హెయిర్ లాస్​తో ఇబ్బంది పడుతున్నారా? దీంతో తలస్నానం చేస్తే జుట్టు ఒత్తుగా వస్తుందట!

-మీ వెంట్రుకలు రాలిపోతున్నాయా? -జుట్టు రాలే సమస్యను తగ్గించే ఆయుర్వేద ఔషధం

Hair Loss Treatment in Ayurveda: మన తలపై ఒత్తుగా ఉన్న జుట్టు కొంచెంకొంచెంగా రాలిపోతుంటే బాధగా ఉంటుంది. ఈ సమస్యను అరికట్టేందుకు సబ్బులు, షాంపూల నుంచి చిట్కా వైద్యం వరకు చాలానే ప్రయత్నిస్తుంటారు. అయితే, జుట్టు రాలడాన్ని తగ్గించేందుకు ఆయుర్వేదంలో చక్కటి పరిష్కారం ఉందని ప్రముఖ ఆయుర్వేద వైద్యులు గాయత్రీ దేవీ చెబుతున్నారు. అదేంటో ఇప్పుడు తెలుసుకుందాం.

కావాల్సిన పదార్థాలు

• 200 గ్రాములు కుంకుడుకాయ పొడి
• 25 గ్రాముల మెంతుల చూర్ణం
• 25 గ్రాముల ఉసిరి పొడి
• 25 గ్రాముల యష్టిమధు చూర్ణం
• 25 గ్రాముల మందారపువ్వుల చూర్ణం

తయారీ విధానం, వాడకం

• ముందుగా ఓ గిన్నెలో కుంకుడు కాయ పొడి, ఉసిరి పొడి, మెంతుల చూర్ణం, యష్టిమధు చూర్ణం, మందార పువ్వుల చూర్ణం వేసి బాగా కలపాలి.
• ఇప్పుడు స్టౌ వెలిగించి ఓ గిన్నె పెట్టి అందులో నీళ్లు పోసి వేడి చేసుకోవాలి.
• నీళ్లు బాగా మరిగిన తర్వాత స్టౌ ఆఫ్ చేసి ముందుగా తయారు చేసుకున్న పొడిని వేడి నీటిలో పోసి దగ్గరకు అయ్యేవరకు ఉంచాలి.
• ఆ తర్వాత ఈ మిశ్రమాన్ని సుమారు గంట పాటు పక్కకు పెట్టుకోవాలి.
• అంతే జుట్టు రాలే సమస్యను తగ్గించే ఆయుర్వేద ఔషధం రెడీ! దీంతో తలస్నానం చేస్తే సరిపోతుందని అంటున్నారు.
• దీనిని ఓ గాజు సీసాలు పెట్టుకుని ఎలాంటి పురుగులు పట్టకుండా జాగ్రత్తగా పెట్టుకోవాలని చెబుతున్నారు.
• తల స్నానం చేసేందుకు గంట ముందు దీనిని తయారు చేసుకోవాలని వివరించారు.

కుంకుడు కాయ: మన పురాతన కాలం నుంచి తల స్నానం అనగానే కుంకుడు కాయనే ఉపయోగిస్తుంటారు. ఇది నురగను ఇచ్చి వెంట్రుకలను శుభ్రం చేస్తుందని నిపుణులు చెబుతున్నారు.

మెంతులు: ఇది జుట్టుకు మంచి టానిక్​లాగా పనిచేస్తుందని డాక్టర్ గాయత్రీ దేవీ చెబుతున్నారు. ఇంకా తలలో ఉండే చుండ్రు సమస్యలను కూడా తగ్గించడంలోనూ మెంతులు బాగా సహాయపడతాయని వివరించారు.

ఉసిరి పొడి: ఉసిరి జుట్టు రాలకుండా ఉండేందుకు మంచి కండీషనర్​లాగా ఉపయోగపడుతుందని నిపుణులు చెబుతున్నారు. ఇంకా జుట్టుకు రంగును అందిస్తుందని వివరించారు.

యష్టిమధు చూర్ణం: జట్టు బాగా రాలిపోయి బట్టతలలా మారుతున్నవారు కూడా ఈ చూర్ణం వాడితే మెరుగైన ఫలితాలు ఉంటాయని చెబుతున్నారు. ఇది మంచి హెయిర్ టానిక్​లాగా పనిచేస్తుందని వివరించారు.

మందారపువ్వుల చూర్ణం: జుట్టు రాలకుండా ఉండేందుకు మందార పువ్వు చాలా బాగా ఉపయోగపడుతుందని గాయత్రీ దేవీ చెబుతున్నారు.

NOTE: ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.