How To Convert Existing Insurance Policy To E-Policy : ఇన్సూరెన్స్ అనేది మన భవిష్యత్కు ఆర్థిక భద్రతను ఇస్తుంది. అందుకే చాలా మంది కచ్చితంగా ఆరోగ్య, జీవిత బీమాలు తీసుకుంటూ ఉంటారు. మన దేశంలో ఇన్సూరెన్స్ కంపెనీలు భారతీయ బీమా నియంత్రణ, అభివృద్ధి ప్రాధికార సంస్థ( IRDAI) నియంత్రణలో ఉంటాయి. అందుకే పాలసీదారులు ఎప్పటికప్పుడు IRDAI మార్గదర్శకాలను గమనించాల్సి ఉంటుంది. ఐఆర్డీఏఐ ఇటీవలే, కొత్తగా పాలసీలు తీసుకునేవారికి బీమా కంపెనీలు కచ్చితంగా 'ఈ-పాలసీ'ని జారీ చేయాలని స్పష్టం చేసింది. ఈ నేపథ్యంలో చాలా కాలం క్రితమే తీసుకున్న బీమా పాలసీలను ఈ-పాలసీలుగా మార్చుకోవాలా? ఒక వేళ ఈ-పాలసీగా మార్చుకోవాలంటే ఏం చేయాలి? అనేది ఇప్పుడు తెలుసుకుందాం.
ఈ-పాలసీ అంటే ఏమిటి?
ఇటీవలి కాలం వరకు ఇన్సూరెన్స్ పాలసీలు తీసుకున్నప్పుడు బీమా పత్రాలను చేతికి అందించేవారు. కానీ ఇప్పుడు బీమా పాలసీలు తీసుకుంటే వాటిని డిజిటల్ డాక్యుమెంట్ రూపంలోనే ఇవ్వాలని ఇన్సూరెన్స్ కంపెనీలను ఐఆర్డీఏఐ నిర్దేశించింది. అందువల్ల ఇకపై ఇన్సూరెన్స్ పాలసీలను డిజిటల్ డాక్యుమెంట్ రూపంలోనే ఇస్తారు. దీనినే ఈ-పాలసీ అంటారు. ఈ నిబంధన ఈ ఏప్రిల్ 1 నుంచే అమల్లోకి వచ్చింది. అయితే పాలసీదారులు తమ ఈ-పాలసీలను భద్రపరుచుకోవడానికి, వాటిని మేనేజ్ చేయడానికి ఈ-ఇన్సూరెన్స్ అకౌంట్ను (eIA)ను తెరవాల్సి ఉంటుంది.
ఈ-పాలసీ వల్ల కలిగే లాభాలు!
- పాలసీదారులు తమ ఈ- పాలసీని ఎక్కడి నుంచైనా చాలా సులువుగా యాక్సెస్ చేయగలుగుతారు.
- పాలసీ డిజిటల్ ఫార్మాట్‌లో ఉండటం వల్ల బీమా కంపెనీ పాలసీదారులతో సులభంగా కమ్యూనికేట్ కాగలుగుతుంది.
- క్లెయిమ్‌లు మరింత సులభంగా పరిష్కరమవుతాయి.
తప్పనిసరి కాదు - కానీ
IRDAI కొత్త నిబంధనల ప్రకారం, గతంలో జారీ చేసిన పాలసీలను ఎలక్ట్రానిక్ రూపంలోకి మార్చడం తప్పనిసరి కాదు. అయితే బీమా చేసిన వ్యక్తి తన ఇన్సూరెన్స్ను ఈ- పాలసీగా మార్చాలనుకుంటే, అందుకు బీమా కంపెనీ కచ్చితంగా అవకాశం కల్పించాల్సి ఉంటుంది.
ఈ-ఇన్సూరెన్స్ అకౌంట్ (eIA) ఓపెన్ చేయడం ఎలా?
eIAను ఓపెన్ చేయడానికి, పాలసీని ఈ-ఫారమ్‌గా మార్చడానికి ఎటువంటి ఛార్జీలు ఉండవు. బీమా చేసిన వ్యక్తి తనకు ఇష్టం వచ్చిన రిపోజిటరీ నుంచి ఈ-ఇన్సూరెన్స్ అకౌంట్ ఫారమ్ను డౌన్లోడ్ చేసుకోవాలి. దానిని పూరించిన తర్వాత కేవైసీ పత్రాలను సమర్పించాలి. పాస్‌పోర్ట్ సైజ్ ఫోటో, పాన్ కార్డు, డేట్ ఆఫ్ బర్త్ సర్టిఫికెట్, ఇంటి చిరునామా ఉన్న గుర్తింపు కార్డును సమర్పించాలి. ఈ విధంగా మీరు ఈ-ఇన్సూరెన్స్ అకౌంట్ను ఓపెన్ చేయాలి.
ఈ- ఇన్సూరెన్స్ పాలసీగా మార్చడం ఎలా?
పాలసీదారుడు మొదట కన్వర్షన్ ఫారమ్ను నింపాలి. అందులో పాలసీదారుడి పేరు, పాలసీ నంబర్, ఈ-ఇన్సూరెన్స్ ఖాతా నంబర్, బీమా కంపెనీ పేరును నింపాల్సి ఉంటుంది. ఆ తర్వాత ఈ ఫారమ్ను, ఈ-ఇన్సూరెన్స్ అకౌంట్ ఓపెనింగ్ ఫారమ్లను బీమా కంపెనీకి సమర్పించాలి. మీ సాధారణ బీమా పాలసీ 'ఈ-పాలసీ'గా కన్వర్ట్ అయిన వెంటనే, SMS లేదా ఈ-మెయిల్ ద్వారా మీకు కన్ఫర్మేషన్ వస్తుంది.
