అవిసె గింజెలు తినట్లేదా? - ఎన్ని ప్రయోజనాలు కోల్పోతున్నారో తెలుసా?

Flax Seeds Health Benefits : ఈ రోజుల్లో జనాలు ఆరోగ్యం మీద శ్రద్ధ తీసుకుంటున్నారు. అయితే తగినన్ని పోషకాలు పొందాలంటే ఏం తినాలో చాలా మందికి తెలియట్లేదు. ఇలాంటి వారికోసమే ఈ స్టోరీ. అవిసె గింజలను మీ డైట్​లో తప్పక యాడ్ చేసుకోవాలని ఆరోగ్య నిపుణులు సూచిస్తున్నారు. మరి.. వాటి ప్రత్యేకతేంటో ఇప్పుడు చూద్దాం.

Health Benefits of Flax Seeds : మనం ఆరోగ్యంగా ఉండాలంటే రోజూ సరైన ఆహారం తీసుకోవడం చాలా అవసరం. అందుకే చాలా మంది తమ డైట్​లో డ్రై ఫ్రూట్స్, నట్స్, పండ్లను చేర్చుకుంటున్నారు. అయితే ఇవి మాత్రమే కాదు సీడ్స్ కూడా ఆరోగ్యానికి ఎంతో మేలు చేస్తాయంటున్నారు ఆరోగ్య నిపుణులు. అందులో ముఖ్యంగా అవిసె గింజల(Flax Seeds)ను తప్పనిసరిగా మీ డైట్​లో చేర్చుకోవాలని సూచిస్తున్నారు.

అవిసె గింజలను ఎలా తీసుకోవాలంటే? : ఈ గింజలను పచ్చిగా తినడం కంటే డ్రైరోస్ట్ చేసి, పొడిచేసుకుని తింటే మంచిది అంటున్నారు నిపుణులు. అవిసె గింజలను వేయించడం ద్వారా అందులో ఉండే హానికారక ఫైటిక్ యాసిడ్ తొలగిపోతుంది. అలాగే మొలకెత్తించి తిన్నా కూడా మంచిదే. వీటిని నీళ్లలో వేసినప్పుడు కొద్దిగా ఉబ్బి జెల్లీలా మారతాయి. అంటే ఎక్కువగా నీళ్లను పీల్చుకుంటాయి. అందుకే ఇవి కొంచెం తిన్నా తర్వాత వాటర్ ఎక్కువ తాగాలనే విషయం మర్చిపోవద్దు. లేదంటే మలబద్ధకం సమస్య వచ్చే ఛాన్స్ ఉంది. ఇక వీటి పొడిని డైలీ నీటిలో కొద్దిగా కలుపుకొని తాగవచ్చు. లేదంటే మీరు అన్నం వండుకునేటప్పుడే అందులో వీటి పొడి లేదా గింజలను యాడ్ చేసుకొని తీసుకోవచ్చు. అలాకాకుండా అవిసె గింజలను ఓట్స్, సలాడ్‌లు, స్మూతీలు లేదా మీకు ఇష్టమైన ఇతర ఆహారాలలో కలుపుకొని తినవచ్చు. వీటిని తీసుకోవడం ద్వారా ఎలాంటి ఆరోగ్య ప్రయోజనాలు పొందవచ్చో ఇప్పుడు చూద్దాం..

కొలెస్ట్రాల్ తగ్గుతుంది : అవిసె గింజలలో ఆల్ఫా-లినోలెనిక్ యాసిడ్ (ALA), ఒమేగా-3 ఫ్యాటీ యాసిడ్స్‌‌‌‌‌‌‌‌‌ పుష్కలంగా ఉంటాయి. ఇవి మన ఆరోగ్యానికి ఎన్నో రకాలుగా మేలు చేస్తాయి. సాధారణంగా ఒమేగా 3 ఫ్యాటీ యాసిడ్స్ చేపలలో ఉంటాయి. అయితే అవి తినలేని వారు వీటిని తింటే కొలెస్ట్రాల్ తగ్గుతుంది.

జీర్ణక్రియ మెరుగుపడుతుంది : అవిసె గింజలలో డైటరీ ఫైబర్ పుష్కలంగా ఉంటుంది. ఇది మీ పేగు ఆరోగ్యాన్ని మెరుగుపరిచి జీర్ణక్రియను ప్రోత్సహిస్తుంది. ఇంకా, ఈ గింజలు బరువు నిర్వహణలో, అతిగా తినడం నివారించడంలో కూడా చాలా బాగా సహాయపడుతాయి.

యాంటీఆక్సిడెంట్ గుణాలు : ఏ శాకాహారంలోనూ లేనంత ఎక్కువగా అవిసె గింజలలో యాంటీ ఆక్సిడెంట్​లు సమృద్ధిగా ఉంటాయి. ఇవి ఆక్సీకరణ ఒత్తిడిని తగ్గించడంలో, గుండె జబ్బులు, కొన్ని క్యాన్సర్‌ల ప్రమాదాన్ని తగ్గించడంలో చాలా బాగా ఉపయోగపడతాయి.

బ్లడ్ షుగర్ నియంత్రణ : అవిసె గింజలు రక్తంలో చక్కెర స్థాయిలను నియంత్రించడంలో చాలా బాగా సహాయపడతాయని కొన్ని పరిశోధనలు సూచిస్తున్నాయి. ఇది మధుమేహం ఉన్నవారికి చాలా బాగా యూజ్ అవుతాయి. వీటిని మీ ఆహారంలో చేర్చుకోవడం వల్ల మెరుగైన గ్లైసెమిక్ నియంత్రణకు దోహదం చేస్తాయి.

గుండె ఆరోగ్యానికి మేలు : ఫ్లాక్స్ సీడ్స్ తీసుకోవడం ద్వారా కలిగే మరో ప్రయోజనమేమిటంటే LDL కొలెస్ట్రాల్ (చెడు కొలెస్ట్రాల్) తగ్గించి మంచి కొలెస్ట్రాల్ పెంచుతాయి. అలాగే వీటిని మీ ఆహారంలో చేర్చుకోవడం వల్ల మీ లిపిడ్ ప్రొఫైల్‌ను మెరుగుపరుస్తుంది. గుండె జబ్బుల ప్రమాదాన్ని తగ్గిస్తుంది. అదేవిధంగా వీటిలో ఆల్ఫా లినోలెయిక్ ఆమ్లాలు కీళ్లనొప్పులు, ఆస్తమా మొదలైన సమస్యల వల్ల వచ్చే మంటను నివారిస్తుంది.

ప్రొటీన్‌ స్టోర్‌ హౌస్ : మీరు వెజిటేరియన్స్‌ అయితే అవిసె గింజలు మీకు సూపర్‌ ఫుడ్‌ అనే చెప్పాలి. వీటిలో ప్రొటీన్‌ పుష్కలంగా ఉంటుంది. అదేవిధంగా వీటిని గ్లూటెన్ ఫ్రీ అని చెప్పుకోవచ్చు. అవిసె గింజలతో ఇన్ని ఆరోగ్య ప్రయోజనాలున్నాయి కాబట్టి మీరు మీ డైట్​లో ఈ గింజలను తప్పనిసరిగా చేర్చుకొని ఈ బెనిఫిట్స్ పొందండని నిపుణులు సూచిస్తున్నారు.