Is Cinnamon Control Sugar Level: ప్రస్తుతం షుగర్ బాధితులు ఎక్కువయ్యారు. ఒక్కసారి డయాబెటిస్ ఎటాక్ అయ్యిందా.. జీవితాంతం మందులు వాడాల్సిందే. తినే తిండిని కూడా తగ్గించుకోవాలి. ఏది తినాలన్నా డాక్టర్లను ఒకటికి రెండు సార్లు సంప్రదించాలి. అయితే మధుమేహులు దాల్చిన చెక్కను వాడితే ప్రయోజనం ఉంటుందని నిపుణులు అంటున్నారు. డయాబెటిస్ ఉన్న వారు దాల్చిన చెక్క వినియోగించడం వల్ల వారి బ్లడ్ షుగర్ లెవల్ తగ్గుతుందని అంటున్నారు. ఇదే విషయాన్ని పలు అధ్యయనాలు సైతం వెల్లడించినట్లు వివరిస్తున్నారు. అసలు దాల్చిన చెక్కకు, షుగర్కు ఉన్న సంబంధం ఏంటి? దాల్చిన చెక్క వల్ల షుగర్ నిజంగానే అదుపులో ఉంటుందా? అన్న విషయాన్ని ఇప్పుడు తెలుసుకుందాం.
మన వంటింట్లో దాల్చిన చెక్కకు ప్రత్యేక స్థానం ఉంటుంది. ఆయుర్వేదంలో కూడా దాల్చిన చెక్కను ఔషధంగా వాడతారు. అయితే షుగర్తో బాధపడుతున్నవారు దాల్చిన చెక్క ఉపయోగించడం వల్ల మంచి ఫలితం ఉంటుందని.. షుగర్ లెవల్స్ కంట్రోల్లో ఉంటాయని అంటున్నారు. ఎందుకంటే దాల్చిన చెక్కలో ఉండే సహజ ఇన్సులిన్ రక్తంలో చక్కెర స్థాయిలను తగ్గించడంలో సహాయ పడుతుందని ప్రముఖ డైటీషియన్ డాక్టర్ శ్రీలత చెబుతున్నారు.
"దాల్చిన చెక్కలో ఫ్లేవనాయిడ్స్ లాంటి అనేక రకాల పోషకాలు ఉంటాయి. వీటిలో యాంటీ ఆక్సిడెంట్, యాంటీ ట్యూమర్, యాంటీ ఇన్ఫ్లేమరీ, యాంటీ క్యాన్సర్ గుణాలు ఉంటాయి. దాల్చిన చెక్క జీర్ణక్రియను మెరుగుపరుస్తుంది. శరీరంలో కొవ్వు ఎక్కువ ఉత్పత్తి అవ్వకుండా.. వాటి స్థాయులను అదుపులో ఉంచడానికి సహాయం చేస్తుంది. సోడియంను శరీరంలో నుంచి బయటకు పంపడంలో కృషి చేస్తుంది. అధిక రక్తపోటును అదుపులో ఉంచుతుంది. పంటి నొప్పి, చిగుళ్ల నొప్పి, వాపులకు దాల్చిన చెక్క ఎంతో మేలు చేస్తుంది. దాల్చిన చెక్కను 1/4 టీ స్పూన్ ప్రతిరోజూ తీసుకుంటే డయాబెటిస్ అదుపులోకి వస్తున్నట్లు అనేక పరిశోధనల్లో తేలింది."
--డాక్టర్ శ్రీలత, డైటీషియన్
ఇలా తీసుకుంటే మంచిది: దాల్చిన చెక్కను పొడి లాగా చేసుకుని 1/4 టీ స్పూన్ చొప్పును నీటిలో కలిపి ప్రతిరోజూ ఉదయం, సాయంత్రం తీసుకోవడం వల్ల ఇన్సులిన్ పెరిగి రక్తంలో గ్లూకోజ్ స్థాయిలు తక్కువ మోతాదులో నిల్వ ఉండేలా చేస్తుందన్నారు. డయాబెటిస్ ఉన్న వారు ఉదయం, సాయంత్రం కచ్చితంగా నీటిలో కలిపి తీసుకోవడం వల్ల చక్కెర స్థాయులు అదుపులో ఉంటాయని పలు పరిశోధనల్లో తేలినట్లు వివరిస్తున్నారు.
టైప్ 2 డయాబెటిస్ రోగుల్లో రక్తంలో చక్కెర స్థాయిల నియంత్రణకు దాల్చిన చెక్క బాగా ఉపయోగపడుతుందని కాలిఫోర్నియా శాస్త్రవేత్తల పరిశోధనల్లో వెల్లడైంది. ఇందులో బాగంగా 543 మంది టైప్ 2 మధుమేహ రోగుల్లో కొంతమందికి దాల్చిన చెక్కను, రోజుకు 120 మిల్లీ గ్రాముల నుంచి 6 గ్రాముల వరకు మాత్రలు ఇచ్చారు. మరికొంతమందికి మామూలు మాత్రలు ఇచ్చారు. తర్వాత వీరిని పరిశీలించగా.. దాల్చిన చెక్క మాత్రలను తీసుకున్నవారి రక్తంలో చక్కర స్థాయులు మిగతా వారికంటే మెరుగ్గా నియంత్రణలో ఉన్నట్లు తేలింది. ఇన్సులిన్ హార్మోన్ విడుదల, పనితీరును దాల్చిన చెక్క ప్రభావితం చేయడం వల్ల చక్కెర స్థాయిలు మెరుగుపడినట్లు గుర్తించారు.
మరిన్ని ప్రయోజనాలు:
- ఉదయం అల్పాహారం తీసుకున్నాక దాల్చిన చెక్కతో చేసిన టీ తాగితే మంచి ఫలితాలు ఉంటాయని నిపుణులు చెబుతున్నారు. దాల్చిన చెక్క, మిరియాలు సమానంగా తీసుకుని నూరి.. కషాయంలా చేసుకుని తాగితే జలుబు నుంచి ఉపశమనం లభిస్తుందని తెలిపారు.
- దాల్చిన చెక్కతో ఎసిడీటీ, కడుపులో పురుగులు నివారణకు ఎంతో మేలు చేస్తుందని వివరించారు.
- చెడు కొలెస్ట్రాల్ను, ట్రైగ్లైసైరైడ్లను తగ్గించడంతో పాటు మంచి కొలెస్ట్రాల్ను పెంచడంలో కూడా దాల్చిన చెక్క దోహదపడుతుందని నిపుణులు అంటున్నారు.
- దాల్చిన చెక్కలో ఫ్లేవనాయిడ్స్ లాంటి అనేక రకాల పోషకాలు ఉంటాయి. వీటిలో యాంటీ ఆక్సిడెంట్, యాంటీ ట్యూమర్, యాంటీ ఇన్ఫ్లేమరీ, యాంటీ క్యాన్సర్ గుణాలు ఉంటాయి. దాల్చిన చెక్క జీర్ణక్రియను మెరుగుపరుస్తుంది. శరీరంలో కొవ్వు ఎక్కువ ఉత్పత్తి అవ్వకుండా.. వాటి స్థాయులను అదుపులో ఉంచడానికి సహాయం చేస్తుందని అంటున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
