హమాస్​కు చావుదెబ్బ! మిలిటెంట్ గ్రూప్​ అధినేత యాహ్యా సిన్వార్ మృతి! తెరపైకి ఇజ్రాయెల్ డ్రామా! - Is Hamas Chief Yahya Sinwar Dead

Is Hamas Chief Yahya Sinwar Dead : హమాస్‌ అధినేత, అక్టోబర్‌ 7 దాడుల రూపకర్త యాహ్యా సిన్వార్‌ మృతి చెందినట్లు ఇజ్రాయెల్‌ దళాలు అనుమానిస్తున్నాయి. సుదీర్ఘకాలంగా ఆయన కదలికలు లేకపోవడం వల్ల సిన్వార్‌ సజీవంగా ఉండకపోవచ్చని ఇజ్రాయెల్‌ దళాలు భావిస్తున్నాయి. ఈ మేరకు ఇజ్రాయెల్‌లోని పలు మీడియా సంస్థలు కథనాలను ప్రచురిస్తున్నాయి. అయితే, సిన్వార్‌ మృతికి సంబంధించి ఎటువంటి ఆధారాలు లభించలేదని ఇజ్రాయెల్‌ రక్షణ శాఖ-IDF చెబుతుంది. సిన్వార్‌ గాయపడ్డారా లేక ఉద్దేశపూర్వకంగానే దాక్కొని ఉంటున్నారా అనేది తెలియడం లేదని IDF వెల్లడించింది.

Israel Warning To Lebanese : హమాస్‌ను సమూలంగా నిర్మూలించడమే లక్ష్యంగా భీకర దాడులు చేస్తున్న ఇజ్రాయెల్‌ ఆ సంస్థను మరోసారి దెబ్బకొట్టినట్లు తెలుస్తోంది. ఇప్పటికే పలువురు హమాస్‌కు చెందిన కీలక నేతలను హతమార్చిన ఇజ్రాయెల్‌ దళాలు, తాజాగా హమాస్‌ అధినేత, అక్టోబర్‌ 7 దాడుల రూపకర్త యాహ్యా సిన్వార్‌ను మట్టుబెట్టినట్లు తీవ్రస్థాయిలో ప్రచారం జరుగుతోంది. సిన్వార్‌ మరణించినట్లు ఇజ్రాయెల్‌ దళాలు అనుమానిస్తున్నాయి. ఈ మేరకు ఇజ్రాయెల్‌లోని పలు మీడియా సంస్థలు కథనాలను ప్రచురిస్తున్నాయి. సుదీర్ఘకాలంగా అతడి కదలికలు లేకపోవడం వల్ల ఇజ్రాయెల్‌ దళాలు అతడు సజీవంగా ఉండి ఉండకపోవచ్చని భావిస్తున్నాయి.
అయితే, హమాస్‌ అధినేత సిన్వార్‌ మృతి చెందినట్లు ఇజ్రాయెల్‌ అధికారికంగా ధ్రువీకరించడం లేదు. ఈ వాదనను బలపర్చే ఆధారాలేవీ తమ వద్ద లేవని ఇజ్రాయెల్‌ రక్షణ శాఖ-IDF చెబుతోంది. సిన్వార్‌ కదలికలు లేకపోవడం వల్ల పలుకోణాల్లో అనుమానిస్తున్నట్లు వెల్లడించింది.

ఆ దాడిలోనే మృతి!
ఇటీవల కాలంలో హమాస్‌ సొరంగాల వ్యవస్థను ఇజ్రాయెల్‌ తీవ్రంగా దెబ్బతీసింది. వీటిల్లో సిన్వార్‌ ఉన్నట్లు అనుమానించిన ప్రాంతాలు కూడా ఉన్నాయి. ఇటీవల సెంట్రల్‌ గాజాలోని హమాస్‌ కమాండ్‌ కంట్రోల్‌ సెంటర్‌పై ఇజ్రాయెల్‌ వైమానిక దాడులు జరిపింది. ఆ దాడిలో సమీపంలోని పాఠశాల కూడా ధ్వంసమైంది. ఈ దాడిలో 22మంది మృతి చెందినట్లు గాజా ఆరోగ్య శాఖ వెల్లడించింది. మృతి చెందిన వారిలో హమాస్‌ అధినేత ఉండొచ్చని ఇజ్రాయెల్‌ దళాలు అనుమానిస్తున్నాయి. ప్రస్తుతం సిన్వార్‌ మరణంపై ఇజ్రాయెల్‌ దళాలు దర్యాప్తు చేస్తున్నాయి.

సిన్వార్​ మృతి! ఇజ్రాయెల్ ఎందుకిలా చేస్తోంది?
అటు, ఒకవేళ సిన్వార్‌ చనిపోయినా ఇప్పటివరకు వీటిని బలపర్చే ఎటువంటి ఆధారాలు తమకు లభించలేదని ఇజ్రాయెల్‌ సైనిక ఇంటెలిజెన్స్‌ డైరెక్టరేట్‌ చెబుతోంది. సిన్వార్‌ గాయపడ్డారా లేక ఉద్దేశపూర్వకంగానే దాక్కొని ఉంటున్నారా తమకు అర్థం కావడం లేదని తెలిపింది. మరోవైపు హమాస్‌ కమాండర్ల ధైర్యాన్ని దెబ్బతీసి వారిని లొంగదీసుకోవడానికి ఇజ్రాయెలే ఈ ప్రచారాన్ని తెరపైకి తెచ్చి ఉండవచ్చనే అనుమానాలు కూడా ఉన్నాయి. గత డిసెంబర్‌లో కూడా సిన్వార్‌ మృతి చెందినట్లు వార్తలు చక్కర్లు కొట్టాయి. కానీ నాడు ఆయన దాక్కోవడంలో భాగంగానే అనుచరులకు దూరంగా ఉన్నట్లు తేలింది. ఏదేమైనా ఇజ్రాయెల్‌ చెబుతున్నట్టు ఒకవేళ సిన్వార్‌ మరణించి ఉంటే మాత్రం అది హమాస్‌కు కోలుకులేని దెబ్బ తగలినట్టే అవుతుంది.