మీ పెదాల చుట్టూ ఇలా నల్లగా మారిందా? - ఇలా చేస్తే పాలరాతి అందం మీ సొంతం! - Remove Darkness Around Mouth

How To Remove Black Marks Around Mouth : ముఖం ఎల్లప్పుడూ చంద్రబింబంలా మెరుస్తుండాలని అమ్మాయిలందరూ కోరుకుంటారు. కానీ.. కొంత మంది అమ్మాయిల పెదాల చుట్టూ నల్లటి వలయం తయారవుతుంది. మీరు కూడా ఇలాంటి పరిస్థితిని ఎదుర్కొంటున్నారా? అయితే.. కొన్ని సింపుల్‌ టిప్స్ ద్వారా పాలరాతి లాంటి అందాన్ని మీ సొంతం చేసుకోవచ్చు.

Tips To Remove Black Marks Around Mouth : నలుగురిలో అందంగా కనిపించాలని అమ్మాయిలు తెగ ఆరాటపడుతుంటారు. అందుకోసం డైలీ వివిధ రకాల కాస్మెటిక్‌ ఉత్పత్తులు, మార్కెట్‌లో దొరికే క్రీమ్‌లను వాడుతుంటారు. అయినప్పటికీ.. కొంత మంది అమ్మాయిల ముఖం నల్లగా ఉంటుంది. ముఖ్యంగా పెదాల చుట్టూ నల్లగా తయారవుతుంది. మీరు కూడా ఈ సమస్యతో ఇబ్బంది పడుతుంటే.. కొన్ని చిట్కాలు పాటించడం ద్వారా మంచి ఫలితం పొందొచ్చని నిపుణులు చెబుతున్నారు. ఆ టిప్స్‌ ఏంటో ఇప్పుడు చూద్దాం.

పెదవుల చుట్టూ నలుపు తగ్గడానికి ఈ చిట్కాలు పాటించండి :

కీరాదోస:

• కీరాదోస గుజ్జు (తొక్క తీసి, మిక్సీ వేసుకోవాలి)- 2 టేబుల్‌ స్పూన్లు
• శనగపిండి- చెంచా

ముందుగా ఈ రెండు పదర్థాలను బాగా మిక్స్ చేసి పెదవుల చుట్టూ ప్యాక్‌లా వేసుకోవాలి. ఒక 20 నిమిషాల పాటు ఆరనిచ్చి ఆ తర్వాత చల్లని నీటితో కడిగేసుకోవాలి. ఇలా క్రమం తప్పకుండా నెల రోజుల పాటు చేయడం వల్ల మంచి ఫలితం కనిపిస్తుందని నిపుణులంటున్నారు. ఒకవేళ కీరాదోస అందుబాటులో లేకపోతే ఈ ప్యాక్‌లో యాపిల్ లేదా పచ్చిబంగాళాదుంప గుజ్జుని కూడా ఉపయోగించవచ్చని సూచిస్తున్నారు.

పాల మీగడ :
పాలల్లోని మీగడను తీసి.. అందులో చిటికెడు పసుపు వేయండి. తర్వాత ఈ మిశ్రమాన్ని బాగా కలిపి మూతి చుట్టూ రాయండి. అలాగే ఇందులో కొద్దిగా శనగ పిండి కలుపుకుని.. అప్లై చేసుకున్నా కూడా నలుపును తగ్గించుకోవచ్చని నిపుణులు చెబుతున్నారు.