రెస్టారెంట్​ స్టైల్​ "చోలే భాతురే" - ఈ పద్ధతిలో చేస్తే వావ్​ అనాల్సిందే!

-నార్త్​ ఇండియన్​ ఫేవరెట్​ రెసిపీ - ఇంట్లో ఇలా తయారు చేసుకుంటే టేస్ట్​ అదుర్స్​

How to Make Restaurant Style Chole Bhature: చోలే భాతురే.. చాలా మందికి ఫేవరెట్​ రెసిపీ. హోటల్​కు, రెస్టారెంట్​కు వెళ్లిన చాలా మంది ఈ పంజాబ్​ స్టైల్​ చోలే భాతురేను ఆర్డర్​ చేసుకుని ఇష్టంగా తింటారు. కాబూలి శనగలతో చేసే ఈ రెసిపీ టేస్ట్​ అద్దిరిపోతుంది. మరి మీకు కూడా ఈ వంటకం తినాలని ఉందా? అయితే ఓ సారి ఇంట్లోనే ట్రై చేయండి. దీనిని చేయడం పెద్దగా కష్టమేమి కాదు. ఒక్కసారి తయారు చేస్తే ఇంటిల్లిపాది ఇష్టంగా తినేస్తారు. మరి దీనికి కావాల్సిన పదార్థాలు, తయారీ విధానం ఈ స్టోరీలో తెలుసుకుందాం..

కావాల్సిన పదార్థాలు:

భాతురే కోసం:

• బొంబాయి రవ్వ - ముప్పావు కప్పు
• పెరుగు - అర కప్పు
• ఉప్పు - అర చెంచా
• గోధుమ పిండి - 2 కప్పులు

చోలే కోసం:

• కాబూలి శనగలు - అర కేజీ
• దాల్చిన చెక్క - ఇంచ్​
• నల్ల యాలక - 1
• యాలకులు - 3
• ఉప్పు - అర చెంచా
• ధనియాలు - 2 చెంచాలు
• మిరియాలు - 1 చెంచా
• జీలకర్ర - 1 చెంచా
• దాల్చిన చెక్క - ఇంచ్​
• జాజికాయ - 1
• జాపత్రి - కొద్దిగా
• లవంగాలు - 6
• ఎండు మిర్చి - 7
• ఆయిల్​ - 3 చెంచాలు
• జీలకర్ర - అర చెంచా
• బిర్యానీ ఆకులు - 2
• ఉల్లిపాయలు - 3
• అల్లం వెల్లుల్లి పేస్ట్​ -1 చెంచా
• టమాట - 2
• పసుపు - పావు చెంచా
• కారం - 1 చెంచా
• ఆమ్​చూర్​ పొడి - అర చెంచా
• నీళ్లు- మూడున్నర కప్పులు
• ఉప్పు

తయారీ విధానం:

