ఎంత క్లీన్ చేసినా టాయిలెట్​ పాట్​లో పసుపు మరకలు పోవట్లేదా? - ఇలా చేశారంటే నిమిషాల్లో మాయం! - Toilets Limescale Removing Trick

Toilets Limescale Removing Tip : కొంత కాలం వాడిన తర్వాత టాయిలెట్​ పాట్​లో పసుపు, ఇతర మరకలు పేరుకుపోతాయి. ఎంత ప్రయత్నించినా ఆ మరకలు వదిలిపోవు. అయితే.. కొన్ని టిప్స్​తో టాయిలెట్​ను ఈజీగా మెరిసేలా చేసుకోవచ్చంటున్నారు నిపుణులు. అది ఎలాగో ఇప్పుడు చూద్దాం.

Best Tip To Removing Toilets Limescale : ఇంటిని ఎంత శుభ్రంగా ఉంచుకుంటామో టాయిలెట్స్​ను కూడా అంతే పరిశుభ్రంగా ఉంచుకోవాలి. లేదంటే.. రకరకాల క్రిములు, బ్యాక్టీరియా చేరి మురికి కూపంగా మారుతాయి. దీంతో కమోడ్​ చూడడానికే ఇబ్బందిగా ఉంటుంది. ఇక, టాయిలెట్​ పాట్​లో ఏర్పడిన పసుపు మరకలు అస్సలే వదిలిపోవు. దీంతో.. క్లీన్ చేయడానికి నానా అవస్థలు పడాల్సి వస్తుంది. అయితే.. కొన్ని టిప్స్ పాటించడం ద్వారా ఈజీగా క్లీన్ చేసుకోవచ్చని నిపుణులు చెబుతున్నారు.

టాయిలెట్​ పాట్​లో ఏర్పడే పసుపు రంగు మరకలను 'లైమ్​స్కేల్' అని అంటుంటారు. అయితే, ఈ మరకలు చూడడానికి అసహ్యకరంగా కనిపించడమే కాదు.. దీర్ఘకాలిక ప్లంబింగ్ సమస్యలకూ దారి తీసే ఛాన్స్ ఉంటుంది. కాబట్టి, వీటిని వెంటనే తొలగించుకోవడం చాలా ముఖ్యమంటున్నారు నిపుణులు. అందుకోసం సరైన క్లీనింగ్ ప్రొడక్ట్స్ ఎంచుకోవడం కూడా అంతే ముఖ్యం. అయితే.. రెగ్యులర్ క్లీనింగ్ చేసినప్పటికీ ఈ మరకలు ఏర్పడటానికి కారణమేమిటంటే.. మనం వాడే వాటర్​లో కాల్షియం, మెగ్నీషియం పుష్కలంగా ఉండడమేనట. అవి ఉండే హార్డ్ వాటర్ వాడడం వల్ల ఆ ఖనిజాలు పేరుకుపోయి పసుపు, ఎరుపు, గోధుమ, లేదా ఆకుపచ్చ మరకలు ఏర్పడతాయంటున్నారు నిపుణులు. ఈ మరకలను నేచురల్​గా సులభంగా తొలగించుకోవచ్చని చెబుతున్నారు.

• అందుకోసం.. మీరు ముందుగా ఒక అరలీటర్ వైట్ వెనిగర్ తీసుకొని అందులో ఒక నిమ్మకాయను కట్​ చేసుకొని పిండుకోవాలి. అనంతరం కొన్ని వేడినీళ్లు తీసుకొని దానిలో ఆ మిశ్రమాన్ని యాడ్ చేసుకోవాలి. ఆపై దాన్ని టాయిలెట్​ బౌల్​లో పోసి కనీసం ఒక గంటపాటు వేచి ఉండాలి.
• ఆ తర్వాత.. టాయిలెట్​ బ్రష్​తో మరకలు ఉన్న చోట స్క్రబ్ చేయాలి. అనంతరం మీది వెస్ట్రన్ టాయిలెట్ అయితే ఫ్లష్ చేయాలి. అదే.. నార్మల్ టాయిలెట్ అయితే వాటర్ పోసి క్లీన్ చేసుకోవాలి.
• అంతే.. మీ టాయిలెట్ పాట్​లో ఉన్న పసుపు మరకలు తొలగిపోయి తెల్లగా కనిపిస్తుందంటున్నారు నిపుణులు.
• పసుపు మరకలు నిరోధించడానికి ప్రతి 2 నుంచి 4 వారాలకోసారి ఈ పద్ధతిని ఉపయోగించడం ద్వారా ఆ మరకలు ఏర్పడకుండా ఉంటాయని చెబుతున్నారు.

2016లో 'ఇంటర్నేషనల్ జర్నల్ ఆఫ్ ఎన్విరాన్‌మెంటల్ రీసెర్చ్ అండ్ పబ్లిక్ హెల్త్​'లో ప్రచురితమైన ఒక నివేదిక ప్రకారం.. టాయిలెట్‌లను శుభ్రం చేయడానికి వైట్ వెనిగర్ ఉపయోగించడం వల్ల డయేరియా కలిగించే బ్యాక్టీరియా E. coli స్థాయిలు గణనీయంగా తగ్గుతాయని కనుగొన్నారు. ఈ పరిశోధనలో టెక్సాస్ A&M యూనివర్సిటీకి చెందిన డాక్టర్ జీన్ హోవాంగ్ పాల్గొన్నారు. టాయిలెట్ క్లీనింగ్ కోసం వెనిగర్ యూజ్ చేయడం బ్యాక్టీరియాను తరిమికొట్టడానికి చాలా బాగా పనిచేస్తుందని ఆయన పేర్కొన్నారు.

NOTE : ఇక్కడ మీకు అందించిన సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం.