Kanagna Ranaut Emergency Release Date : బాలీవుడ్ స్టార్ హీరోయిన్ కంగనా రనౌత్ సొంత బ్యానర్పై తెరకెక్కిస్తున్న లేటెస్ట్ మూవీ 'ఎమర్జెన్సీ'. ఇండియన్ ఐరన్ లేడీ ఇందిరా గాంధీ జీవిత కథ ఆధారంగా ఈ సినిమా తెరకెక్కుతోంది. అయితే ఈ మూవీ రిలీజ్పై మేకర్స్ ఓ అప్డేట్ ఇచ్చారు. ఈ ఏడాది జూన్ 14న ఈ మూవీ థియేటర్లలోకి రానున్నట్లు ప్రకటించారు. దీంతో పాటు 'ఎమర్జెన్సీ' మూవీకి సంబంధించిన కొత్త పోస్టర్ను కూడా విడుదల చేశారు. ఇందులో కంగనా అచ్చుగుద్దినట్లు ఇందిరలా కనిపించేలా మేకర్స్ చూపించారు. 1975 నాటి ఎమర్జెన్సీ వాతావరణాన్ని కళ్ళకు కట్టినట్టు చూపిస్తున్నట్లు పోస్టర్స్ చూస్తే అర్థమవుతోంది. ఇక ఈ చిత్రంలో కంగనాతో పాటు బాలీవుడ్ విలక్షణ నటుడు అనుపమ్ ఖేర్, నటి మహిమా చౌదరి, సీనియర్ స్టార్ శ్రేయాస్ తల్పాడే తదితరులు కీలక పాత్రల్లో నటించారు. జీ స్టూడియోస్ సంస్థ, మణికర్ణిక ఫిల్మ్స్ సంయుక్తంగా ఈ చిత్రానికి నిర్మాణ బాధ్యతలు చేపడుతోంది. గతంలో దివంగత తమిళనాడు మాజీ ముఖ్యమంత్రి జయలలిత జీవిత కథ ఆధారంగా 'తలైవీ' అనే సినిమాను తెరకెక్కించగా, అందులో కంగనా జయలలిత పాత్రలో కనిపించి మంచి గుర్తింపు పొందారు.
Kangana Ranaut Latest Movies : కంగనా రనౌత్ ఇప్పటికే ఎన్నో ప్రయోగాత్మక క్యారెక్టర్లలో మెరిసి ప్రేక్షకులను ఆకట్టుకున్నారు. పలు లేడీ ఓరియెంటెడ్ సినిమాల్లోనూ ఆమె నటించి మెప్పించారు. ఇటీవలే ఆమె లీడ్ రోల్లో 'తేజస్' అనే సినిమా థియేటర్లలోకి వచ్చింది. ఇందులో ఆమె యుద్ధ విమానాన్ని నడిపే ఓ ఫైటర్గా కనిపించారు. భారీ బడ్జెట్తో విడుదలైన ఆ మూవీ ఆశించిన స్థాయిలో హిట్ టాక్ అందుకోలేకపోయింది. అయినప్పటికీ కంగనా నటనకు మంచి మార్కులు పడ్డాయి. అంతకుముందు వచ్చిన 'చంద్రముఖి-2' కూడా కంగనాకు మంచి హిట్ను ఇవ్వలేకపోయింది. దీంతో ఎమెర్జెన్సీపైనే కంగనా ఫ్యాన్స్ బోలెడు ఆశలు పెట్టుకున్నారు. ఈ మూవీ సక్సెస్ సాధించి కంగనాకు బ్రేక్ ఇవ్వాలని ఆశిస్తున్నారు.
