How to Make Ullipaya Roti Pachadi : మనలో చాలా మందికి రోటి పచ్చళ్లంటే ఎంతో ఇష్టం. ఇంట్లో ఏ కూరగాయలూ లేనప్పుడు.. ఏదైనా కమ్మటి రోటి పచ్చడి ఉంటే చాలు ఆ పూట తృప్తిగా భోజనం చేయొచ్చు. అయితే.. దాదాపు అందరికి రోటి పచ్చడి అనగానే టమాటా, దోసకాయ, దొండకాయ పచ్చళ్లే ఎక్కువగా గుర్తుకొస్తుంటాయి. కానీ, వీటితోనే కాకుండా ఉల్లిపాయలతో కూడా టేస్టీగా పచ్చడి ప్రిపేర్ చేయవచ్చు.
ఈ స్టోరీలో చెప్పిన విధంగా 'ఉల్లిపాయ రోటి పచ్చడి' చేస్తే చట్నీ పుల్లపుల్లగా, కారంగా రుచి అద్భుతంగా ఉంటుంది. ఈ విధంగా పచ్చడి చేస్తే తాలింపు కూడా అవసరం లేదు. వేడివేడి అన్నంతో ఈ పచ్చడి చాలా కమ్మగా ఉంటుంది. ఉల్లిపాయ రోటి పచ్చడి గాజు సీసాలో స్టోర్ చేసి ఫ్రిడ్జ్లో పెట్టుకుంటే రెండు వారాల పాటు నిల్వ ఉంటుంది. మరి ఇక ఆలస్యం చేయకుండా సులభంగా కమ్మగా ఉల్లిపాయ రోటి పచ్చడి ఎలా చేయాలి ? తయారీకి కావాల్సిన పదార్థాలు ఏంటి? అనే వివరాలను ఇప్పుడు చూద్దాం.
ఉల్లిపాయ రోటి పచ్చడికి కావాల్సిన పదార్థాలు :
- 8 -10 ఎండు మిర్చి
- పెద్ద ఉల్లిపాయ
- ఆయిల్ -2 టేబుల్స్పూన్లు
- ఉసిరికాయంత చింతపండు
- ఉప్పు రుచికి సరిపడా
- అర స్పూన్ ఆవాలు
- అర స్పూన్ జీలకర్ర
- పావు స్పూన్ మెంతులు
- ధనియాలు-టేబుల్స్పూన్
- వెల్లుల్లి రెబ్బలు-5
- కరివేపాకు-2
ఉల్లిపాయ రోటి పచ్చడి తయారీ విధానం..
- ముందుగా ఒక గిన్నెలో చింతపండు కొద్దిసేపు నానబెట్టుకోవాలి.
- తర్వాత స్టౌపై పాన్ పెట్టి ఆయిల్ వేసి వేడి చేయండి. నూనె వేడయ్యాక ఎండుమిర్చి వేసి వేపండి.
- 2 నిమిషాలు మిర్చి వేగిన తర్వాత ఆవాలు, మెంతులు, జీలకర్ర, ధనియాలు వేసి దోరగా ఫ్రై చేసుకోవాలి.
- ఈ మిశ్రమం కాస్త చల్లారనివ్వాలి. ఆపై రోటిలో వేసుకోవాలి. ఇందులోనే వెల్లుల్లి రెబ్బలు, రుచికి సరిపడా ఉప్పు వేసుకుని బాగా రుబ్బుకోవాలి.
- తర్వాత అందులోనే కరివేపాకులు, నానబెట్టుకున్న చింతపండు వేసుకుని మరోసారి దంచుకోవాలి.
- ఇప్పుడు ఉల్లిపాయ ముక్కలు వేసుకుని కచ్చాపచ్చాగా దంచుకుంటే సరిపోతుంది. (మీరు మిక్సీలో గ్రైండ్ చేసుకోవాలనుకుంటే.. అన్నింటినీ కాస్త బరకగా గ్రైండ్ చేసుకుంటే సరిపోతుంది.)
- అంతేనండీ.. ఎంతో రుచికరంగా ఉండే ఉల్లిపాయ రోటి పచ్చడి రెడీ.
- ఈ పచ్చడి వేడివేడి అన్నంలోకి పుల్లపుల్లగా, కారంగా చాలా రుచిగా ఉంటుంది.
- ఈ పచ్చడి నచ్చితే మీరు కూడా ఓసారి ఇలా ట్రై చేయండి. ఇంట్లో అందరూ ఎంతో ఇష్టంగా తింటారు.
ఇవి కూడా చదవండి :
టమాటాలు ఉడకబెట్టకుండా నిమిషాల్లో అద్దిరిపోయే పచ్చడి - అన్నం, టిఫెన్స్లోకి సూపర్ కాంబో!
వారెవ్వా అనిపించే "చెట్టినాడు ఆలూ ఫ్రై" - మసాలా నషాళానికి అంటాల్సిందే!
