హేమ కమిటీ రిపోర్ట్ ఎఫెక్ట్ - ప్రముఖ యాక్టర్​పై రేప్​ కేసు నమోదు - Hema Committee Report

Hema Committee Report Malayalam Actor Mukesh Rape Case : మలయాళ చిత్ర పరిశ్రమలో మహిళల స్థితిగతులపై జస్టిస్‌ హేమ కమిటీ సమర్పించిన నివేదిక వివాదస్పదంగా మారిన సంగతి తెలిసిందే. ఈ నేపథ్యంలో కేరళకు చెందిన ప్రముఖ యాక్టర్​, అధికార పార్టీ CPI(M) ఎమ్మెల్యే ఎమ్ ముకేశ్​పై రేప్​ కేసు నమోదైంది. పూర్తి వివరాలు స్టోరీలో.

Hema Committee Report Malayalam Actor Mukesh Rape Case : మలయాళ చిత్ర పరిశ్రమలో మహిళల స్థితిగతులపై జస్టిస్‌ హేమ కమిటీ సమర్పించిన నివేదికలో పలు దిగ్భ్రాంతికర విషయాలు వెలుగు చూసిన సంగతి తెలిసిందే. ఈ నివేదిక వల్ల ఇప్పటి వరకు లైంగిక వేధింపుల ఆరోపణలకు సంబంధించి 17 కేసుల వరకు నమోదయ్యాయని తెలిసింది. అయితే తాజాగా మరో కేసు నమోదైంది.

కేరళకు చెందిన ప్రముఖ యాక్టర్​, అధికార పార్టీ CPI(M) ఎమ్మెల్యే ఎమ్ ముకేశ్​పై రేప్​ కేసును నమోదు చేశారు పోలీసులు. కొన్నేళ్ల క్రితం తనను ముకేశ్​ లైంగిక వేధించాడంటూ ఓ నటి ఇచ్చిన ఆరోపణలు మేరకు కేసును రిజిస్టర్​ చేసినట్లు అధికారులు తెలిపారు.

కొచి నగరంలోని మారడు పోలీస్​ స్టేషన్​లో ఐపీసి 376(రేప్​) సెక్షన్​ కింద ఎఫ్​ఐఆర్​ నమోదు చేసినట్లు ఓ పోలీస్ అధికారి తెలిపారు. భారతీయ న్యాయ సంహిత(బీఎన్​ఎస్​) అమల్లోకి రాకముందే ఈ సంఘటన జరిగినందున ఐపీసీ కింద కేసు నమోదు చేసినట్లు ఆ అధికారి పేర్కొన్నారు. హేమ కమిటీ రిపోర్ట్​ వెలువరించిన తర్వాత మలయాళ ఇండస్ట్రీలో నమోదైన మూడో హై ప్రొఫైల్​ కేసు​ ఇది.

ఇంకా నటులు జయసూర్య, మణియం పిళ్ల రాజుపై కూడా కేసులు నమోదు చేశారు పోలీసులు. ఫోర్ట్ కొచి పోలీస్ స్టేషన్​లో సెక్షన్ 354 కింద రాజుపై కేసు రిజిస్టర్​ చేశారు. ఈ విషయాన్ని ఎర్నాకులంకు చెందిన ఓ సీనియర్ పోలీస్ ఆఫీసర్ తెలిపారు. ఇదే సెక్షన్ కింద జయసూర్యపై కేసు రిజిస్టర్ అయినట్లు తిరువంతపురంలోని ఓ పోలీస్​ అధికారి చెప్పారు.

రిజిస్టర్ అయిన మరో రెండు రేపు కేసులు ఇవే - అంతకుముందు తిరువంతపురం మ్యూజియమ్ పోలీసులు నటుడు సిద్ధిఖీపై రేప్ కేసు నమోదు చేశారు. ఆయన ఎనిమిదేళ్ల క్రితం హోటల్​లో ఓ నటిపై అత్యాచారానికి పాల్పడినట్లు వచ్చిన ఆరోపణల వల్ల ఈ కేసును రిజిస్టర్​ చేశారు.

అలానే దర్శకుడు రంజిత్​పై కూడా పశ్చిమ బంగాకు చెందిన ఓ నటి ఆరోపణలు చేసింది. ఆయన తనను అసభ్యకరంగా తాకారని ఫిర్యాదు చేసింది. 2009లో ఈ సంఘటన జరిగినట్లు చెప్పింది. దీంతో ఆయనపై కూడా రేప్​ కేసు నమోదు చేశారు.

అలా మలయాళ ఇండస్ట్రీలో ముగ్గురు ప్రముఖులపై రేప్​ కేసు నమోదైంది. ఈ ఆరోపణల వల్ల కేరళ చలన చిత్ర అకాడమీ ఛైర్మన్​గా ఉన్న రంజిత్​ తన పదవికి రాజీనామా చేశారు. సిద్ధిఖీ కూడా 'AMMA' జనరల్ సెక్రెటరీ పదవికి రిజైన్ చేశారు.