గుజరాతీ స్పెషల్ "కరకరలాడే ఖాఖ్రా" - చాయ్ తాగుతూ తింటే ఆ కిక్కే వేరు!

ఈవెనింగ్ స్నాక్​గా బెస్ట్ రెసిపీ - ఒక్కసారి తిన్నారంటే మళ్లీ మళ్లీ కావాలంటారు!

Khakhra Recipe in Telugu : కొన్నిసార్లు మన వంటలు ఎంత బాగున్నా, ఇతర రాష్ట్రాల వాళ్లు ఏం తింటున్నారో, ఎలా చేసుకుంటున్నారో తెలుసుకోవాలనిపిస్తుంది. ఒకవేళ ఏమైనా వెరైటీగా అనిపించినా, రుచికరంగా ఉంటాయని భావించినా వాటిని ప్రిపేర్​ చేయాలని ఆరాటపడుతుంటారు. మరి మీకు అలాంటి వంటలు చేయాలనే ఇంట్రస్ట్​ ఉందా? అయితే ఓసారి గుజరాతీల ఫేమస్ వంటకం ఖాఖ్రా ట్రై చేయండి. పేరుకు తగ్గట్లుగానే ఈ రెసిపీ సరికొత్త టేస్ట్​ని అందిస్తుంది. టీ తాగుతూ రెండు ఖాఖ్రాలు తింటే ఆ కిక్కు వేరే లెవెల్​ ఉంటుంది. పిల్లలైతే క్రిస్పీగా, క్రంచీగా ఉండే వీటిని చాలా చాలా ఇష్టంగా తింటారు! పైగా దీనికోసం ఎక్కువ సమయం కేటాయించాల్సిన పనిలేదు. ఎవరైనా చాలా ఈజీగా ప్రిపేర్ చేసుకోవచ్చు. మరి, ఈ సూపర్ టేస్టీ రెసిపీ తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో చూద్దాం.

కావాల్సిన పదార్థాలు :

• గోధుమపిండి - 2 కప్పులు
• శనగపిండి - పావు కప్పు
• ఉప్పు - రుచికి సరిపడా
• పచ్చిమిర్చి పేస్ట్ - ఒకటిన్నర చెంచా
• వెల్లుల్లి ముద్ద - ఒకటిన్నర చెంచా
• ఆయిల్ - 3 టేబుల్​స్పూన్లు
• పావ్​భాజీ మసాలా - 1 టేబుల్​స్పూన్
• మెంతి ఆకుల పొడి - చెంచా
• కారం - చెంచా
• పసుపు - అర చెంచా
• జీలకర్ర - అర చెంచా

తయారీ విధానం :

• ఇందుకోసం ముందుగా ఒక మిక్సింగ్ బౌల్ తీసుకొని అందులో గోధుమపిండి, శనగపిండి, పావ్​భాజీ మసాలా, పచ్చిమిర్చి, వెల్లుల్లి ముద్ద, కారం, జీలకర్ర, పసుపు, మెంతి ఆకుల పొడి, ఆయిల్ ఇలా ఒక్కొక్కటిగా వేసుకొని మొత్తం కలిసేలా ఒకసారి చక్కగా కలుపుకోవాలి.
• ఆ తర్వాత తగినన్ని వాటర్ యాడ్ చేసుకుంటూ చపాతీపిండిలా మళ్లీ మళ్లీ మిక్స్ చేసుకోవాలి. అంటే పిండిని మెత్తగా కలుపుకోవాలి. ఆవిధంగా మిక్స్ చేసుకున్నాక 15 నిమిషాల పాటు పక్కనుంచాలి.
• అనంతరం పిండిని మరోసారి కలిపి చిన్న చిన్న ఉండలుగా చేసుకోవాలి. తర్వాత ఒక్కో ఉండను తీసుకొని చపాతీ పీటపై గుండ్రంగా, పల్చటి రొట్టె మాదిరిగా చేసుకోవాలి.
• ఇప్పుడు స్టౌపై పెనం పెట్టుకొని వేడి చేసుకోవాలి. పాన్ వేడయ్యాక దాని మీద నూనె వేయకుండా ముందుగా ప్రిపేర్ చేసుకున్న పల్చటి రొట్టెను వేసి ఒకవైపు నార్మల్​గా కాల్చుకున్నాక మరోవైపునకు తిప్పుకొని శుభ్రమైన వస్త్రంతో నొక్కినట్లు చేస్తూ రెండువైపులా మంచిగా కాల్చుకోవాలి.
• రెండు వైపులా చక్కగా కాలాయనుకున్నాక తీసి సర్వ్ చేసుకుంటే చాలు. అంతే, ఎంతో రుచికరంగా ఉండే కరకరలాడే గుజరాతీ స్పెషల్ "ఖాఖ్రాలు" రెడీ!
• మరి, ఇంకెందుకు ఆలస్యం నచ్చితే మీరూ ఓసారి ఈ వెరైటీ రెసిపీని ట్రై చేయండి. చాలా రుచికరంగా ఉండే వీటిని ఇంటిల్లిపాదీ ఎంతో ఇష్టంగా తింటారు!

ఇవీ చదవండి :