అలర్ట్​: మధ్యాహ్నం తిన్న వెంటనే నిద్ర వస్తోందా ? అయితే మీకు ఈ ప్రాబ్లమ్​ ఉన్నట్టే! - Feel Tired After Eating Lunch

Why We Get sleep After Lunch : చాలా మందికి మధ్యాహ్నం భోజనం చేసిన తర్వాత కొద్ది సేపు అలా పడుకోవాలనిపిస్తుంది. కొన్నిసార్లు ఎంత ప్రయత్నించినా కూడా నిద్ర మత్తు ఆగదు. దీంతో ఒక గంట పడుకోవాల్సి వస్తుంది. అయితే, ఇలా తిన్న వెంటనే నిద్ర ముంచుకు వస్తుందంటే ఈ సమస్య ఉన్నట్టే అంటున్నారు నిపుణులు.

Why Do Feel Tired After Lunch : మధ్యాహ్నం భోజనం చేసిన తర్వాత మెజార్టీ జనాలకు ఏదో మత్తు ఆవహించినట్లుగా ఉంటుంది. కొద్దిసేపు అలా నిద్రపోవాలనిపిస్తుంది. నిద్ర పోకుండా ఉండటానికి ఎన్ని ప్రయత్నాలు చేసినా ఆ మత్తు వదలదు. మరి, మీకు కూడా ఇలాగే ఉందా? అయితే మీరు "ఫుడ్​కోమా" లోకి వెళ్తున్నట్టే అని నిపుణులు అంటున్నారు. అసలు ఈ ఫుడ్​కోమా అంటే ఏమిటి? దీనికి కారణాలు ఏంటో ఇప్పుడు తెలుసుకుందాం.

ఫుడ్​ కోమా: సాధారణంగా చాలా మంది ఉదయం బ్రేక్​ఫాస్ట్​, మధ్యాహ్న భోజనం, మళ్లీ రాత్రికి చపాతీ లేదా రైస్‌ లాంటివి తింటుంటారు. ఇందులో కార్బోహైడ్రేట్లు, కొవ్వులు అధికంగా ఉంటాయి. కాగా, ఇందులో ఉండే పదార్థాలే నిద్రను కలిగిస్తాయని.. ఈ పరిస్థితినే 'ఫుడ్‌కోమా' అంటారని నిపుణులు అంటున్నారు.

కారణాలు ఇవే: మనం భోజనం చేసిన తర్వాత శరీరం తిన్న ఆహారాన్ని జీర్ణం చేసే పనిలో పడుతుంది. దీనివల్ల రక్తప్రవాహం జీర్ణవ్యవస్థవైపు మళ్లీ.. మెదడుకేమో రక్తప్రసరణ తగ్గుతుంది. అలాగే తిన్న వెంటనే రక్తంలో చక్కెర స్థాయులను మేనేజ్‌ చేయడానికి శరీరం ఇన్సులిన్‌ను విడుదలచేస్తుంది. ఈ ఇన్సులిన్‌ బ్రెయిన్‌లో ట్రిప్టోఫాన్‌ అనే అమైనో ఆమ్లాన్ని ఉత్పత్తిచేస్తుంది. ఇది సెరటోనిన్, మెలటోనిన్‌ అనే హార్మోనులను ఎక్కువ మోతాదులో విడుదల చేసి, మనకు నిద్రపట్టేలా చేస్తుందని నిపుణులు చెబుతున్నారు. కాబట్టి, ఇంకొంచెం తిందాం అనిపించినప్పుడే ఆపేయాలని సూచిస్తున్నారు.

2018లో "ఫుడ్‌ రీసర్చ్‌" జర్నల్‌లో ప్రచురించిన అధ్యయనం ప్రకారం.. కార్బోహైడ్రేట్‌లు ఎక్కువగా ఉండే ఆహారం తిన్న తర్వాత మానసిక పనితీరు తగ్గుతుందని, మగత పెరుగుతుందని పరిశోధకులు గుర్తించారు. ఈ పరిశోధనలో అమెరికాలోని డ్యూక్‌ యూనివర్సిటీ మెడికల్‌ సెంటర్‌కు చెందిన 'డాక్టర్‌ డేవిడ్ జె. స్టెయెర్స్' పాల్గొన్నారు. కార్బోహైడ్రేట్‌లు అధికంగా ఉండే ఆహరం తీసుకుంటే మగతగా ఉంటుందని ఆయన పేర్కొన్నారు.

తిన్న తర్వాతే ఎందుకు?

• మనం తినే అన్నం, చపాతీలలో కార్బోహైడ్రేట్లు అధికంగా ఉంటాయి. ఇవి త్వరగా నిద్రమత్తు వచ్చేలా ప్రేరేపిస్తాయని నిపుణులు చెబుతున్నారు. కాబట్టి, ఆహారంలో కార్బోహైడ్రేట్లను తగ్గించుకోవాలి. అలాగే సమతుల ఆహారం తినాలి. దీనివల్ల మెలకువగా, చురుకుగా ఉంటామని అంటున్నారు.
• ఒకేసారి ఎక్కువగా తినకుండా.. కొంచెం కొంచెం ఆహారం తినాలి. దీనివల్ల శరీరంలో ఒక్కసారిగా ఇన్సులిన్‌ స్థాయులు పెరగకుండా ఉంటాయి.
• ప్రొటీన్‌లు, ఆరోగ్యకరమైన కొవ్వులూ, సంక్లిష్ట కార్బోహైడ్రేట్లూ లాంటి అన్ని పోషకాలూ ఆహారంలో ఉండేలా చూసుకోవాలి. ఇవి శరీరంలో గ్లూకోజు స్థాయులను స్థిరంగా ఉంచుతాయి.
• ఎక్కువగా నీళ్లు తాగాలి.
• తిన్న తర్వాత కొద్ది దూరం నడవాలి.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.