How To Make Anjeer Kalakand Recipe : అన్నా చెల్లెళ్ల ఆప్యాయానికి ప్రతీక రాఖీ పండుగ. ఈ రోజున సోదరీమణులు తన సోదరుడికి రాఖీ కట్టి, నోరు తీపి చేస్తుంటారు. తమ బంధం చివరి శ్వాస వరకు ఇలానే ఉండాలని, కష్ట సుఖాల్లో ఒకరికొకరు తోడుగా అండగా ఉండాలని కోరుకుంటారు. ఉద్యోగరీత్యా చాలా దూర ప్రాంతాల్లో ఉన్న సోదరులకు కూడా రాఖీని పోస్ట్ ద్వారా పంపిస్తుంటారు అక్కచెల్లెళ్లు. దగ్గర ఉన్న వారు తప్పకుండా సోదరుల ఇంటికి చేరుకుని రాఖీ కట్టి, స్వీట్ తినిపిస్తుంటారు. ఈ రక్షబంధన్ రోజున మీ సోదరులకి మీ చేతులతో చేసిన స్వీట్ ఏదైనా తినిపించాలనుకుంటున్నారా ? అయితే, ఈ స్టోరీ తప్పకుండా చదవండి! స్వీట్ షాపుల్లో ఎక్కువగా అమ్ముడుపోయే తీయని అంజీర్ కలాకండ్ రెసిపీని ఇంట్లోనే ఈజీగా ఎలా చేయాలో ఇప్పుడు చూద్దాం.
కావాల్సిన పదార్థాలు :
- గేదె పాలు- లీటర్
- నెయ్యి- పావు కప్పు
- నిమ్మ ఉప్పు చిటికెడు (లేదా) నిమ్మరసం -టీస్పూన్
- చక్కెర - అరకప్పు
- అంజీర్- 10 (సన్నగా తురుముకోవాలి)
- జీడిపప్పు- 2 టేబుల్స్పూన్లు
- ఆరెంజ్ కలర్- అర టీస్పూన్
అంజీర్ కలాకండ్ తయారు చేయు విధానం :
- ముందుగా అంజీర్, జీడి పప్పు పలుకులను సన్నగా కట్ చేసుకోవాలి.
- తర్వాత స్టౌపై అడుగు మందంగా ఉన్న మూకుడు తీసుకుని అందులో చిక్కని గేదె పాలు పోసుకోండి.
- ఈ స్వీట్ రెసిపీ తయారు చేయడానికి నీళ్లు కలిపిన పాలు వాడకూడదు. అలాగే ప్యాకెట్ పాలు కూడా పనికిరావు.
- తర్వాత ఇందులోకి చక్కెర, సన్నగా కట్ చేసిన అంజీర్ ముక్కలు, జీడిపప్పులు వేసి కలపండి.
- ఇక ఇప్పటి నుంచి పాలు చిక్కగా మారేంత వరకు హై ఫ్లేమ్లోనే కలుపుతూ ఉండాలి. సన్నని మంట మీద పాలు చిక్కబడవు. కాబట్టి, స్టౌ ఎక్కువ మంట పెట్టి కలపండి. పాలు గిన్నెకు అంచులకు అడుగంటితే.. గీరుకుంటూ మళ్లీ కలుపుకోవాలి.
- పాలు రెండుమూడు పొంగులు రాగానే ఇందులోకి.. నిమ్మఉప్పు లేదా నిమ్మరసం వేసుకోండి.
- దీంతో పాలు చిక్కని తరకలుగా నీళ్లకి నీళ్లుగా విడిపోతాయి. మళ్లీ అంచులన్నీ గీరుతూ పాలను కలుపుకోవాలి.
- పాలు చిక్కబడిన తర్వాత ఇందులోకి నెయ్యి వేసుకుని మళ్లీ కలుపుకోవాలి.
- మీకు స్వీట్ షాపు స్టైల్ రంగు రావాలంటే ఇందులోకి చిటికెడు ఆరెంజ్ ఫుడ్ కలర్ వేసుకోండి.
- పూస ఎక్కువగా వేపకుండా కాస్త చిక్కగా ముద్దగా ఉన్నప్పుడే నెయ్యి రాసిన ప్లేట్లోకి కలాకండ్ మిశ్రమాన్ని తీసుకోండి.
- దీనిని సమానంగా స్ప్రెడ్ చేసి ఒక మూడు గంటల పాటు అలా వదిలేయండి. తర్వాత మీకు నచ్చిన విధంగా స్వీట్లను కట్ చేసుకోండి.
- అంతే ఇలా కొద్దిగా ఓపికగా చేస్తే.. సేమ్ స్వీట్ షాపుల్లో దొరికే అంజీర్ కలాకండ్ స్వీట్ ఇంట్లోనే సిద్ధమైపోతుంది.
- నచ్చితే మీరు కూడా ఈ రాఖీ పండుగకు మీ ఇంట్లో ఈస్వీట్ రెసిపీని ట్రై చేయండి.
ఇవి కూడా చదవండి :
రాఖీ స్పెషల్ స్వీట్.. ఇంట్లో మీరే సింపుల్గా చేసేయండిలా..
Kaju katli recipe: హోలీ స్పెషల్.. సింపుల్గా 'కాజూ కట్లీ' తయారీ ఇలా..
