ఎప్పుడూ ఒకేలా కాకుండా ఓసారి ఇలా "చిల్లీ చికెన్" చేసుకోండి - ముక్క మిగల్చకుండా తినేస్తారంతే!

డైలీ రొటీన్ రెసిపీలే కాదు - ఓసారి ఇలా "చిల్లీ చికెన్" ట్రై చేయండి!

Chilli Chicken Recipe in Telugu : పిల్లల నుంచి పెద్దల వరకు ఇష్టంగా తినే నాన్​వెజ్ ఐటమ్ చికెన్. అయితే, ఎప్పుడూ చికెన్​తో రొటిన్​గా ఫ్రై, కర్రీ, బిర్యానీ వంటివి తిని బోరింగ్​గా అనిపించొచ్చు. కాబట్టి, ఈసారి కాస్త డిఫరెంట్​గా స్ట్రీట్ ఫుడ్​ స్టైల్​లో "చిల్లీ చికెన్" ట్రై చేయండి. టేస్ట్​ అద్దిరిపోతుంది! ఇంటిల్లిపాదీ ఎంతో ఇష్టంగా తినడమే కాదు మళ్లీ మళ్లీ కావాలంటారు. మరి, అందుకు కావాల్సిన పదార్థాలేంటి? తయారీ విధానమేంటో ఇప్పుడు చూద్దాం.

కావాల్సిన పదార్థాలు :

చికెన్ మారినేషన్ కోసం :

• బోన్​లెస్ చికెన్ - 300 గ్రాములు
• అల్లంవెల్లుల్లి పేస్ట్ - ముప్పావుటీస్పూన్
• గరంమసాలా - పావుటీస్పూన్
• కారం - అరటీస్పూన్
• ఉప్పు - కొద్దిగా
• ఎగ్ - 1
• మైదా - 2 టేబుల్​స్పూన్లు
• కార్న్​ఫ్లోర్ - 2 టేబుల్​స్పూన్లు

కర్రీ కోసం :

• నూనె - తగినంత
• వెల్లుల్లి - 4(సన్నగా తరుక్కోవాలి)
• పచ్చిమిర్చి - 3
• సన్నని ఉల్లిపాయ తరుగు - 2 టీస్పూన్లు
• క్యాప్సికం - 1(చిన్న సైజ్​ది)
• చిన్న ఉల్లిపాయ - 1
• అల్లంవెల్లుల్లి పేస్ట్ - అరటీస్పూన్
• ఉప్పు - రుచికి సరిపడా
• గరంమసాలా - అరటీస్పూన్
• కారం - తగినంత
• మిరియాల పొడి - అరటీస్పూన్
• వైట్ పెప్పర్ పౌడర్ - ముప్పావుటీస్పూన్
• అజినోమోటో - పావుటీస్పూన్
• గ్రీన్/రెడ్ చిల్లీసాస్ - 2 టేబుల్​స్పూన్లు
• డార్క్ సోయాసాస్ - 1 టేబుల్​స్పూన్
• వెనిగర్ - 1 టీస్పూన్
• కొత్తిమీర తరుగు - కొద్దిగా

తయారీ విధానం :

• ఇందుకోసం ముందుగా బోన్​లెస్ చికెన్​ని మీడియం సైజ్ ముక్కలుగా కట్ చేసుకొని ఒక బౌల్​లో కాస్త ఉప్పు వేసుకొని అరగంటపాటు నానబెట్టుకోవాలి. ఆ తర్వాత చికెన్​ని వాటర్ లేకుండా వడకట్టుకొని ఒక మిక్సింగ్ బౌల్​లోకి తీసుకోవాలి.
• ఆపై అందులో అల్లంవెల్లుల్లి పేస్ట్, గరంమసాలా, కారం, ఉప్పు వేసుకొని ఇంగ్రీడియంట్స్ అన్నీ చికెన్ ముక్కలకు పట్టేలా బాగా కలుపుకోవాలి. ఆ తర్వాత బాగా బీట్ చేసుకున్న 2 టీస్పూన్ల ఎగ్​ మిశ్రమాన్ని వేసి మరోసారి చక్కగా మిక్స్ చేసుకోవాలి.
• అనంతరం మైదా, కార్న్​ఫ్లోర్, కొద్ది కొద్దిగా వాటర్ యాడ్ చేసుకుంటూ పిండి ముక్కలకు పట్టేలా బాగా కోట్ చేసుకోవాలి. చికెన్ పకోడీకి పట్టినట్లు ముక్కలకు పిండి పట్టాలని గుర్తుంచుకోవాలి.
• ఇప్పుడు స్టౌపై కడాయి పెట్టుకొని తగినంత ఆయిల్ వేసుకొని హీట్ చేసుకోవాలి. నూనె బాగా వేడయ్యాక మారినేట్ చేసుకున్న చికెన్ ముక్కలను ఒక్కొక్కటిగా వేసి మీడియం ఫ్లేమ్ మీద ఎర్రగా, క్రిస్పీగా మారేంత వరకు వేయించుకొని పక్కన పెట్టుకోవాలి.
• ఆ తర్వాత స్టౌపై పాన్ పెట్టుకొని 3 టేబుల్​స్పూన్ల ఆయిల్ వేసుకోవాలి. నూనె కాస్త వేడయ్యాక వెల్లుల్లి తరుగు, పచ్చిమిర్చి చీలికలు, ఉల్లిపాయ తరుగు, క్యాప్సికం ముక్కలు, పెద్ద సైజ్​ ఉల్లి ముక్కలు వేసుకొని హై ఫ్లేమ్ మీద బాగా టాస్ చేసుకోవాలి. ముక్కలు కాస్త మగ్గాయనుకున్నాక ముప్పావు కప్పు వాటర్, అల్లంవెల్లుల్లి పేస్ట్ యాడ్ చేసుకొని కలిపి తెర్ల కాగనివ్వాలి.
• అనంతరం అందులో ఉప్పు, గరంమసాలా, కారం, మిరియాల పొడి, వైట్ పెప్పర్ పౌడర్, అజినోమోటో, గ్రీన్/రెడ్ చిల్లీసాస్, డార్క్ సోయాసాస్ యాడ్ చేసుకొని కలుపుతూ హై ఫ్లేమ్ మీద మిశ్రమాన్ని కాస్త చిక్కబడే వరకు ఉడికించుకోవాలి. అలా మగ్గించుకునేటప్పుడే వెనిగర్ వేసుకోవాలి.
• ఆవిధంగా ఉడికించుకున్నాక అందులో ముందుగా ఫ్రై చేసి పెట్టుకున్న చికెన్ ముక్కలను వేసుకొని హై ఫ్లేమ్ మీద బాగా టాస్ చేసుకోవాలి.
• సాస్​ల మిశ్రమం చికెన్ ముక్కలన్నింటికీ పట్టేలా బాగా టాస్ చేసుకున్నాక చివర్లో కొత్తిమీర తరుగు వేసుకొని కలిపి దింపేసుకుంటే చాలు. అంతే.. నోరూరించే స్ట్రీట్ ఫుడ్ స్టైల్ "చిల్లీ చికెన్" రెడీ!