మీ పిల్లలకు గాడిద పాలు తాగిస్తున్నారా? - లేదంటే చాలా కోల్పోతున్నట్టే! - Donkey Milk Good for Health or not

Donkey Milk Health Benefits : ఈ మధ్యకాలంలో గాడిద పాలు చాలా ప్రజాదరణ పొందాయి. ఆవు, బర్రె పాల కంటే వీటికి డిమాండ్ విపరీతంగా ఉంది. మరి.. గాడిద పాలకు ఎందుకంత డిమాండ్? దీనిపై నిపుణులు ఏం చెబుతున్నారు? అన్నది చూద్దాం.

Health Benefits of Donkey Milk : "గంగిగోవు పాలు గరిటెడైనను చాలు.. కడివెడైన నేమి ఖరము పాలు" అన్న పద్యం.. ఇప్పుడు రివర్స్ అయ్యింది. గరిటెడైనా చాలు ఖరము పాలు అను పాడుకుంటున్నారు! అవును.. గాడిద పాలకు ఫుల్ డిమాండ్ ఏర్పడింది. మరి, గాడిద(Donkey) పాలకు ఎందుకంత డిమాండ్ ఏర్పడింది? అవి తాగడం ఆరోగ్యానికి మంచిదేనా? ఆరోగ్య నిపుణులు ఏం చెబుతున్నారు? ఈ స్టోరీలో తెలుసుకుందాం.

గాడిద పాలకు అంతటి డిమాండ్ ఏర్పడడానికి ప్రధాన కారణం.. అందులో ఆరోగ్యానికి మేలు చేసే ఎన్నో జౌషధ గుణాలు ఉండడమే అంటున్నారు ఆరోగ్య నిపుణులు. అంతేకాదు.. వీటిలో చర్మ సౌందర్యానికి తోడ్పడే అనేక గుణాలున్నాయని చెబుతున్నారు. ఈ క్రమంలోనే అనేక రకాల బ్యూటీ ఉత్పత్తులలో గాడిద పాలను ఉపయోగిస్తున్నారట. అంతేకాదు.. ఆవు, గేదె, మేక, ఇతర పాడి జంతువుల పాలతో పోలిస్తే గాడిద పాలలో.. తల్లి పాలలో ఉండే పోషకాలు ఉన్నట్లు పలు పరిశోధనలు వెల్లడించాయి. అందుకే, మన పూర్వీకులూ పసిపిల్లలకు గాడిద పాలు తాగించడం వల్ల ఎలాంటి అనారోగ్య సమస్యలు రావని నమ్మేవారట.

అయితే, గాడిద పాలకు డిమాండ్ పెరగడానికి ఇవి మాత్రమే కాదు.. పాల ఉత్పత్తి మరో కారణంగా చెప్పుకోవచ్చంటున్నారు నిపుణులు. ఒక్కో గాడిద రోజుకు కేవలం 4 కప్పుల పాలను మాత్రమే ఇస్తుందట. అందుకే.. వీటి ధర ఎక్కువగా ఉంటుంది. ఇకపోతే.. గాడిద పాలు తాగడం వల్ల ఎలాంటి ఆరోగ్య ప్రయోజనాలు లభిస్తాయో ఇప్పుడు చూద్దాం.

• గాడిద పాలలో తల్లి పాలు, ఆవు పాలతో సమానమైన ప్రొటీన్లు, విటమిన్లు, ఖనిజాలు ఉంటాయట. అందుకే ఈ పాలు శిశువులకు పట్టించడం మంచివంటుంటారని నిపుణులు చెబుతున్నారు.
• ఈ పాలల్లో కొవ్వు తక్కువగా ఉంటుంది. కాబట్టి, ఇవి తాగడం వల్ల శరీరానికి లాక్టోస్ రూపంలో కావాల్సిన కేలరీలు అందుతాయంటున్నారు నిపుణులు.
• ఇన్ఫెక్షన్లూ, కోరింత దగ్గు, ఆర్థరైటిస్, వైరల్‌ జ్వరాలు, ఆస్తమా, గాయాలు నయం చేసేందుకు గాడిదపాలను మందుగా వాడుతుంటారని నిపుణులు సూచిస్తున్నారు.
• ముఖ్యంగా ఈ పాలలో యాంటీ మైక్రోబయాల్ లక్షణాలు అంటువ్యాధులు, బ్యాక్టీరియా, ఇతర వైరస్​లు సోకకుండా కాపాడతాయంటున్నారు.
• నిద్రలేమి, ఎసిడిటీతోపాటు ఎగ్జిమా, సిఫిలిస్‌, స్కాబిస్‌, దురద, తామర... వంటి ఇన్ఫెక్షన్లకి గాడిద పాలు మంచి ఔషధమని చెబుతున్నారు నిపుణులు.
• ముఖ్యంగా గాడిద పాలు.. రోగనిరోధక వ్యవస్థను బలోపేతం చేయడంలో చాలా బాగా సహాయపడతాయని నిపుణులంటున్నారు.
• అంతేకాదు.. ఇందులోని పోషకాలు రక్తపోటు తగ్గించడంలో ఉపయోగపడతాయట. అలాగే ఈ పాలలో ఉండే లాక్టోస్ ఎముకలను బలంగా మార్చడంలో సహాయపడుతుందని నిపుణులు సూచిస్తున్నారు.

• ఇకపోతే.. గాడిద పాలు ఆహార పదార్థంగా కంటే సౌందర్య సాధనంగా ఎక్కువ పనిచేస్తాయని నిపుణులంటున్నారు. ముఖ్యంగా ఈ పాలలో ఉండే ప్రొటీన్లు యాంటీఆక్సిడెంట్లుగా పనిచేసి చర్మ కణాలను ఆక్సీకరణ నష్టం నుంచి కాపాడడంలో చాలా బాగా సహాయపడతాయంటున్నారు.
• ఈ పాలతో స్నానం చేయడం వల్ల మృదువైన చర్మాన్ని సొంతం చేసుకోవచ్చని చెబుతున్నారు నిపుణులు.
• 2019లో "డెర్మటాలజీ రీసెర్చ్ అండ్ ప్రాక్టీస్" అనే జర్నల్​లో ప్రచురితమైన ఒక నివేదిక ప్రకారం.. గాడిద పాలలో చర్మానికి ప్రయోజనకరంగా ఉండే యాంటీఆక్సిడెంట్, యాంటీ-ఇన్ఫ్లమేటరీ లక్షణాలను కలిగి ఉన్నాయని వెల్లడైంది. ఈ పరిశోధనలో చైనాకు ప్రముఖ చర్మవాధి నిపుణులు డాక్టర్ షుయాంగ్ లి పాల్గొన్నారు. గాడిద పాలలో ఉండే పోషకాలు చర్మ కణాలకు హాని కలిగించే ఫ్రీ రాడికల్స్​ను అడ్డుకోవడంలో సహాయపడడమే కాకుండా చర్మ ఆరోగ్యానికి మేలు చేస్తాయని ఆయన పేర్కొన్నారు. అందుకే.. గాడిద పాలను సౌందర్య ఉత్పత్తులైన స్కిన్ క్రీములు, ఫేస్ మాస్క్‌లు, సబ్బులు, షాంపూల తయారీలో వాడుతున్నారన్నారు.

NOTE : ఇక్కడ మీకు అందించిన సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య, మానసిక నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.