Dangerous Things In Kitchen : ఆడవాళ్లు ఎక్కువ సమయం గడిపేది వంట గదిలోనే. వంట చేస్తూ, అంట్లు తోముతూ, శుభ్రం చేస్తూ ఇలా చాలా తమకున్న విలువైన సమయాన్ని చాలా వరకూ కిచెన్ లోనే గడపాల్సి వస్తుంది. దీంతో పాటు మీరు వండుకునే ఆహారంపై బ్యాక్టీరియా చేరకుండా సురక్షితంగా తాజాగా ఉండేందుకు కిచెన్ ను, వంట సామగ్రిని ఎప్పుడూ శుభ్రంగా ఉంచుకుంటారు. అయితే మీరు ఎంత శుభ్రం చేసినా మీకు తెలియకుండా చాలా బ్యాక్టీరియాను పోగు చేసుకుని హాని కలిగించే కొన్ని వస్తువులు మీ వంట గదిలో ఉన్నాయంటే మీరు నమ్ముతారా? అవేంటో తెలుసుకున్నాక నమ్మక తప్పదు లెండి!
స్పాంజీలు
కిచెన్లో నీళ్లు, పాలు వంటివి వలికిపోయినప్పుడు వెంటనే దాన్ని పీల్చుకోవడానికి స్పాంజీలను వాడుతుంటాం. ఇవి చాలా హానికరమైన బ్యాక్టీరియాలను పోగేసుకుంటాయట. వీటిని మీరు నీటితో ఎంత కడిగినా వాటి లోతుల్లో ఉండే క్రిములు అస్సలు బయటకు వెళ్లవట. కాబట్టి వాటిని కూడా చక్కగా సర్ఫ్ లిక్విడ్లో నానబెట్టి ఉతకడం, లేదా కాసేపు మెక్రోవేవ్లో ఉంచడం లాంటివి చేయాలట.
స్టవ్ బండ(కౌంటర్ టాప్స్)
మీ కిచెన్ లో మీరు అన్నింటికన్నా ఎక్కువగా ఉపయెగించేది ఇదే. మీరు వంట చేసేటప్పుడు, చేసిన తర్వాత వీటి మీద పడే ఆహార పదార్థాలు చాలా సార్లు రోజంతా అలాగే ఉంటాయి. అవి అలాగే పేరుకుపోతాయి. కాబట్టి ప్రతి సారి శానిటైజ్ చేయడం మర్చిపోకండి.
చపాతీ పీట
ప్రతి వంటగదిలోనూ తప్పకుండా వాడే చపాతీ పీట లేదా రోలింగ్ ప్యాడ్ను వాడిన తర్వాత శుభ్రం చేయడం తప్పనిసరి. ఇవి చెక్కతో తయారు చేసినవి కాబట్టి పిండి పదార్థాలు వీటిపై ఎక్కువ సేపు ఉంటే బ్యాక్టీరియాకు కారణమవుతాయి.
ఉప్పు డబ్బా
చాలా సార్లు కూరలో ఉప్పు తగ్గిందంటూ భోజనం మధ్యలోనే ఉప్పు డబ్బాను తెచ్చుకుని కలుపుకుంటూ ఉంటాం. అలాంటప్పుడు చేతుల నుంచి డబ్బాకు అంటుకున్న ఆహార పదార్థాలు హానికరమైన బ్యాక్టీరియాగా మారే అవకాశాలున్నాయి. కాబట్టి అంటిన వెంటనే వీటిని శుభ్రం చేసుకోవడం అలవాటు చేసుకొండి.
మైక్రోవేవ్
బ్యాక్టీరియా పోగు చేసుకునే ముఖ్యమైన వస్తువుల్లో ఒకటి మైక్రోవేవ్ అని చెప్పవచ్చు. ఇందులో గ్రీజు, ఆహార పదార్థాలు కలిసి క్రిములుగా మారి మీ వంటగదికి హాని చేస్తాయి. కాబట్టి రోజూ మైక్రోవేవ్ ను డిటర్జెంట్ లేదా వెనిగర్ తో శుభ్రం చేయాలి.
వాటర్ బాటిల్స్
వాటర్ బాటిల్స్ను ప్రతి రోజూ వాడుతుంటాం. కానీ వాటిని అలాగే రోజూ శుభ్రం చేస్తున్నారా? చేయకపోతే అవి చాలా హానికరమైన బ్యాక్టీరియాలకు నిలయంగా మారతాయి. కాబట్టి మీరు వాడే వాటర్ బాటిల్లను వేడి నీళ్లు, సబ్బుతో చక్కగా కడుక్కుంటూ ఉండాలి.
కట్టింగ్ బోర్డులు
కట్టింగ్ బోర్డులు లేదా చాపింగ్ ప్యాడ్స్ అనేవి చాలా బ్యాక్టీరియాను పోగేసుకునే అవకాశాలు ఉన్నాయి. ఎందుకంటే వీటి పైనే పండ్లు, కూరగాయలు, పచ్చి మాంసం లాంటి వాటిని కట్ చేస్తుంటాం. వీటి ఉపయెగం తర్వాత వీటిని సబ్బుతో తప్పకుండా కడగాలి.
సింక్
వంట గది సింక్ లో బ్యాక్టీరియా క్రిముల సంతానోత్పత్తికి మూలం. దాన్ని క్రమ తప్పకుండా శుభ్రం చేయకపోతే చాలా అనారోగ్య సమస్యలను తెచ్చుకున్న వారవుతారు. వెనిగర్ లేదా వేడి నీళ్లు, డిటర్జెంట్ తో సింక్ ను తరచుగా కడుగుతూ ఉండాలి.
కిచెన్ టవల్స్
డిష్ టవల్స్, డిష్ క్లాత్స్ మీద చాలా రకాల ఆహారాలను అంటుకుని ఉంటాయి. వీటి పదే పదే ఉపయోగిస్తూ ఉండటం వల్ల బ్యాక్టీరియాకు ఇది అనువైన ప్రదేశం. కాబట్టి టవల్స్ను ఉతకడం, మార్చుకోవడం మర్చిపోకండి.
