హెల్త్ ఇన్సూరెన్స్​ ప్రీమియం భారం తగ్గించుకోవాలా? 'టాపప్'​ చేసే ముందు ఇవి తెలుసుకోవడం మస్ట్! - Health Insurance Top Up Plans

Health Insurance Top Up Plans Benefits : పెరుగుతున్న వైద్య చికిత్సల ఖర్చులు సామాన్యులకు భారంగా మారుతున్నాయి. ఈ ఖర్చులను తట్టుకునేందుకు చాలా మంది ఆరోగ్య బీమా పాలసీల వైపు మొగ్గుచూపుతున్నారు. అయితే బేసిక్​ పాలసీని తీసుకుని, దానికి టాపప్​ చేయిస్తే చాలా ప్రయోజనాలు పొందొచ్చు. ప్రీమియంల భారం కూడా కొంత తగ్గుతుంది. అయితే హెల్త్​ ఇన్సూరెన్స్​కు టాపప్​ చేయించే ముందు ఏయే అంశాలను పరిగణలోకి తీసుకోవాలో ఇప్పుడు తెలుసుకుందాం.

Health Insurance Top Up Plans Benefits : వైద్య రంగంలో చికిత్సల ధరల పెరుగుదల ఆందోళన కలిగిస్తుంది. బీమా ప్రీమియం రేట్లు సామాన్యుడిని కలవరపెడుతున్నాయి. ఈ నేపథ్యంలో సామాన్య మధ్యతరగతి ప్రజలు ఇప్పుడిప్పుడే వైద్య ఖర్చుల కోసం బీమా పాలసీల వైపు అడుగులు వేస్తున్నారు. ప్రాథమిక పాలసీని తీసుకుంటున్నారు. అలాంటివారు ఉన్న పాలసీకే టాపప్‌ చేయించడం వల్ల కొంత భారాన్ని తగ్గించుకునే అవకాశం ఉంది. టాపప్‌ను ఎంచుకునేటప్పుడు ఈ అంశాలను పరిగణలోకి తీసుకోవాలి.

టాపప్‌ పాలసీలు ఎందుకంటే?
ఆరోగ్య బీమా పరిమితికి మించి అదనంగా ఖర్చయినప్పుడు, టాపప్‌ పాలసీలు ఆ అధిక మొత్తాన్ని చెల్లిస్తాయి. తక్కువ ప్రీమియంతో ఎక్కువ ఆరోగ్య బీమా రక్షణ పొందాలనుకున్నప్పుడు టాపప్‌ పాలసీలు ఎంచుకోవాల్సి ఉంటుంది.

అప్పుడే స్పష్టత వస్తోంది
టాపప్‌ పాలసీని ఎంచుకోవాల్సినప్పుడు ప్రస్తుతానికి మీ దగ్గర ఉన్న ప్రాథమిక పాలసీ ఎంత విలువ చేస్తుందో చూసుకోవాలి. దాని ఉన్న నిబంధనలూ చూసుకోండి. పాలసీ తగ్గింపులు, ఇతర చెల్లింపులు, పరిమితుల్లాంటివి స్పష్టంగా తెలుసుకోండి. అప్పుడే టాపప్‌ పాలసీని ఎంచుకునేటప్పుడు ఏయే ఖర్చులకు వర్తించేలా తీసుకోవచ్చనే విషయమై స్పష్టత వస్తుంది.

మీ పాలసీని బట్టి టాపప్
మీ ప్రాథమిక పాలసీ కనీసం రూ.5లక్షల మేరకు ఉండేలా చూసుకోవాలి. ఆ తర్వాతే టాపప్‌ పాలసీని తీసుకునేందుకు ప్రయత్నించాలి. ఈ పాలసీలు ఎలాంటి పరిమితి లేకుండా ఎంచుకునే అవకాశం ఉంది. కాబట్టి, ఎంత మేరకు ప్రీమియం చెల్లించడానికి ఇబ్బంది ఉండదో చూసుకోండి. దాన్ని బట్టి, టాపప్‌ చేయండి.

నగదు రహిత చికిత్స
నగదు రహిత చికిత్స కోసం బీమా సంస్థలు ఆయా ఆసుపత్రులతో అగ్రిమెంట్లు చేసుకుంటాయి. టాపప్‌ పాలసీల విషయంలోనూ ఇదే వర్తిస్తుంది. కొన్ని టాపప్‌ పాలసీలు నగదు రహిత చికిత్సకు అనుమతి ఇవ్వకపోవచ్చు. వైద్యానికి అయిన బిల్లు చెల్లించిన తర్వాత, ఆ ఖర్చులను తిరిగి పొందేందుకు దరఖాస్తు చేసుకోవాల్సి ఉంటుంది. వీలైనంత వరకూ నగదు రహిత చికిత్సకు అనుమతినిచ్చే ఆరోగ్య బీమా టాపప్‌ పాలసీలను తీసుకోవడం ఉత్తమం.

షరతులు వర్తిస్తాయి
ప్రాథమిక పాలసీలో కొన్ని షరతులు ఉంటాయి. ముఖ్యంగా వెయిటింగ్ టైం, నిర్ణీత వ్యాధులకు శాశ్వత మినహాయింపులాంటి నిబంధనలు ఉండొచ్చు. టాపప్‌ పాలసీల్లో కూడా ఇలాంటివి ఉంటాయి. పరిమితులు, కండిషన్స్ అర్థం చేసుకునేందుకు పాలసీ పత్రాలను జాగ్రత్తగా పరిశీలించండి. మీ ఆరోగ్య అవసరాలకు తగిన పాలసీని ఎంచుకోవడం తప్పనిసరి.

బెస్ట్ క్లెయిమ్ సెటిల్‌మెంట్ రేషియో
క్లెయిం పరిష్కారాలు ఎలా ఉన్నాయో, ముందే బీమా సంస్థను అడిగి తెలుసుకోండి. గత చరిత్రను పరిశీలించండి. కంపెనీ సర్వీస్ సెంటర్​ల పనితీరు, క్లెయింల నిర్వహణ ప్రక్రియను అంచనా వేయండి. టాపప్‌ పాలసీలకు చెల్లించిన ప్రీమియానికీ ఆదాయపు పన్ను చట్టం సెక్షన్‌ 80డీ కింద పన్ను మినహాయింపు లభిస్తుందనే విషయాన్ని గుర్తుంచుకోండి.