Rules for Storing Food Safely in a Fridge: సామాన్యంగా ఆహార పదార్థాలను ఎక్కువ రోజులు నిల్వ ఉంచడానికి ఫ్రిజ్ను వాడుతుంటారు. అయితే, మనలో చాలా మంది.. వండినవి, వండనివి, పచ్చివి అన్ని ఒకే దగ్గర పెడుతుంటారు. ఇలా చేయడం వల్ల పచ్చి పదార్థాల్లో ఉన్న బ్యాక్టీరియా.. వండిన పదార్థాల్లోకి వెళ్లిపోతుందని నిపుణులు చెబుతున్నారు. ఇంకా కొందరు ఫ్రిజ్లో బ్యాక్టీరియా ఉండదు అనుకుంటారు. తక్కువ ఉష్ణోగ్రతలో కూడా పెరుగుతుందని ప్రముఖ డైటీషియన్ డాక్టర్ శ్రీలత వివరిస్తున్నారు. ఫ్రిజ్ను 4 డిగ్రీల లోపు పెట్టుకోవడం వల్ల బ్యాక్టీరియాను కొద్దిగా తగ్గించుకోవచ్చని చెబుతున్నారు. అయితే, కొన్ని బ్యాక్టీరియాలు చలిలో, రిఫ్రిజరేటర్లో సైతం పెరుగుతాయని వివరిస్తున్నారు. అయితే, వీటిని అదుపులో పెట్టుకునేందుకు ఫ్రిజ్ను ఎప్పటికప్పడూ శుభ్రం చేస్తుండాలని అంటున్నారు. ఇందుకోసం యాంటీ బ్యాక్టీరియల్ లిక్విడ్స్ ఉపయోగించాలని వెల్లడిస్తున్నారు.
ముఖ్యంగా నాన్వెజ్ ఆహారాన్ని చాలా జాగ్రత్తగా నిల్వ పెట్టుకోవాలని నిపుణులు సూచిస్తున్నారు. అయితే, పచ్చి మాంసాన్ని ఫ్రిజ్లో పెట్టడం వల్ల అందులోని బ్యాక్టీరియా.. వండిన పదార్థాలపైకి వ్యాపిస్తుందని అంటున్నారు. అందుకోసమే నాన్వెజ్ పదార్థాలను చక్కగా ప్యాక్ చేసి కింది ర్యాకుల్లో పెట్టాలని సూచిస్తున్నారు. కూరగాయలను కూడా శుభ్రం చేసి జిప్ కవర్లలో భద్రపరచుకోవాలని సలహా ఇస్తున్నారు.
ఇంకా మనలో చాలా మంది.. కొన్ని రోజుల పాటు ఫ్రిజ్లో పెట్టిన తర్వాత తింటుంటారు. అయితే, ఇలా తినడం వల్ల అనేక రకాల సమస్యలు వస్తాయని చెబుతున్నారు. పాల సంబంధిత పదార్థాలను ముఖ్యంగా పన్నీర్లను జాగ్రత్తగా పెట్టాలని సూచిస్తున్నారు. పండ్లు, కూరగాయలను ప్రత్యేకమైన కవర్లలో పెట్టడం వల్ల ఇన్ఫెక్షన్ల నుంచి తప్పించుకోవచ్చని అంటున్నారు. ముఖ్యంగా వండిన ఆహారాన్ని ఫ్రిజ్లో పెట్టేటప్పుడు క్లోజ్ కంటైనర్ల్లో పెట్టాలని సలహా ఇస్తున్నారు.
ప్రతి రోజూ ఉదయాన్ని టిఫిన్స్ చేసేందుకు వీలుగా.. కొబ్బరి, పల్లీ చట్నీలు, ఇడ్లీ, దోశ పిండి లాంటివాటిని 2-3 రోజుల పాటు ఫ్రిజ్లో పెట్టి తింటుంటారు. అయితే, ఇలాంటి సమయంలో కరెంట్ పోతే.. ఫ్రిజ్లోని ఉష్ణోగ్రత పెరిగి పదార్థాల్లో బ్యాక్టీరియా అభివృద్ధి చెందుతుందని అంటున్నారు. ఇలా కరెంట్ పోయిన సమయంలో ఫ్రిజ్లో ఐస్క్రీము ఉంటే అందులో కూడా బ్యాక్టీరియా పెరిగిపోతుందని వివరిస్తున్నారు. ముఖ్యంగా ట్రాన్స్ప్లాంట్స్ అయిన రోగులు ఫ్రిజ్ సంబంధింత పదార్థాలకు దూరంగా ఉండాలని సూచిస్తున్నారు. మనం తీసుకునే ఆహార పదార్థాల్ని సాధ్యమైనంతవరకు తాజాగా, పరిశుభ్రంగా, అప్పటికప్పుడు వండుకొని, వేడివేడిగా తీసుకోవడమే మంచిదని నిపుణులు వివరిస్తున్నారు. అందుకోసమే వీలైనంతవరకు మిగిలిపోయిన అన్ని పదార్థాలనీ ఫ్రిజ్లో పెట్టకుండా జాగ్రత్త పడాలని సూచిస్తున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
పిల్లలకు తినేటప్పుడు ఫోన్లు ఇస్తున్నారా? ఇలా చేస్తే ఏం జరుగుతుందో తెలుసా?
దగ్గుతో నిద్ర కూడా పట్టట్లేదా? ఈ స్వీట్ మందు తీసుకుంటే తగ్గే ఛాన్స్!