• ముందుగా కాబూలి శనగలను శుభ్రంగా కడిగి ఎనిమిది గంటలు నానబెట్టుకోవాలి. ఉదయం ఈ రెసిపీ ప్రిపేర్​ చేసుకోవాలనుకునేవారు వీటిని రాత్రి నానబెట్టుకోవడం మంచిది.
• భాతురే కోసం పిండి సిద్ధం చేసుకోవాలి. అందుకోసం ఓ బౌల్​లోకి బొంబాయి రవ్వ, పెరుగు, ఉప్పు వేసి కలిపి ఓ రెండు నిమిషాలు పక్కన ఉంచాలి. ఆ తర్వాత గోధుమ పిండి వేసి కొద్దికొద్దిగా నీళ్లు పోసుకుంటూ మెత్తగా కలిపి మూతపెట్టి ఓ గంట సేపు పక్కన ఉంచాలి.
• ఇప్పుడు నానిన శనగలను కుక్కర్​లో వేసి దాల్చిన చెక్క, నల్ల యాలక, ఉప్పు వేసి లీటర్​ నీళ్లు పోసి మూత పెట్టి మీడియం ఫ్లేమ్​ మీద 7 విజిల్స్​ వచ్చే వరకు ఉడికించాలి. అవి ఉడికిన తర్వాత జల్లెడలో పోసి పక్కన ఉంచాలి.
• ఇప్పుడు స్టవ్​ ఆన్​ చేసి పాన్ పెట్టి ధనియాలు, మిరియాలు, జీలకర్ర వేసి దోరగా వేయించి ఓ ప్లేట్​లోకి తీసుకోవాలి. ఇప్పుడు అదే పాన్​లో దాల్చిన చెక్క, నల్ల యాలక, యాలకులు, జాజికాయ, జాపత్రి, లవంగాలు, ఎండుమిర్చి వేసి వేయించుకోవాలి.
• మిక్సీ జార్​లోకి వేయించిన ధనియాల మిశ్రమం, వేయించిన ఎండు మిర్చి మిశ్రమం వేసి మెత్తగా పొడి చేసుకోవాలి.
• ఇప్పుడు స్టవ్​ ఆన్​ చేసి మందపాటి గిన్నె పెట్టి నూనె పోసుకోవాలి. నూనె కాగిన తర్వాత జీలకర్ర, బిర్యానీ ఆకు, నల్ల యాలక వేసి ఫ్రై చేసుకోవాలి. ఆ తర్వాత సన్నగా తరిగిన ఉల్లిపాయ ముక్కలు వేసి రంగు మారే వరకు మగ్గించుకోవాలి.
• అనంతరం అల్లం వెల్లుల్లి పేస్ట్​ వేసి పచ్చి వాసన పోయేవరకు ఫ్రై చేసుకోవాలి. ఆ తర్వాత సన్నగా కట్​ చేసిన టమాట వేసి మెత్తగా ఉడికించుకోవాలి. ఆ తర్వాత పసుపు, కారం వేసి బాగా కలిపి ఓ 5 నిమిషాల పాటు మగ్గించుకోవాలి.
• ఆ తర్వాత గ్రైండ్​ చేసుకున్న మసాలా పొడి వేసి కలిపి ఉడికించిన శనగలు, ఉప్పు వేసి కలిపి ఆమ్​ చూర్​ పొడి, మూడున్నర కప్పుల నీళ్లు పోసి కలిపి మూత పెట్టి ఓ 5 నిమిషాలు ఉడికించుకుని పక్కన పెట్టాలి.
• ఇప్పుడు తాలింపు కోసం పాన్​ పెట్టి రెండు చెంచాల నెయ్యి వేసి కొద్దిగా వెల్లుల్లి, అల్లం తరుగు, నాలుగు పచ్చిమిర్చి చీలికలు, కసూరీ మేథీ వేసి వేయించుకుని చోలేలో కలుపుకోవాలి.
• ఆ తర్వాత స్టవ్​ ఆన్​ చేసి కడాయి పెట్టి డీప్​ ఫ్రైకి సరిపడా నూనె పోసి వేడి చేసుకోవాలి. నూనె వేడెక్కేలోపు గోధుమ పిండి మిశ్రమాన్ని మరోసారి కలిపి కొద్దిగా లావుగా ఉండలు చేసుకోవాలి.
• పొడి పిండి చల్లుకుంటూ మందంగానే పూరీలుగా ఒత్తుకోవాలి. ఇలా తయారు చేసుకున్న వాటిని బాగా కాగుతున్న నూనెలో వేసి రెండు వైపులా ఎర్రగా కాల్చుకోవాలి. ఇలా అన్నింటిని చేసుకుంటే రుచికరమైన చోలే భాతురే రెడీ.
• వీటిని వేడివేడిగా సర్వ్​ చేసుకుని కొద్దిగా నిమ్మరసం పిండుకుని తింటే టేస్ట్​ అదుర్స్​. నచ్చితే మీరూ ట్రై చేయండి.