Canada Study Permit : కెనడాకు వచ్చే విదేశీ విద్యార్థులకు కొత్తగా ఇవ్వబోయే స్టడీ పర్మిట్లపై రెండేళ్ల పాటు పరిమితి విధించనున్నట్లు కెనడా సోమవారం ప్రకటించింది. ప్రస్తుతం ఇస్తున్న వాటిలో మూడో వంతు అనుమతులపై కోత పెట్టనున్నట్లు ఆ దేశ ఇమిగ్రేషన్‌ మంత్రి మార్క్‌ మిల్లర్ తెలిపారు. కెనడాలో పెరుగుతున్న నిరుద్యోగ సమస్య, ఇళ్ల కొరతకు చెక్‌ పెట్టడం కోసమే ఈ నిర్ణయం తీసుకున్నట్లు తెలుస్తోంది. దశాబ్దం క్రితంతో పోలిస్తే దేశంలో విదేశీ విద్యార్థుల సంఖ్య మూడింతలు పెరిగినట్లు గణాంకాలు చెబుతున్నాయి.
పరిమితి అమల్లోకి వచ్చిన తర్వాత ఈ సంవత్సరం సుమారు 3.64 లక్షల మంది విద్యార్థులకు పర్మిట్లు లభించే అవకాశం ఉందని అంచనా వేస్తున్నారు. 2023తో పోలిస్తే ఇది 35 శాతం కంటె తక్కువని, అలానే 2025కు సంబంధించిన అంచనాలను ఈ ఏడాది చివర్లో వెల్లడిస్తామని మిల్లర్ పేర్కొన్నారు. విదేశీ విద్యార్థుల అనుమతి విధానాన్ని మరింత మెరుగుపర్చి వారికి ఉన్నతమైన విద్యను అందించడమే ఈ నిర్ణయం వెనుక ఉన్న ప్రధాన ఉద్దేశమని తెలిపారు. అలాగే కావాల్సిన నివాసాలను అందుబాటులో ఉంచడం కూడా ఓ కారణమని వివరించారు. ఇక్కడికి వచ్చే వారందరికీ సరైన వనరులు అందివ్వకపోవడం సమంజసం కాదని తాము భావిస్తున్నామన్నారు. వచ్చిన వారిని నిరాశతో సొంత దేశానికి తిరిగి వెళ్లడం సముచితం కాదని అభిప్రాయపడ్డారు.
మాస్టర్‌, డాక్టోరల్‌ విద్యార్థులకు వర్తించదు
ఇప్పటికే ఇచ్చిన పర్మిట్లపై ఎలాంటి ప్రభావం ఉండదని మిల్లర్ స్పష్టం చేశారు. తాజాగా తీసుకొచ్చే పరిమితులు మాస్టర్‌, డాక్టోరల్‌ విద్యార్థులకు వర్తించవని చెప్పారు. కొత్త నిబంధనల ప్రకారం ప్రావిన్స్‌ల వారీగా పర్మిట్లను కేటాయిస్తారు. అక్కడి సంస్థలు, వనరుల ఆధారంగా స్థానిక ప్రభుత్వాలు వాటిని పంపిణీ చేయాలి. ఆయా సంస్థల అనుమతి కోరుతూ వచ్చిన పర్మిట్ల దరఖాస్తులపై ప్రావిన్స్ లేదా టెరిటరీలు ఆమోద లేఖ జారీ చేయాల్సి ఉంటుంది. అందుకు తగిన విధంగా మార్పులు చేసుకునేందుకు కెనడా ప్రభుత్వం ప్రావిన్స్లకు మార్చి 31 వరకు గడువిచ్చింది.
వర్క్‌ పర్మిట్లలోనూ మార్పులు
కెనడా ప్రభుత్వం పోస్ట్‌ గ్రాడ్యుయేషన్‌ వర్క్‌ పర్మిట్లకు సంబంధించిన అర్హతల్లోనూ మార్పులు తీసుకొచ్చింది. 2024 సెప్టెంబర్‌ నుంచి కరికులం లైసెన్సింగ్‌ అరేంజ్‌మెంట్స్ కింద నమోదు చేసుకున్న విద్యార్థులకు వర్క్‌ పర్మిట్‌ ఇవ్వమని వెల్లడించింది. మరోవైపు మాస్టర్స్‌ ప్రోగ్రామ్ కింద నమోదైన గ్రాడ్యుయేట్లు మూడేళ్ల వర్క్‌ పర్మిట్‌ కోసం దరఖాస్తు చేసుకునేందుకు అనుమతినిచ్చింది.
