Director Surya Kiran Passed Away : ప్రముఖ నటుడు, దర్శకుడు, రచయిత సూర్యకిరణ్ కన్నుమూశారు. గత కొద్ది రోజులుగా అనారోగ్యంతో బాధపడుతున్న ఆయన చెన్నైలోని ఓ ఆస్పత్రిలో చికిత్స పొందుతూ సోమవారం తుదిశ్వాస విడిచారు. అయితే సూర్యకిరణ్ మృతికి పచ్చ కామెర్ల వ్యాధే కారణమని తెలుస్తోంది. సూర్యకిరణ్ మృతి పట్ల ఇటు తెలుగు చిత్రపరిశ్రమతో పాటు మిగతా సౌత్ ఇండస్ట్రీస్ పెద్దలు కూడా దిగ్భ్రాంతి వ్యక్తం చేస్తున్నారు.
నంది అవార్డులు సొంతం
తెలుగులో అక్కినేని నాగార్జున నిర్మాతగా, సుమంత్‌ హీరోగా నటించిన 'సత్యం'తో దర్శకుడిగా మంచి పేరు తెచ్చుకున్నారు సూర్యకిరణ్. ఈ మూవీ ఇద్దరి కెరీర్‌కు ఎంతో ఉపయోగపడింది. సూర్యకిరణ్ 'మాస్టర్‌' సురేశ్ పేరుతో 200లకు పైగా చిత్రాల్లో చైల్డ్ ఆర్టిస్ట్గా యాక్ట్ చేశారు. ఆ తర్వాత సహాయ నటుడిగానూ పలు సినిమాల్లో నటించారు. కొన్ని చిత్రాలకు రచయితగానూ పనిచేశారు. బాలనటుడిగా కేంద్ర ప్రభుత్వం నుంచి రెండు అవార్డులను సైతం సొంతం చేసుకున్నారు సూర్యకిరణ్.
రాష్ట్ర ప్రభుత్వం అందించే నంది అవార్డులను కూడా దర్శకుడిగా రెండు సార్లు అందుకున్నారు. 'సత్యం' తర్వాత 'ధన 51', 'బ్రహ్మాస్త్రం, 'రాజు భాయ్‌', 'చాప్టర్‌-6', 'నీలిమలై' చిత్రాలకు దర్శకత్వం వహించారు సూర్యకిరణ్. తెలుగు బిగ్‌బాస్‌ సీజన్‌-4లోనూ కంటెస్టెంట్‌గా పోటీపడ్డారు. కానీ, మొదటి వారంలోనే హౌస్ నుంచి ఎలిమినేట్ అయ్యారు. ఇక కథానాయిక కల్యాణిని ఆయన ప్రేమించి వివాహం చేసుకున్నారు. ఆ తర్వాత వ్యక్తిగత కారణాలతో ఇద్దరూ విడిపోయారు.
సూర్యకిరణ్ కెరీర్ ఇలా
కేరళకు చెందిన సూర్యకిరణ్ మలయాళ సినిమాలతో తన కెరీర్‌ని మొదలుపెట్టారు. తన నటనతో అక్కడి ప్రేక్షకుల మదిలో మంచి స్థానాన్ని సంపాదించుకున్నారు. 1978లో వచ్చిన 'స్నేహిక్కన్‌ ఓరు పెన్ను' చిత్రంతోనే సిల్వర్ స్క్రీన్పై అడుగుపెట్టారు. ఇలా మలయాళంలో మంచి సినిమాలు చేసుకుంటూ అటు కన్నడ, ఇటు తమిళంలోనూ ఎంట్రీ ఇచ్చారు.
ఇక తెలుగులో మాత్రం 1986లో చిరంజీవి హీరోగా వచ్చిన 'రాక్షసుడు' సినిమాతో టాలీవుడ్లో తన డెబ్యూ ఇచ్చారు. ఇలా 'దొంగమొగుడు', 'సంకీర్తన', 'ఖైదీ నెం.786', 'కొండవీటి దొంగ' లాంటి తెలుగు సినిమాల్లో కీలక పాత్రల్లో నటించి తనకంటూ ప్రేక్షకుల్లో ఓ మంచి క్రేజ్ను క్రియేట్ చేసుకున్నారు. మెగాస్టార్తోనే కాకుండా సూపర్స్టార్ రజనీకాంత్, కమల్హాసన్, అమితాబ్ బచ్చన్ వంటి బడా హీరోలతోనూ నటించారు సూర్యకిరణ్.
ఓటీటీలో 'హనుమాన్‌'- ఈ వారం థియేటర్లో చిన్న చిత్రాలదే హవా
ఆస్కార్ వేదికపై మరోసారి 'నాటు నాటు'- టాలీవుడ్ రేంజ్ అట్లుంటది మరి
