దేశంలోని నంబర్-1 కంపెనీగా TCS - బెస్ట్ సిటీగా బెంగళూరు - హైదరాబాద్ పరిస్థితి ఏమిటంటే? - TCS Leads LinkedIn Top Rankings

TCS Leads LinkedIn Top Rankings 2024 : లింక్డ్​ఇన్​ విడుదల చేసిన 2024 టాప్​ కంపెనీస్​ లిస్ట్​లో టీసీఎస్​ అగ్రస్థానంలో నిలిచింది. యాక్సెంచర్, కాగ్నిజెంట్ వరుసగా 2,3 స్థానాల్లో ఉన్నాయి.

TCS Leads LinkedIn Top Rankings 2024 : ప్రొఫెషనల్ నెట్​వర్కింగ్ ప్లాట్​ఫాం లింక్డ్​ఇన్​ విడుదల చేసిన 2024 టాప్​ కంపెనీస్​ లిస్ట్​లో దేశీయ టెక్ దిగ్గజం 'టాటా కన్సల్టెన్సీ సర్వీసెస్​' (టీసీఎస్​) అగ్రస్థానంలో నిలిచింది. రెండో స్థానంలో యాక్సెంచర్​, మూడో స్థానంలో కాగ్నిజెంట్​ ఉన్నాయి. ఈ విధంగా దేశంలోని అగ్రగామి సంస్థల్లో టాప్​-3 ర్యాంక్​లను​ ఐటీ కంపెనీలే సొంతం చేసుకున్నాయి.

ప్రొఫెషనల్ నెట్​వర్కింగ్ ప్లాట్​ఫాం లింక్డ్​ఇన్​ మంగళవారం 2024 టాప్​ కంపెనీల జాబితా విడుదల చేసింది. ఇందులే టాప్​-3 ర్యాంక్స్ ఐటీ కంపెనీలు సొంతం చేసుకున్నాయి. అయితే జాబితాలోని 25 లార్జ్​ కంపెనీల్లో ఆర్థిక సేవలు (ఫైనాన్సియల్ సర్వీసెస్)​ అందించే సంస్థలే 9 ఉన్నాయి. అంటే ఫైనాన్సియల్ సర్వీసెస్ సంస్థలే స్పష్టమైన ఆధిపత్యాన్ని ప్రదర్శించాయి.

లింక్డ్ ఇన్​ విడుదల చేసిన 8వ ఎడిషన్ ఇది. ఇందులో 25 పెద్ద కంపెనీలు, 15 బెస్ట్ మిడ్​-సైజ్​​ కంపెనీలు ఉన్నాయి. ఇన్​-డిమాండ్​ స్కిల్స్​, టాప్​ లొకేషన్స్​, జాబ్​ ఫంక్షన్స్​ ఆధారంగా ఈ జాబితాను రూపొందించింది లింక్డ్​ఇన్​. అలాగే కెరీర్​ పురోగతికి అవసరైన ఎనిమిది అంశాలను ఆధారంగా చేసుకుని ఈ టాప్​ కంపెనీల జాబితాను రూపొందించింది. అవి ఏమిటంటే​? సామర్థ్యం, నైపుణ్యాల పెరుగుదల, కంపెనీ స్థిరత్వం, లింగ వైవిధ్యం, విద్యా నేపథ్యం, ఉద్యోగుల ఉనికి, ఎక్స్​టర్నల్ ఆపర్చ్యూనిటీస్​, కంపెనీ అఫినిటీ.

టాప్​ - లార్జ్ కంపెనీస్

• ఇండియాలో 500+ ఉద్యోగులు ఉన్న పెద్ద కంపెనీల్లో టీసీఎస్​ తన అగ్రస్థానాన్ని నిలుపుకుంది. యాక్సెంచర్​, కాగ్నిజెంట్​ వరుసగా 2,3 స్థానాల్లో ఉన్నాయి.
• ఫైనాన్సియల్ సర్వీసెస్ కంపెనీలైన మ్యాక్​క్వేరీ గ్రూప్ (4వ స్థానం), మెర్గాన్​ స్టాన్లీ (5వ స్థానం), జేపీ మోర్గాన్​ చేజ్​ అండ్ కో (6వ స్థానం)లో ఉన్నాయి.

టాప్​ - మిడ్​-సైజ్​ కంపెనీస్​
250 నుంచి 500 ఉద్యోగులు ఉన్న మిడ్​-సైజ్ కంపెనీల్లో 'సాఫ్ట్​వేర్-యూజ్​-ఏ-సర్వీస్'​ (SaaS) ప్లాట్​ఫామ్​ 'లెంట్రా' ప్రథమ స్థానంలో నిలిచింది. ఇండియన్ ఆన్​లైన్ ట్రావెల్ ప్లాట్​ఫాం 'మేక్​ మై ట్రిప్​' రెండో స్థానంలో నిలిచింది. ఈ జాబితాలో ఫ్యాషన్ అండ్ బ్యూటీ రిటైలర్​ 'నైకా', ఫాంటసీ స్పోర్ట్స్ ప్లాట్​ఫామ్​ 'డ్రీమ్ 11' కూడా ఉన్నాయి.

ఇన్​-డిమాండ్ స్కిల్స్​
ఆర్థిక సేవల రంగంలోని అగ్రశ్రేణి కంపెనీలు మూలధన మార్కెట్లు, ఇన్వెస్ట్​మెంట్ బ్యాంకింగ్​, పెట్టుబడిదారుల సంబంధాలు లాంటి ఇన్​-డిమాండ్​ స్కిల్స్​ కోసం వెతుకుతున్నాయి.

టెక్నాలజీ రంగంలోని కంపెనీలు ప్రధానంగా ఎంటర్​ప్రైజ్​ సాఫ్ట్​వేర్​, డేటా స్టోరేజ్ టెక్నాలజీ, సాఫ్ట్​వేర్​ డెవలప్​మెంట్​ లైఫ్ సైకిల్​ (ఎస్​డీఎల్​సీ), ఆర్టిఫీషియల్ ఇంటెలిజెన్స్​ (ఏఐ) నైపుణ్యాల కోసం చూస్తున్నాయి. రెవెన్యూ అనాలసిస్​, నాన్​-ప్రాఫిట్​ మేనేజ్​మెంట్, మొబైల్ అప్లికేషన్​ డెవలప్​మెంట్ లాంటి నైపుణ్యాలకు కూడా డిమాండ్ పెరుగుతోంది.

అగ్రస్థానంలో బెంగళూరు
ఇండియన్ సిలికాన్ వ్యాలీగా పేరు పొందిన బెంగళూరులో అగ్రగామి టెక్ కంపెనీలు ఉన్నాయి. ఇవి ప్రతిభావంతులైన యువతీ, యువకులను నియమించుకుంటున్నాయి. బెంగళూరు తరువాత స్థానాల్లో హైదరాబాద్​, ముంబయి మెట్రోపాలిటన్ రీజియన్, పుణె ఉన్నాయి.