ICICI Credit Card Block : మీరు ఐసీఐసీఐ బ్యాంక్ కస్టమర్లా? కొత్తగా క్రెడిట్ కార్డుల కోసం అప్లై చేసుకున్నారా? అయితే ఇది మీ కోసమే. సాంకేతిక లోపం వల్ల దాదాపు 17 వేల క్రెడిట్ కార్డులను బ్లాక్ చేసినట్లు ఐసీఐసీఐ బ్యాంక్ తెలిపింది. క్రెడిట్ కార్డులు డిజిటల్‌ మాధ్యమాల్లో పొరపాటున ఇతరుల ఖాతాలకు అనుసంధానమైనట్లు పేర్కొంది. అయితే, దీనిని వెంటనే సవరించినట్లు స్పష్టం చేసింది. అయితే ఇప్పటి వరకు డేటాను దుర్వినియోగపర్చినట్లు తమకు ఎలాంటి సమాచారం అందలేదని తెలిపింది. ఎవరైనా ఆర్థికంగా నష్టపోతే, కచ్చితంగా పరిహారం చెల్లిస్తామని ఐసీఐసీఐ బ్యాంక్ హామీ ఇచ్చింది.
ఇంతకూ ఏమైంది!
బ్యాంకు అధికార ప్రతినిధి తెలిపిన వివరాల ప్రకారం, ఇప్పటికే ఉన్న కస్టమర్ ఖాతాలకు, కొత్త క్రెడిట్ కార్డ్‌లు తప్పుగా అనుసంధానం అయ్యాయి. అంటే ఇప్పటికే ఉన్న కస్టమర్లు, మరొకరి కోసం ఉద్దేశించిన కొత్త క్రెడిట్ కార్డ్ల వివరాలు ఆన్లైన్లో చూడగలిగారు. ఆన్‌లైన్ బ్యాంకింగ్ పోర్టల్‌లోకి లాగిన్ కాగానే, తాము అసలు దరఖాస్తు చేయకున్నా, కొత్త కార్డ్ వివరాలు కనిపించాయని పలువురు ఖాతాదారులు సోషల్ మీడియా ద్వారా వెల్లడించారు. వాస్తవానికి బుధవారం సాయంత్రం నుంచే ఈ సమస్య సామాజిక మాధ్యమాల ద్వారా వెలుగులోకి వచ్చింది. దీనిని ఐసీఐసీఐ బ్యాంకు గురువారం ధ్రువీకరించింది.
ఓటీపీ ఉండగా
సాంకేతిక లోపాల వల్ల ఐసీఐసీఐ క్రెడిట్ కార్డు పూర్తి సంఖ్య, సీవీవీ వంటి వివరాలను యూజర్లు కాకుండా, ఇతరులు చూడగలిగారు. అందువల్ల వారు సదరు క్రెడిట్ కార్డులను దుర్వినియోగపర్చి మోసపూరిత లావాదేవీలు జరిపే అవకాశం ఉంది. అయితే, ఓటీపీ లేకుండా ట్రాన్సాక్షన్స్ చేయడం కుదరదని బ్యాంకింగ్ నిపుణులు చెబుతున్నారు.
కార్డులన్నీ బ్లాక్ - పరిహారం పొందండిలా!
ప్రభావితమైన కొత్త క్రెడిట్ కార్డులు అన్నింటినీ బ్లాక్ చేసినట్లు ఐసీఐసీఐ బ్యాంక్ వెల్లడించింది. కొత్త యూజర్లకు మరోసారి కార్డులు జారీ చేస్తామని హామీ ఇచ్చింది. ఇప్పటి వరకు క్రెడిట్ కార్డ్ సమాచారం దుర్వినియోగమైన ఘటనలు తమ దృష్టికి రాలేదని తెలిపింది. కస్టమర్లు ఏ మాత్రం చింతించాల్సిన అవసరం లేదని, ఎలాంటి నష్టం జరిగినా కచ్చితంగా పరిహారం చెల్లించే బాధ్యత తమదేనని ఐసీఐసీఐ బ్యాంక్ హామీ ఇచ్చింది. కనుక ఎవరైనా కస్టమర్లు ఆర్థికంగా నష్టపోతే, వెంటనే బ్యాంకుకు తెలియజేసి, నష్టానికి తగిన పరిహారం పొందవచ్చు.
ఆర్‌బీఐ ఆంక్షలు!
ఆర్‌బీఐ - బ్యాంకుల డేటా సెక్యూరిటీ లోపాలపై కఠినంగా వ్యవహరిస్తున్న విషయం తెలిసిందే. ఇటీవలే కోటక్‌ మహీంద్రా బ్యాంకుపై కూడా తీవ్రమైన ఆంక్షలు విధించింది. కొత్త కస్టమర్ల చేరికలు, క్రెడిట్ కార్డుల జారీని సైతం నిలిపివేయాలని ఆదేశించింది. ఈ తరుణంలో ఐసీఐసీఐ బ్యాంక్ క్రెడిట్ కార్డుల ఉదంతం వెలుగులోకి రావడం చర్చనీయాంశంగా మారింది. అయితే, ఐసీఐసీఐ బ్యాంకు మాత్రం ఈ ఆందోళనలను కొట్టిపారేసింది. తాము జారీ చేసిన మొత్తం కార్డుల్లో, తాజాగా ప్రభావితమైన కార్డులు కేవలం 0.1 శాతం మాత్రమేనని తెలిపింది.
జీతం పెరిగిందా? ఈ టిప్స్ పాటిస్తే - మీ ఆర్థిక లక్ష్యాలు నెరవేరడం పక్కా! - Salary Management Tips
