నా మాటలను వేరేలా అర్థం చేసుకున్నారు- అసలు ఉద్దేశం అది కాదు: కమల్ - Kamal Haasan Indian 2

Kamal Haasan Indian 2 : 'ఇండియన్​ 2' సినిమాపై తాజాగా తాను చేసిన కామెంట్స్​ను ఆడియెన్స్ మరోలా అర్థం చేసుకున్నారంటూ స్టార్ హీరో కమల్​ హాసన్ ఆవేదన వ్యక్తం చేశారు. తనకు ఆ ఉద్దేశం లేదంటూ క్లారిటీ ఇచ్చారు.

Kamal Haasan Indian 2 : లోకనాయకుడు కమల్​హాసన్ ప్రస్తుతం 'ఇండియన్ 2' ప్రమోషన్స్​లో యాక్టివ్​గా పాల్గొంటున్నారు. ఇందు కోసం ఇండియాలోనే కాకుండా ఓవర్సీస్​లోనూ మూవీటీమ్​తో పాటు ప్రచారాన్ని జోరుగా చేస్తున్నారు.

ఈ నేపథ్యంలో తాజాగా చెన్నై విలేకరులతో ముచ్చటించిన కమల్​, సోషల్ మీడియాలో తన గురించి జరుగుతున్న ఓ చర్చపై స్పందించారు. 'ఇండియన్​ 2' విషయంలో తాను చేసిన ఓ కామెంట్​ను నెటిజన్లు మరోలా అర్థం చేసుకున్నారంటూ ఆవేదన వ్యక్తం చేశారు. ఆ మాటలు అనడం వెనక వేరే ఉద్దేశం ఉందంటూ చెప్పుకొచ్చారు.

"నేను చెప్పిన విషయాన్ని కొందరు నెటిజన్లు మరోలా అర్థం చేసుకున్నారు. భారతీయుడు రెండో పార్ట్‌ కంటే నాకు మూడో పార్ట్‌ బాగా నచ్చిందంటూ చెప్పా. అలా అని రెండో భాగం బాలేదని దాని ఉద్దేశం కాదు. సాంబారు, రసంతో కూడిన భోజనాన్ని మనం ఇష్టంగా తింటాం. పాయసం ఉంటే మరింత ఆసక్తి చూపిస్తాం కదా. అలానే పలు అంశాల్లో భారతీయుడు మూడో భాగం నన్ను ఎంతగానో ఆకట్టుకుంది. నా కెరీర్‌లో ఈ సినిమా కోసమే ఎక్కువ శ్రమించాను. సుమారు ఆరేళ్లపాటు ఎన్నో సవాళ్లను ఎదుర్కొన్నాం. కొవిడ్‌/లాక్‌డౌన్‌, సెట్స్‌లో ప్రమాదం, అనారోగ్యం కారణంగా కొందరు స్టార్స్​ మరణం. ఇలా పలు ఊహించని ఘటనలు జరిగాయి. సేనాపతి క్యారెక్టర్‌కు సంబంధించి వేసుకునే దుస్తులు నుంచి వాడే పెన్ను వరకు అన్నింటి విషయంలో డైరెక్టర్ శంకర్‌ చాలా జాగ్రత్తలు తీసుకున్నారు" అంటూ కమల్ ఆ ప్రెస్​ మీట్​లో క్లారిటీ ఇచ్చారు.

ఇంతకీ ఏం జరిగిందంటే?
'ఇండియన్​ 2' ప్రమోషన్స్​లో భాగంగా ఇటీవలే సింగపూర్ వెళ్లారు కమల్. అక్కడ అభిమానులతో పాటు విలేకరులతో కాసేపు ముచ్చటించారు. ఆ సమయంలో ఆయన ఈ సినిమా గురించి పలు ఇంట్రెస్టింగ్ విషయాలు చెప్పారు. అయితే తనకు 'భారతీయుడు 2' కంటే 'భారతీయుడు 3' ఎక్కువగా నచ్చిందని చెప్పారు. ఈ మాటను కొందరు నెటిజన్లు మరోలా అర్థం చేసుకున్నారు. దీంతో 'భారతీయుడు 2' బాగోదేమో అంటూ సోషల్ మీడియాలో రచ్చ రచ్చ చేశారు. ఈ నేపథ్యంలోనే కమల్ స్పందించారు.