How to Properly Organize Fridge: నేటి ఉరుకుల పరుగుల జీవితంలో ఎప్పటికప్పుడు మార్కెట్కు వెళ్లి తాజా కూరగాయలు, పండ్లు తెచ్చుకొని తినడం అంత తేలికైన పని కాదు. అందుకే.. చాలా మంది వీకెండ్ టైమ్లో మార్కెట్కు వెళ్లినప్పుడు కావాల్సిన వాటిని ఒకేసారి ఎక్కువ మొత్తంలో తెచ్చుకొని ఫ్రిజ్లో స్టోర్ చేసుకుంటుంటారు. అయినప్పటికీ.. కొన్నిసార్లు అవి త్వరగా పాడవుతుంటాయి. అందుకు కారణం.. రిఫ్రిజిరేటర్ను సరిగ్గా మెయిన్టెయిన్ చేయకపోవడమేనట! కాబట్టి.. కూరగాయలు, పండ్లు ఎక్కువ రోజులు పాడవ్వకుండా ఉండాలంటే.. వాటిని ఫ్రిజ్లో అమర్చే ముందే కొన్ని జాగ్రత్తలు పాటించాలంటున్నారు నిపుణులు. మరి, అవేంటో ఈ స్టోరీలో తెలుసుకుందాం.
- ఫ్రిజ్లో పెట్టిన పండ్లు, కూరగాయలు ఎక్కువ రోజులు ఫ్రెష్గా ఉండాలంటే.. బయటి నుంచి తెచ్చాక వాటిని నీటిలో కాస్త ఉప్పు, చక్కెర, వెనిగర్ కలిపిన మిశ్రమంతో శుభ్రం చేసుకోవాలి. ఆపై వాటిని ఫ్రిజ్లో నిల్వ చేస్తే ఎక్కువ కాలం తాజాగా ఉంటాయంటున్నారు నిపుణులు.
- కూరగాయలు ఎక్కువ రోజులు ఫ్రెష్గా ఉండాలంటే జిప్పర్‌ బ్యాగ్స్‌లో పెట్టి ఫ్రిజ్లో స్టోర్ చేయాలి. అలాంటి.. బ్యాగులు అందుబాటులో లేకపోతే మామూలు కవర్లకే చిన్న చిన్న హోల్స్ చేయచ్చు. ఫలితంగా.. కాయగూరలకు గాలి తగిలి అవి కుళ్లిపోకుండా ఉంటాయంటున్నారు.
- లేదంటే.. మీకు వీలైతే కాటన్ బ్యాగ్స్ లేదా మృదువైన కాటన్ క్లాత్లో పండ్లు, కూరగాయలను వేరువేరుగా ఉంచి స్టోర్ చేసుకోవడం మంచిదంటున్నారు. ఎందుకంటే.. కాటన్ తేమను పీల్చుకుని ఎక్కువ రోజులు అవి ఫ్రెష్గా ఉండడానికి తోడ్పడుతుందంటున్నారు.
- కొన్ని రకాల కూరగాయలు, పండ్లు ఇథిలీన్‌ వాయువును రిలీజ్ చేస్తాయి. అది ఆ పండ్లు, కాయగూరల్ని తొందరగా పక్వానికి వచ్చేలా చేస్తుంది. కాబట్టి.. వీటి పక్కన నిల్వ చేసే ఇతర కాయగూరలు, పండ్లు, ఆకుకూరలు కూడా త్వరగా పాడవుతాయి.
- అందుకే.. ఇథిలీన్‌ విడుదల చేసే యాపిల్స్‌, ఆప్రికాట్స్‌, తర్బూజా.. వంటి పండ్లను ఫ్రిజ్లో నిల్వ చేసినప్పటికీ వాటిని ఆకుకూరలకు దూరంగా ఉంచాలన్న విషయం గుర్తుంచుకోవాలి.
ఈ పండ్లను ఫ్రిజ్లో స్టోర్ చేస్తున్నారా? - అవి త్వరగా పాడవ్వడమే కాదు రుచిని కోల్పోతాయి!
- కొత్తిమీర, పుదీనా త్వరగా కుళ్లిపోవడం మనం చూస్తుంటాం. అలా జరగకూడదంటే వాటిని పేస్ట్‌ చేసి గాలి చొరబడని డబ్బాలో పెట్టి.. ఫ్రిజ్లో స్టోర్ చేసుకోవచ్చు. లేదంటే.. వాటి కాడలను కత్తిరించి గాలి చొరబడని డబ్బాలో పెట్టి ఫ్రిజ్లో పెట్టుకున్నా ఎక్కువ రోజులు ఫ్రెష్గా ఉంటాయంటున్నారు నిపుణులు. అలాగే.. పచ్చిమిర్చి, కరివేపాకు ఎక్కువ రోజులు నిల్వ ఉండాలన్నా ఈవిధంగానే స్టోర్ చేసుకోండి.
- ఫ్రిజ్లో పండ్లను ఉంచేటప్పుడు వాటిని మూసి ఉంచితే వేగంగా పాడవుతాయి. అందుకే వాటిని అలాగే గాలి ఆడేలా ఉంచండి. లేదా రంధ్రాలు ఉన్న డబ్బాలోనైనా వేసుకొని స్టోర్ చేసుకోండి.
- అదే.. ద్రాక్ష పండ్లను నిల్వ చేసే ముందు వాటిని వాటర్తో బాగా కడిగి.. తడి లేకుండా శుభ్రంగా తుడవాలి. తర్వాత ఒక ప్లేట్‌లో టిష్యూ పేపర్లను పరిచి అందులో ద్రాక్ష పండ్లను ఉంచి ఫ్రిజ్లో పెట్టుకుంటే ఎక్కువ కాలం ఫ్రెష్గా ఉంటాయి.
- అదేవిధంగా.. అరటి పండ్లను ఫ్రిజ్లో పెట్టడం కంటే బయట ఉంచితేనే ఎక్కువ కాలం తాజాగా ఉంటాయి. వాటిని అందులో పెట్టడం వల్ల వాటి తొక్క త్వరగా నల్లగా మారుతుంది.
- బంగాళాదుంపలు, ఉల్లిపాయలను సాధారణ బుట్టల్లో గది ఉష్ణోగ్రత వద్ద నిల్వ ఉంచితే చాలా రోజులు పాడవకుండా ఉంటాయంటున్నారు.
- అదేవిధంగా.. చీజ్, వెన్న వంటి పాల ఉత్పత్తులను వీలైనంత వరకు రిఫ్రిజిరేటర్లో పెట్టకుండా చూసుకోండి. ఒకవేళ పెట్టాలనుకుంటే అల్యూమినియం ఫాయిల్‌లో చుట్టి, ఒక డబ్బాలో స్టోర్ చేసుకోవడం మంచిదట.
- రిఫ్రిజిరేటర్లో కొబ్బరిని అలాగే పెడితే పాడవుతుంది. అందుకే.. కొబ్బరిని తురిమి ఒక డబ్బాలో వేసి మూత పెట్టి స్టోర్ చేసుకోండి. దీనివల్ల ఎక్కువరోజులు తాజాగా ఉంటుందట.
- వీటిని ఫాలో అవ్వడంతో ఫ్రిజ్ను ఎప్పటికప్పుడు శుభ్రంగా ఉంచుకోవడం కూడా చాలా అవసరమంటున్నారు నిపుణులు.
ఈ 12 వస్తువులను ఫ్రిజ్లో అస్సలు పెట్టొద్దు - పెడితే ఏమవుతుందో తెలుసా?
