Natural Remedies to Cure Mouth Ulcers : మనం రోజూ తీసుకునే ఆహారంలో పోషకాలు తక్కువైతే వివిధ రకాల ఆరోగ్య సమస్యలు వస్తాయి. అలాంటి వాటిలో నోటిపూత లాంటివి కూడా ఓ సమస్యే అంటున్నారు వైద్య నిపుణులు. అధిక ఒత్తిడికి గురవడం, శరీరంలో వేడి ఎక్కువవడం, డీహైడ్రేషన్ లాంటి సమస్యలు కూడా ఇందుకు కారణాలంటున్నారు. ఈ సమస్య నుంచి ఉపశమనం పొందడానికి నిపుణులు కొన్ని సహజసిద్ధ మార్గాలను సూచిస్తున్నారు. ఈ జాగ్రత్తలను పాటించడం ద్వారా నోటిపూత సమస్యను పరిష్కరించుకోవచ్చని సూచిస్తున్నారు. అవేంటో ఇప్పుడు తెలుసుకుందాం.
అసలెందుకీ నోటిపూత సమస్య : నోటిపూత రావడానికి వివిధ రకాల కారణాలున్నాయంటున్నారు నిపుణులు. అధిక ఒత్తిడి కూడా నోటిపూతకు కారణం అయ్యే అవకాశం ఉందంటున్నారు. అప్పుడప్పుడూ మనం తీసుకునే ఆహారం శరీరానికి పడకపోవడం కూడా కారణం కావచ్చు అంటున్నారు. నిమ్మ, నారింజ, యాపిల్, టొమాటో, స్ట్రాబెర్రీ.. లాంటి నిమ్మజాతి, ఆమ్ల గుణాలు కలిగిన పండ్లు, కూరగాయలు మోతాదుకు మించి తినడం వల్ల కూడా ఈ సమస్య వచ్చే అవకాశం ఉంటుందంటున్నారు. హార్మోన్ల అసమతుల్యత వల్ల కూడా నోటిపూత వచ్చే అవకాశం ఎక్కువగా ఉంటుందంటున్నారు. జింక్, ఫోలికామ్లం, బి12, సి విటమిన్లు, ఐరన్.. మొదలైనవి లోపించడం వల్ల కూడా ఈ సమస్య రావచ్చని వైద్యులు తెలియజేస్తున్నారు. పదే పదే నొప్పి నివారణ మందులు వాడడం వల్ల ఒక్కో దశలో అవి శరీరంపై ప్రతికూల ప్రభావాన్ని చూపుతాయంటున్నారు. ఇలాంటి సందర్భాల్లో కూడా నోటిపూత రావచ్చని చెబుతున్నారు. నోరు పరిశుభ్రంగా ఉంచుకోకపోవడం వల్ల కూడా ఈ సమస్య ఎదురుకావచ్చంటున్నారు.
తేనెతో ఉపశమనం : అప్పుడప్పుడూ నోట్లో కణజాలాలు చిట్లిపోవడం వల్ల కూడా ఈ సమస్య ఏర్పడుతుందంటున్నారు వైద్యనిపుణులు. అందుకనీ అక్కడ తిరిగి కణజాలం ఏర్పడడంలో తేనె సహాయపడుతుందంటున్నారు. అలాగే తేనె సహజసిద్ధమైన మాయిశ్చరైజర్‌గా కూడా పనిచేస్తుందని, ఇందులో ఉండే యాంటీ మైక్రోబియల్ గుణాల వల్ల నోటిపూత నుంచి సత్వర ఉపశమనం లభిస్తుందని వైద్యులు సూచిస్తున్నారు.
ఎలా ఉపయోగించాలి? : దీనికోసం తేనెలో కొంచెం పసుపు వేసి పేస్ట్ లాగా తయీరప చేసుకోవాలి. ఈ పేస్ట్‌ను సమస్య ఉన్న భాగంలో రాయాలి. ఇలా చేయడం వల్ల క్రమంగా సమస్య నుంచి ఉపశమనం లభిస్తుందంటున్నారు వైద్యులు. తేనె, పసుపు మిశ్రమానికి బదులుగా కేవలం తేనెను కూడా ఉపయోగించవచ్చని సూచిస్తున్నారు.
కొబ్బరితో : కొబ్బరినీళ్లు, ఎండు లేదా పచ్చి కొబ్బరి, కొబ్బరి నూనె మెుదలగు వాటితో కూడా నోటిపూత దూరమవుతాయంటున్నారు వైద్య నిపుణులు. కొబ్బరినీ ళ్ల వల్ల శరీరంలోని వేడి తగ్గి, ఫలితంగా సమస్య నుంచి ఉపశమనం కలుగుతుందంటున్నారు. కొబ్బరి నూనెను సమస్య ఉన్న చోట రాయడం, ఎండు లేదా పచ్చి కొబ్బరి నమలడం, లాంటివి చేస్తే సమస్య త్వరగా తగ్గే అవకాశం ఉందంటున్నారు నిపుణులు.
పాల పదార్థాలతో : పాల పదార్థాలతో సైతం నోటిపూత సమస్యను తగ్గించుకోవచ్చని నిపుణులు సూచిస్తున్నారు. సమస్య ఉన్న చోట నెయ్యి రాయడం, ప్రతిరోజూ రెండుమూడు సార్లు ఒక గ్లాస్ చొప్పున మజ్జిగ తాగడం, లాంటివి చేస్తే సమస్య నుంచి తొందరగా ఉపశమనం పొందే అవకాశాలుంటాయంటున్నారు.
తులసి ఆకులతో : తులసి ఆకుల్లో చాలా ఔషధ గుణాలు ఉంటాయి. వీటి వల్ల ఒత్తిడి దూరమవుతుంది. నోట్లో కొన్ని నీళ్లు పోసుకుని తర్వాత కొన్ని తులసి ఆకుల్ని వేసుకోవాలి. ఆ తరువాత నీటితో పాటే తులసి ఆకుల్ని నమలాలి. ఇలా రోజుకు నాలుగైదు సార్లు చేయాలి. దీనివల్ల నోటిపూత త్వరగా తగ్గుతుంది. అలాగే ఈ సమస్య తిరిగి రాకుండా కూడా ఉంటుందని నిపుణులు సూచిస్తున్నారు.
నొప్పి తగ్గాలంటే : నోటిపూత వల్ల వచ్చే నొప్పి తగ్గాలంటే చిన్న ఐస్ ముక్కను తీసుకుని దాంతో గాయం ఉన్న ప్రాంతంలో నెమ్మదిగా రుద్దడం, బాగా చల్లటి నీటితో నోరు శుభ్రపరచుకోవడం, లాంటివి చేస్తే మంచి ఫలితం ఉంటుందంటున్నారు నిపుణులు. అలాగే లవంగం నమలడం, లవంగం నూనె సమస్య ఉన్న ప్రాంతంలో పూయడం... ద్వారా సమస్య నుంచి ఉపశమనం పొందచ్చంటున్నారు. అయితే ఈ చిట్కాలన్నీ పాటించినా సమస్య తగ్గకపోతే మాత్రం డాక్టర్‌ని సంప్రదించి తగిన చికిత్స తీసుకోవాలని నిపుణులు సూచిస్తున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
'లాఫింగ్ యోగా వల్ల కలిగే ప్రయోజనాలు- తీసుకోవాల్సిన జాగ్రత్తలు' - Laughter Yoga Health Benefits
