What Happens Stop Eating Non Veg For A Month : ప్రస్తుత కాలంలో మెజార్టీ ప్రజలు నాన్‌వెజ్‌ వంటకాలను ఎంతో ఇష్టంగా తింటున్నారు. కొంత మందికైతే అసలు రోజూ ముక్కలేనిది ముద్ద దిగదు. చికెన్, మటన్‌, ఫిష్‌ వంటి ఏదో ఒక నాన్‌వెజ్‌ ఐటమ్‌ తప్పకుండా ఉండాల్సిందే. ఇక సండే వచ్చిందటే చాలు.. దాదాపు అందరి ఇళ్లలో మాంసాహార వంటకాలు ఘుమఘుమలాడుతుంటాయి. ఇలా నాన్‌వెజ్‌ రెసిపీలను ఇష్టపడేవారి సంఖ్య రోజురోజుకు పెరిగిపోతుంది. ఇది ఇలా ఉంటే.. కొంత మంది డైటింగ్‌ చేసేవారు నాన్‌వెజ్‌కు దూరంగా ఉంటారు. అయితే, ఒక నెల రోజుల పాటు మాంసాహారం తినకుండా ఉంటే ఏం జరుగుతుందో మీకు తెలుసా ? ఇప్పుడు చూద్దాం.
బరువు తగ్గుతారు :
నాన్‌వెజ్‌లో క్యాలరీలు ఎక్కువగా ఉంటాయి. వీటిని తినడం వల్ల మన శరీరంలో కొవ్వు శాతం పెరిగిపోతుంది. ముఖ్యంగా అధిక బరువుతో బాధపడేవారు.. చికెన్, మటన్‌ వంటి వాటిని అధికంగా తినడం వల్ల ఇంకా బరువు పెరిగే అవకాశం ఉందని నిపుణులు చెబుతున్నారు. అయితే, నెల రోజుల పాటు నాన్‌వెజ్‌ తీసుకోకపోవడం వల్ల బరువు తగ్గే ఛాన్స్‌ ఉందట. క్యాలరీలు తక్కువగా ఉండే పండ్లు, కూరగాయలు, ఆకుకూరలను డైట్‌లో భాగం చేసుకోవడం వల్ల ఈజీగా బరువు తగ్గుతారని నిపుణులు పేర్కొన్నారు.
జీర్ణక్రియ మెరుగుపడుతుంది :
నాన్‌వెజ్‌ వంటకాలను కొన్ని రోజులు తినకపోవడం వల్ల జీర్ణక్రియ మెరుగుపడుతుంది. తాజా ఆకుకూరలు, కూరగాయలలో ఫైబర్‌ ఎక్కువగా ఉంటుంది. వీటివల్ల జీర్ణక్రియ సాఫీగా జరుగుతుందని నిపుణులు చెబుతున్నారు. అలాగే మలబద్ధకం సమస్య కూడా తగ్గిపోతుందని అంటున్నారు.
చెడు కొలెస్ట్రాల్ స్థాయిలు తగ్గుతాయి :
నాన్‌వెజ్‌ వంటకాలలో సంతృప్త కొవ్వులు ఎక్కువగా ఉంటాయి. వీటిని అధికంగా తీసుకోవడం వల్ల రక్తంలో చెడు కొలెస్ట్రాల్ స్థాయిలను పెంచుతాయి. అయితే, ఒక నెల రోజులపాటు మాంసాహారం తినకపోవడం వల్ల కొలెస్ట్రాల్ స్థాయిలు తగ్గే అవకాశం ఉందని నిపుణులు చెబుతున్నారు. అలాగే నాన్‌వెజ్‌ తినకపోవడం వల్ల రక్తపోటు తగ్గుతుందని పేర్కొన్నారు.
2016లో "Journal of Hypertension" జర్నల్‌లో ప్రచురించిన నివేదిక ప్రకారం.. నెల రోజుల పాటు నాన్‌వెజ్‌ తినకుండా ఉండటం వల్ల రక్తంలో కొలెస్ట్రాల్ స్థాయిలు, రక్తపోటు తగ్గుతాయని పరిశోధకులు గుర్తించారు. ఈ పరిశోధనలో కెనాడాలోని సెయింట్ మైకేల్స్ హాస్పిటల్‌కు చెందిన 'డాక్టర్‌ డేవిడ్ జెంకిన్స్'(David Jenkins) పాల్గొన్నారు. నెలరోజుల పాటు మాంసాహారం తినకపోవడం వల్ల రక్తంలో కొలెస్ట్రాల్ స్థాయిలు, రక్తపోటు తగ్గుతాయని ఆయన పేర్కొన్నారు.
వాపు, మంట తగ్గుతుంది :
మాంసాహారాలలో ప్రాసెస్‌ చేసినవి రకరకాలు లభ్యమవుతున్నాయి. ఇలా తయారైన వాటిని తినడం వల్ల దీర్ఘకాలంలో శరీరంలో వాపు, మంటలతో కూడిన ఇన్‌ఫ్లమెషన్‌ వచ్చే అవకాశం ఉంది. దీనివల్ల కొన్ని వ్యాధులు వచ్చే అవకాశం ఉందని నిపుణులు చెబుతున్నారు. అయితే, మాంసాహారాన్ని మానేయడం వల్ల ఇన్‌ఫ్లమెషన్‌కు గురయ్యే అవకాశాలు తగ్గుతాయని పేర్కొన్నారు.
- మాంసాహారం మానేయగానే బలహీనంగా, చాలా అలసటగా అనిపించవచ్చు. ఎందుకంటే.. నాన్‌వెజ్‌లో మనకు అత్యధికంగా ప్రొటీన్, ఇనుము లభిస్తాయి. ఇవి రెండు అందకపోవటం వల్ల శరీరం అలసటకు గురైనట్లుగా ఉంటుంది.
- ఒక్కసారిగా మాంసాహారం మానేయడం వల్ల మన శరీరంలో విటమిన్‌లు, ఖనిజాలు అందవు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
జీడిపప్పు Vs బాదం - బరువు తగ్గడానికి ఇది బెటర్ ఆప్షన్! - Cashew Vs Almond Which Is Healthier
