Best Tips for Gardening: ఇంటికి ఎన్ని రకాల డెకరేషన్స్ చేసినా.. ఎంతో ఖరీదైన వస్తువులున్నా.. మొక్కలతో వచ్చే అందమే వేరు. కళ్లకు, మనసుకు హాయినివ్వడమే కాదు.. ఇంట్లో స్వచ్ఛమైన గాలితో ఆరోగ్యం మెరుగుపడేందుకూ మొక్కలు దోహదం చేస్తాయి. అందుకే.. ఈ రోజుల్లో చాలా మంది.. ఇంటి ఆవరణలో రకరకాల కూరగాయలు, పండ్లు, రంగురంగుల పూలమొక్కలు పెంచుతున్నారు.
అయితే.. కొందరు అవి ఏపుగా పెరగాలనే ఉద్దేశంతో రసాయన ఎరువులు వాడుతుంటారు. కానీ.. కెమికల్స్ కాకుండా, మీరు చెత్త అని పడేసే కొన్ని పదార్థాలు నేచురల్గా మొక్కల పెరుగుదలకు తోడ్పడతాయంటున్నారు నిపుణులు. అవి సహజమైన ఎరువులుగా పనిచేసి.. ప్లాంట్స్ చక్కగా, ఆరోగ్యంగా, ఏపుగా పెరగడానికి సహాయపడతాయంటున్నారు. ఇంతకీ.. మొక్కల పెరుగుదలకు తోడ్పడే ఆ పదార్థాలేంటో ఈ స్టోరీలో తెలుసుకుందాం.
అరటితొక్క : మనలో చాలా మంది అరటిపండు తిన్నాక తొక్క తీసుకెళ్లి డస్ట్బిన్లో వేస్తుంటాం. కానీ.. అలా పడేయడం కంటే మీ ఇంట్లో ఉన్న మొక్కల మొదళ్ల వద్ద వేసి, కొద్దిగా మట్టి వేసేయండి. అది మట్టిలో కలిసిపోయి మంచి ఎరువుగా మారుతుందట. ముఖ్యంగా పూలమొక్కలకు వేసినట్లైతే పూలు పెద్దవిగా పూస్తాయంటున్నారు నిపుణులు.
కూరగాయ తొక్కలు : కూరగాయలు కట్ చేసినప్పుడు మిగిలే వ్యర్థాలు కూడా మొక్కల పెరుగుదలకు తోడ్పడతాయట. వాటిని చెట్ల మొదళ్లలో వేసినప్పుడు అందులోని పోషకాలు మొక్కలకి బలాన్నిస్తాయి. ఫలితంగా ప్లాంట్స్ ఆరోగ్యంగా పెరుగుతాయంటున్నారు.
కాఫీ పొడి : గులాబీ, టమాట మొక్కలకు కాఫీ పొడిని ఎరువుగా వేస్తే.. అవి ఏపుగా పెరగడంతోపాటు మంచి దిగుబడినీ ఇస్తాయని చెబుతున్నారు. ఇందుకోసం.. పది లీటర్ల నీటిలో రెండున్నర కప్పుల కాఫీ పొడిని కలిపి 2 నుంచి 3 రోజుల పాటు అలాగే ఉంచి.. ఆపై ఈ మిశ్రమాన్ని కుండీల్లోని మట్టిలో పోస్తే సరిపోతుంది.
గుడ్డు పెంకులు : చాలా మంది గుడ్డు పెంకులను బయట పడేస్తుంటారు. అలాకాకుండా వాటిని శుభ్రంగా కడిగి పొడి చేసి.. టమాటా, మిర్చి, పూలమొక్కలకు వేసుకోవచ్చు. ఆ పెంకుల్లో ఎక్కువమొత్తంలో ఉండే కాల్షియం మొక్కలు ఏపుగా పెరగడానికి చాలా బాగా ఉపయోగపడుతుంది. లేదంటే.. గుడ్డు పెంకులను డైరెక్ట్గా చెట్ల మొదళ్ల వద్దనైనా వేసుకోవచ్చంటున్నారు. "National Center for Biotechnology Information" అనే సంస్థ చేపట్టిన ఓ అధ్యయనంలో కూడా గుడ్డు పెంకులలో ఉండే కాల్షియం మొక్కలు పెరుగుదలకు సహాయపడుతుందని కనుగొన్నారు. అందుకు సంబంధించిన రిపోర్టు కోసం ఈ లింక్పై క్లిక్ చేయండి.
ఉల్లి పొట్టు : ఇది త్వరగా మట్టిలో కలసిపోయి ఎరువుగా మారుతుంది. అలాగే.. మొక్కలకు చీడపీడలు రాకుండా ఉల్లిపొట్టు కాపాడుతుంది. ఇందుకోసం ఉల్లిపొట్టుని నేరుగా కుండీల్లో వేస్తే సరిపోతుంది. లేదంటే.. వీటితో ప్రత్యేక ద్రావణాన్ని ప్రిపేర్ చేసుకొని వాడుకోవచ్చు. అందుకోసం 5 లీటర్ల గోరువెచ్చని వాటర్లో పది నుంచి ఇరవై గ్రాముల ఉల్లిపొట్టుని వేసుకొని 4 రోజుల పాటు అలాగే ఉంచాలి. తర్వాత దాన్ని మొక్కలపై స్ప్రే చేస్తే.. పురుగుమందుగా ఉపయోగపడుతుంది. అదే.. మొదళ్ల భాగంలో వేస్తే ఎరువుగానూ పనిచేస్తుందంటున్నారు.
గ్రీన్ టీ : మొక్కలు ఏపుగా పెరగడానికి గ్రీన్ టీ మిశ్రమం కూడా సహజమైన ఎరువుగా పని చేస్తుందంటున్నారు. ఇందుకోసం.. వాడేసిన గ్రీన్ టీ పొడిని మొక్కల మొదళ్లలో వేస్తే చాలు. అవి స్ట్రాంగ్గా మారతాయి. అలాగే.. ఏడున్నర లీటర్ల వాటర్లో ఒక గ్రీన్ టీ బ్యాగ్ వేసి పూర్తిగా నాననివ్వాలి. ఆపై టీబ్యాగుని బాగా పిండి ఆ నీటిని మొక్కలకు పోయాలి. ఇలా చేసినా మొక్కలకు మంచి సత్తువ లభిస్తుందంటున్నారు నిపుణులు.
ఇవీ చదవండి :
ఏసీ, కూలర్లే కాదు- ఈ మొక్కలు కూడా రూమ్ను కూల్గా మార్చేస్తాయట!
ఈ ఇండోర్‌ ప్లాంట్స్‌తో ఇంటికి వాస్తు, అందం - మనకు ఆనందం, ఆరోగ్యం!
