How to Make Alasanda Fry at Home : ప్రతిరోజు ఇడ్లీ, వడ, దోశ, ఉప్మా వంటి బ్రేక్ఫాస్ట్లను తిని బోర్గా అనిపించిందా ? కొత్తగా ఏదైనా హెల్దీ రెసిపీ ట్రై చేయాలనుకుంటున్నారా ? అయితే, ఈ స్టోరీ మీ కోసమే! ఆరోగ్యానికి ఎంతో మేలు చేసే అలసందలతో చాలా త్వరగా రెడీ అయ్యే అలసందల తాలింపు ఎలా చేయాలో ఇప్పుడు చూద్దాం. ఈ రెసిపీని మీరు ఉదయానికి బ్రేక్ఫాస్ట్లా, సాయంత్రం స్నాక్స్గా కూడా తినొచ్చు. పిల్లలు స్కూల్ నుంచి ఇంటికి తిరిగి వచ్చిన తర్వాత ఇలా చేసి పెడితే ఎంతో ఇష్టంగా తింటారు. పైగా ఈ అలసందల తాలింపు ఆరోగ్యానికి ఎంతో మంచిదని నిపుణులు చెబుతున్నారు. ఇందులో మన శరీరానికి కావాల్సిన ప్రొటీన్, విటమిన్లు అన్నీ అందుతాయని అంటున్నారు. మరి ఇక లేట్ చేయకుండా అలసందల తాలింపు చేయడం ఎలానో మీరు చూసేయండి.
కావాల్సిన పదార్థాలు..
- అలసందలు-2 కప్పులు
- నూనె -2 టేబుల్‌స్పూన్లు
- వెల్లుల్లి రెబ్బలు-8
- ఆవాలు-టీస్పూన్
- జీలకర్ర-టీస్పూన్
- ఉల్లిపాయలు- ఒకటి
- పచ్చిమిర్చి- నాలుగు
- కొత్తిమీర- కొద్దిగా
- ఉప్పు- రుచికి సరిపడా
- ధనియాలు-టేబుల్స్పూన్ (వేయించుకోవాలి)
- కారం-టీస్పూన్
- కరివేపాకు-2
- నిమ్మరసం- టేబుల్స్పూన్
తయారీ విధానం..
- ముందుగా అలసందలను రెండు మూడు సార్లు బాగా కడగాలి. తర్వాత ఒక అరగంట పాటు నీటిలో నానబెట్టుకోవాలి.
- అలాగే మిక్సీలో వెల్లుల్లి రెబ్బలు, వేయించిన ధనియాలు వేసి కాస్త బరకగా గ్రైండ్ చేసుకోండి.
- ఇప్పుడు స్టౌ ఆన్ చేసి కుక్కర్ పెట్టండి. ఇందులో అలసందలను వేసి నాలుగు కప్పుల నీళ్లు పోయండి. అలాగే రుచికి సరిపడా ఉప్పు వేసి కుక్కర్ మూత పెట్టి.. మూడు విజిల్స్ వచ్చే వరకు ఉడికించుకోండి.
- కుక్కర్లో ఆవిరి పోయిన తర్వాత అలసందలలోని నీటిని జల్లించి ఒక ప్లేట్లోకి తీసుకోండి.
- ఇప్పుడు అలసందలను తాలింపు పెట్టడానికి స్టౌపై పాన్ పెట్టండి. పాన్లో ఆయిల్ వేసి హీట్ చేయండి. ఇందులో ఆవాలు, జీలకర్ర, కరివేపాకు వేసి ఫ్రై చేయండి.
- ఇవి వేగిన తర్వాత పచ్చిమిర్చి, ఉల్లిపాయ ముక్కలు, బరకగా గ్రైండ్ ధనియాల పేస్ట్ వేసి కాసేపు ఫ్రై చేసుకోవాలి.
- ఉల్లిపాయ ముక్కలు వేగిన తర్వాత ఇందులో ఉడికించుకున్న అలసందలు వేసి బాగా కలుపుకోండి.
- అలాగే కారం, రుచికి సరిపడా ఉప్పు వేసి మిక్స్ చేయండి. చివర్లో కొద్దిగా కొత్తిమీర, నిమ్మరసం పిండి స్టౌ ఆఫ్ చేయండి.
- అంతే ఇలా సింపుల్గా చేసుకుంటే ఎంతో రుచికరమైన అలసందల తాలింపు రెడీ. నచ్చితే మీరు కూడా ఈ హెల్దీ బ్రేక్ఫాస్ట్ ట్రై చేయండి.
ఇవి కూడా చదవండి:
రెస్టారెంట్ స్టైల్ "రుమాలి రోటీ" - ఇంట్లోనే ఈజీగా ప్రిపేర్ చేసుకోండిలా! - చాలా రుచికరంగానూ ఉంటాయి!
