత థ్రిల్ ఉండదు. అందుకే.. ఈసారి వెరైటీగా పనీర్ బిర్యానీ ట్రై చేయండి. అది కూడా మాములు స్టైల్లో కాదు, మొఘలాయి స్పెషల్ స్టైల్లో! మరి ఇంకెందుకు ఆలస్యం.. ఇందులోకి కావాల్సిన పదార్థాలు ఏంటి? తయారీ విధానం ఎలాగో ఇప్పుడు తెలుసుకుందాం.
మసాలా కోసం కావాల్సిన పదార్థాలు
- రెండు యాలకలు
- ఒకటిన్నర అంగుళాల దాల్చిన చెక్క
- రెండు లవంగాలు
- ఒక నల్ల యాలక
- ఒక టీ స్పూన్ షాజీరా
- అర టేబుల్ స్పూన్ సోంపు
పనీర్ కోసం కావాల్సిన పదార్థాలు
- పావు కప్పు నెయ్యి
- అర అంగుళం దాల్చిన చెక్క
- ఒక జాపత్రి
- ఒక నల్ల యాలక
- రెండు యాలకలు
- ఒక బిర్యానీ ఆకు
- ఒక టీ స్పూన్ షాజీరా
- అర కప్పు ఉల్లిపాయ ముక్కలు
- ఒక టేబుల్ స్పూన్ అల్లం వెల్లుల్లి పేస్ట్
- రుచికి సరిపడా ఉప్పు
- అర కప్పు చిలికిన పెరుగు
- 6 పచ్చిమిరపకాయలు
- 250 గ్రాముల పనీర్ ముక్కలు
- ఎర్రగా కాల్చిన బొగ్గు ముక్క
బిర్యానీ కోసం కావాల్సిన పదార్థాలు
- 2 కప్పుల బాస్మతి బియ్యం
- మూడు అంగుళాల దాల్చిన చెక్క
- రెండు నల్ల యాలకలు
- అర టేబుల్ స్పూన్ షాజీరా
- 5 లవంగాలు
- 4 యాలకలు
- ఒక బిర్యానీ ఆకు
- 3 పచ్చిమిరపకాయలు
- రెండున్నర టేబుల్ స్పూన్ల ఉప్పు
- 4 టేబుల్ స్పూన్ల నెయ్యి
- అర కప్పు పాలు
- కొద్దిగా కొత్తిమీర
- కొద్దిగా పుదీనా
తయారీ విధానం..
- ముందుగా స్టౌ ఆన్ చేసుకుని ఓ గిన్నెలో యాలకలు, దాల్చిన చెక్క, లవంగాలు, నల్ల యాలక, షాజీరా, సోంపు వేసి లో ఫ్లేమ్లో వేయించుకోవాలి.
- మసాలా దినుసులు మంచి వాసన వస్తున్న సమయంలో మిక్సీలో వేసి మెత్తగా చేసుకోవాలి.
- ఇప్పుడు బిర్యానీ గిన్నెలో నెయ్యి పోసి వేడిచేసుకుని ఇందులోనే దాల్చిన చెక్క, జాపత్రి, నల్ల యాలక, యాలకలు, బిర్యానీ ఆకు, షాజీరా వేసి వేయించుకోవాలి.
- ఆ తర్వాత ఉల్లిపాయ ముక్కలు వేసి లేత బంగారు రంగులోకి వచ్చేవరకు వేయించుకోవాలి.
- అనంతరం అల్లం వెల్లుల్లి పేస్ట్ కలిపి.. ఆ తర్వాత గ్రైండ్ చేసుకున్న గరం మసాలా, పావు కప్పు నీళ్లు, ఉప్పు వేసి నెయ్యి పైకి తేలేంతవరకూ వేయించుకోవాలి.
- నెయ్యి పైకి తేలే సమయంలో చిలికిన పెరుగు వేసి మసాలాలో కలిసిపోయేంత వరకూ కలపాలి.
- ఇప్పుడు పచ్చిమిరకాయల పేస్ట్ వేసి కాసేపు వేయించుకుని.. అనంతరం పనీర్ ముక్కలు, అర కప్పు నీళ్లు పోసి 3 నిమిషాల పాటు హై ఫ్లేమ్లో ఉడికించుకోవాలి.
- ఆ తర్వాత లో ఫ్లేమ్లోకి మార్చి బిర్యానీ గిన్నె మధ్యలో ఓ చిన్న కప్పు తీసుకుని అందులో ఎర్రగా కాల్చిన బొగ్గు లేదా కొబ్బరి పెంకు, రెండు యాలకలు, నెయ్యి వేసి పొగ బయటకు పోకుండా 3 నిమిషాల పాటు మూత పెట్టి ఉంచాలి.
- ఇలా చేస్తే స్మోకీ ఫ్లేవర్ అంతా గ్రేవీకి పట్టుకుని టేస్ట్ సూపర్గా ఉంటుంది. ఆ తర్వాత మూత తీసి కప్పును బయటకు తీసి బిర్యానీ గిన్నెను పక్కకు పెట్టుకోవాలి.
- ఇప్పుడు బిర్యానీ కోసం ఓ గిన్నెలో రెండు లీటర్ల నీటిని హై ఫ్లేమ్లో పెట్టి మరిగించుకోవాలి.
- ఇందులో దాల్చిన చెక్క, నల్ల యాలకలు, షాజీరా, లవంగాలు, యాలకలు, బిర్యానీ ఆకు, పచ్చిమిరపకాయలు, ఉప్పు వేసి 5 నిమిషాల పాటు హై ఫ్లేమ్లో మరగనివ్వాలి. (అవసరమైతే టేస్ట్ చేసి ఉప్పు కలుపుకోవచ్చు)
- మరుగుతున్న నీటిలో కొత్తిమీర, పుదీనా వేసి కాసేపయ్యాక శుభ్రంగా కడిగి గంటపాటు నానబెట్టుకున్న బాస్మతి బియ్యాన్ని వేసుకోవాలి.
- ఇలా 80శాతం ఉడికించుకున్న తర్వాత ఆ బియ్యాన్ని మసాలాలతో జల్లితో వడకట్టుకుని పనీర్పై వెదజల్లాలి.
- ఇప్పుడు బిర్యానీ గిన్నెను స్టౌపై పెట్టుకుని దీనిపైనే నెయ్యి, పాలను అన్నంపై చల్లుకుని మూత పెట్టి హై ఫ్లేమ్లో 4 నిమిషాలు.. లో ఫ్లేమ్లో 7 నిమిషాలు ఉడికించుకోవాలి.
- ఇప్పుడు స్టౌ ఆఫ్ చేసి సుమారు 30 నిమిషాల పాటు పక్కకు పెట్టుకుని ఆ తర్వాత సర్వ్ చేసుకుంటే అద్దిరిపోతుంది.
