Chicken Popcorn Recipe in Telugu : పిల్లల నుంచి పెద్దల వరకు ఎక్కువగా ఇష్టపడే నాన్వెజ్ ఐటమ్స్లో చికెన్ ఫస్ట్ ప్లేస్లో ఉంటుంది. ఇక వీకెండ్ వస్తుందంటే చాలు ఎప్పటిలాకాకుండా ఈసారి కొత్త రెసిపీ ట్రై చేయాలనుకుంటారు చాలా మంది. అలాంటి వారి కోసం ఒక సూపర్ రెసిపీ తీసుకొచ్చాం. అదే, "KFC స్టైల్ చికెన్ పాప్కార్న్". సూపర్ టేస్టీగా ఉండే ఈ పాప్కార్న్ను ఇంటిల్లిపాదీ లొట్టలేసుకుంటూ తింటారు! మరి, ఈ క్రిస్పీ అండ్ టేస్టీ రెసిపీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
మారినేషన్ కోసం :
- బోన్లెస్ చికెన్ - అరకేజీ
- ఉప్పు - రుచికి సరిపడా
- మిరియాల పొడి - 1 టీస్పూన్
- గార్లిక్ పౌడర్ - 1 టీస్పూన్
- కారం - రుచికి తగినంత
- ఆనియన్ పౌడర్ - 1 టీస్పూన్
- ఆమ్చూర్ పౌడర్ - అరటీస్పూన్
- పంచదార - పావుటీస్పూన్
- మిక్స్డ్ హెర్బ్స్ - 1 టీస్పూన్
- వెనిగర్ - అరటేబుల్స్పూన్
- డార్క్ సోయా సాస్ - 1 టీస్పూన్
- అల్లంవెల్లుల్లి పచ్చిమిర్చి పేస్ట్ - 1 టీస్పూన్
- కాచిన చల్లార్చిన పాలు - 1 టేబుల్స్పూన్
కోటింగ్ కోసం :
- మైదా - 2 కప్పులు
- కార్న్ఫ్లోర్ - అర కప్పు
- ఉప్పు - రుచికి సరిపడా
- మిక్స్డ్ హెర్బ్స్ - 1 టీస్పూన్
- గార్లిక్ పౌడర్ - 1 టీస్పూన్
- కారం - తగినంత
- నూనె - వేయించడానికి సరిపడా
ఏ కెఫెకి తీసిపోని చికెన్ కట్లెట్- ఇంట్లోనే ఈజీగా చేసుకోండిలా! నెల రోజులు నిల్వ ఉంటుందట!!
తయారీ విధానం :
- ముందుగా బోన్లెస్ చికెన్ని చిన్న చిన్న ముక్కలుగా కట్ చేసుకోవాలి. ఆపై శుభ్రంగా కడిగి ఒక మిక్సింగ్ బౌల్లోకి తీసుకోవాలి.
- ఆ తర్వాత అందులో ఉప్పు, మిరియాల పొడి, గార్లిక్ పౌడర్, కారం, ఆనియన్ పౌడర్, ఆమ్చూర్ పౌడర్, చక్కెర, మిక్స్డ్ హెర్బ్స్, వెనిగర్, డార్క్ సోయా సాస్, అల్లంవెల్లుల్లి పచ్చిమిర్చి పేస్ట్, కాచిన చల్లార్చిన పాలు ఇలా ఒక్కొక్కటిగా యాడ్ చేసుకోవాలి.
- ఆపై ఇంగ్రీడియంట్స్ అన్నీ చికెన్ ముక్కలకు పట్టేలా బాగా కలుపుకోవాలి. ఇక్కడ చెప్పిన గార్లిక్ పౌడర్, ఆనియన్ పౌడర్ అనేవి అన్నీ సూపర్ మార్క్ట్స్లో దొరుకుతాయి.
- ఆవిధంగా చికెన్ని మిక్స్ చేసుకున్నాక బౌల్పై మూతపెట్టి కనీసం రెండు గంటల పాటైనా ఫ్రిజ్లో ఉంచాలి.
- ఆలోపు రెసిపీలోకి కావాల్సిన ఇతర ఐటమ్స్ను ప్రిపేర్ చేసుకోవాలి. ముందుగా కోటింగ్ కోసం మరో మిక్సింగ్ బౌల్ తీసుకొని అందులో మైదా, కార్న్ఫ్లోర్, ఉప్పు, మిక్స్డ్ హెర్బ్స్, గార్లిక్ పౌడర్, కారం వేసుకొని అన్నీ కలిసేలా బాగా కలుపుకొని పక్కన పెట్టుకోవాలి.
- ఆ తర్వాత ఐస్ వాటర్ని ప్రిపేర్ చేసుకోవాలి. ఇందుకోసం ఒక బౌల్లో కొన్ని ఐస్ క్యూబ్స్ తీసుకొని వాటర్ పోసుకొని పక్కన పెట్టుకోవాలి.
- అనంతరం మారినేట్ చేసి 2 గంటలు ఫ్రిజ్లో ఉంచిన చికెన్లో ఒక్కో ముక్కని ముందుగా ప్రిపేర్ చేసుకున్న మైదాపిండి మిశ్రమంలో వేసి బాగా కోట్ చేసుకోవాలి.
తెలంగాణ స్టైల్ "నాటుకోడి పులుసు" - ఇలా చేస్తే అద్దిరిపోవాల్సిందే!
- అలా చేసుకున్నాక చికెన్ ముక్కను ఐస్ వాటర్లో వేసి 15 నుంచి 20 సెకన్లపాటు ఉంచాలి. అనంతరం ఐస్ వాటర్లో నుంచి తీసి మళ్లీ మైదాపిండి మిశ్రమంలో వేసి మరోసారి కోట్ చేసుకోవాలి. ఇలా చేయడం ద్వారా చికెన్పై లేయర్స్ అనేవి వస్తాయి.
- ఆవిధంగా కోట్ చేసుకున్నాక చికెన్ ముక్కను ఒకసారి దులిపి ఒక ప్లేట్లోకి తీసుకోవాలి. ఇలా చికెన్ ముక్కలన్నింటినీ చక్కగా కోట్ చేసుకోవాలి.
- ఆ తర్వాత వెంటనే ఫ్రై చేసుకోకుండా ముక్కలపై కోటింగ్ కాస్త ఆరిపోయే వరకు అంటే 5 నుంచి 10 నిమిషాల పాటు అలా వదిలేయాలి.
- అనంతరం స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక మంటను మీడియం ఫ్లేమ్లోకి టర్న్ చేసుకొని కోట్ చేసుకున్న చికెన్ ముక్కలను ఒక్కొక్కటిగా జాగ్రత్తగా వేసుకోవాలి.
- ఆపై మీడియం ఫ్లేమ్ మీదనే మధ్యమధ్యలో కలుపుతూ చికెన్ ముక్కలు క్రిస్పీగా మారి, గోల్డెన్ కలర్లోకి వచ్చేంత వరకు వేయించుకోవాలి. ఇలానే ముక్కలన్నింటినీ వేయించుకోవాలి.
- ఆవిధంగా వేయించుకున్నాక టిష్యూ పేపర్ పరచిన ప్లేట్లోకి తీసుకుని వేడివేడిగా సర్వ్ చేసుకుంటే చాలు. అంతే, ఎంతో రుచికరంగా ఉండే KFC స్టైల్ "చికెన్ పాప్కార్న్" రెడీ!
బ్యాచిలర్స్ రెసిపీ "చికెన్ టిక్కా బిర్యానీ" - వంట రాని వారు కూడా ఈజీగా చేసేస్తారు!
