How to Make Coffee Mask : ముఖం ఉబ్బినట్లుగా తయారవడం, చర్మం పొలుసులుగా ఊడిపోవడం లాంటి సమస్యలతో చాలామంది ఇబ్బంది పడుతుంటారు. అయితే, అలాంటి సమస్యలకు ఈ కాఫీ స్క్రబ్/ఫేస్మాస్క్ చక్కటి పరిష్కారం చూపుతుందంటున్నారు సౌందర్య నిపుణులు. ఈ ఫేస్మాస్క్ ద్వారా నిగనిగలాడే చర్మం మీ స్వంతమవుతుందంటున్నారు. ఈ నేపథ్యంలో కాఫీ స్క్రబ్ను ఎలా చేసుకోవాలి? ఎలా వాడాలి? వాడే ముందు ఎలాంటి జాగ్రత్తలు తీసుకోవాలి అనే విషయాలు ఇప్పుడు తెలుసుకుందాం.
ఇందుకోసం కావాల్సినవి..
- బరకగా దంచిన కాఫీ పొడి - 2 టీస్పూన్లు
- బ్రౌన్‌ షుగర్‌ - ఒకటిన్నర స్పూన్లు
- ఆలివ్‌ నూనె - టీస్పూన్
- తేనె - టీస్పూన్
- పాలు - టీస్పూన్
ఎలా చేసుకోవాలి..
ముందుగా ఒక మిక్సింగ్‌ బౌల్‌ తీసుకొవాలి. అందులో పైన చెప్పిన అన్ని పదార్థాలు వేసి పేస్ట్‌లా కలుపుకోవాలి. తరువాత ఆ మిశ్రమాన్ని ముఖానికి గుండ్రంగా రుద్దుతూ అప్లై చేసుకోవాలి. అలా అప్లై చేసిన మిశ్రమాన్ని 20 నిమిషాల పాటు అలాగే ఉంచుకొవాలి. 20 నిమిషాల తరువా చల్లటి నీటితో కడిగేసుకోవాలని నిపుణలు సూచిస్తున్నారు.
ఇలా ఈ కాఫీ స్క్రబ్ వేసుకోవాడం వల్ల ఉబ్బిన ముఖాన్ని తిరిగి మామూలు స్థితికి తీసుకురావడంతో పాటు పొలుసులుగా ఊడిపోయే చర్మానికి చక్కటి పరిష్కారం చూపుతుందంటున్నారు నిపుణులు. అలాగే ముఖాన్ని మృదువుగా, ప్రకాశవంతంగా మార్చుతుందంటున్నారు. ఈ కాఫీ స్క్రబ్‌ని బాడీ స్క్రబ్‌గా కూడా ఉపయోగించవచ్చని చెబుతున్నారు.
ఎన్నో ప్రయోజనాలు..!
ఈ ఫేస్మాస్క్ తయారుచేసుకోవడం ఎంతో సులభంగా ఉంది కదా! అంతేకాదు, ఇందులో వాడిన పదార్థాల్లో బోలెడన్ని సౌందర్య రహస్యాలు కూడా దాగున్నాయంటున్నారు నిపుణులు. అవేంటో ఇప్పుడు తెలుసుకుందాం.
కాఫీలో ఆ లక్షణాలు : కాఫీలో ఉండే యాంటీఆక్సిడెంట్లు వాతావరణ కాలుష్య ప్రభావం చర్మంపై పడకుండా అడ్డుకుంటాయి. ఫలితంగా నవయవ్వనంగా మెరిసిపోవచ్చు. అలాగే మొటిమలతో పాటుగా కళ్ల కింద నల్లటి వలయాలను తగ్గించే శక్తి కాఫీకి ఉందని నిపుణులు చెబుతున్నారు.
యాంటీ బ్యాక్టీరియల్‌ గుణాలు : బ్రౌన్‌ షుగర్‌ చర్మం పొలుసులుగా ఊడే సమస్యను తగ్గించి మృదువుగా, యవ్వనంగా మార్చుతుంది. అలాగే మృతకణాల్ని తొలగిస్తుంది. ఇందులోని యాంటీ బ్యాక్టీరియల్‌ గుణాలు, గ్లైకోలికామ్లం చర్మానికి మెరుపునందించడంలో సహకరిస్తాయి.
బ్యాక్టీరియా ప్రభావం పడకుండా : ఆలివ్‌ నూనె చర్మానికి సహజసిద్ధమైన మాయిశ్చరైజర్‌గా పనిచేస్తుంది. అలాగే ఇందులో ఉండే 'ఎ', 'డి', 'ఇ', 'కె' విటమిన్లు చర్మ ఆరోగ్యానికి చాలా అవసరం. ఇక ఆలివ్‌ నూనెలోని యాంటీ బ్యాక్టీరియల్‌ గుణాలు ఉంటాయి. ఇవి వాతావరణంలోని బ్యాక్టీరియా ప్రభావం చర్మంపై పడకుండా రక్షణ కల్పిస్తాయని నిపుణులు చెబుతున్నారు.
మొటిమల్ని తగ్గించడం : తేనెలోని యాంటీ మైక్రోబియల్‌ గుణాలు మొటిమల్ని తగ్గించడంలో సహకరిస్తాయని నిపుణులు చెబుతున్నారు. అలాగే మృతకణాలు, ముఖంపై ముడతలు, గీతల్ని తగ్గించే శక్తి తేనెకు ఉంటుందంటున్నారు.
సాగే గుణం పెంచడానికి : పొడిబారిన చర్మానికి సాంత్వన చేకూర్చడంలో పాలది మొదటి స్థానం. ఇందుకు పాలలోని 'ఎ' విటమిన్‌ తోడ్పడుతుంది. ఇక ఇందులోని విటమిన్‌ 'డి' ముఖం మీద ముడతలు, గీతల్ని తగ్గించడంతో పాటు చర్మానికి సాగే గుణాన్ని పెంచుతుందని నిపుణులు చెబుతున్నారు.
గమనిక: ఈ స్క్రబ్/ ఫేస్‌మాస్క్‌లో ఉన్నవన్నీ సహజమైన పదార్ధాలే అయినా ఇది కొంతమందికి పడకపోవచ్చు అంటున్నారు సౌందర్య నిపుణులు. అందుకే ఈ ఫేస్‌మాస్క్‌ను ఉపయోగించేటప్పుడు ముందు ఓసారి ప్యాచ్ టెస్ట్ కింద అప్లై చేసుకావాలని, చర్మానికి సంబంధించి ఎలాంటి తేడాలు లేవనుకున్న తర్వాతే దీనిని వాడడం కొనసాగించాలని నిపుణులు చెబుతున్నారు. అలాగే వాడుతున్నప్పుడు ఏవైనా తేడాలు కనిపించినా వెంటనే ఆపేసి, నిపుణులను సంప్రదించాల్సి ఉంటుందని నిపుణులు చెబుతున్నారు.
