Types Of EPFO Pensions : ఉద్యోగులకు ఆర్థిక భద్రత కల్పించేందుకు ఉద్యోగుల భవిష్య నిధి సంస్థ (ఈపీఎఫ్ఓ) కీలకంగా పని చేస్తోంది. ఉద్యోగులు తమ జీతంలో 12 శాతాన్ని ఈపీఎఫ్ఓ ఖాతాలో జమ చేస్తారు. కంపెనీ యజమాన్యం కూడా ప్రతి నెలా అంతే మొత్తాన్ని ఉద్యోగి ఖాతాలో డిపాజిట్‌ చేస్తుంది. ఇలా పోగైన డబ్బును ఉద్యోగి పదవీ విరమణ చేసిన తర్వాత పెన్షన్ రూపంలో అందిస్తారు. అయితే ఈపీఎఫ్ఓ 7 రకాల పెన్షన్లు అందిస్తుందనే విషయం చాలా మందికి తెలియదు. అందుకే ఈ ఆర్టికల్లో వాటి గురించి వివరంగా తెలుసుకుందాం.
ఈపీఎఫ్ పింఛను పొందేందుకు అర్హతలు ఏమిటి?
ఉద్యోగుల భవిష్య నిధి (EPF) చందాదారులు 58 ఏళ్ల వయసులో పదవీ విరమణ చేస్తే వారు ఈపీఎఫ్ పెన్షన్ పొందేందుకు అర్హులు. అయితే ముందస్తు పెన్షన్ పొందడానికి కనీసం 50 ఏళ్ల వయస్సు నిండి ఉండాలి. లేదా 10 ఏళ్ల సర్వీసును పూర్తి చేయాలి. అయితే ఉద్యోగి సర్వీసు 10 ఏళ్లు లేకపోతే అతనికి పింఛను రాదా? భార్యా, పిల్లలు ఉన్న ఉద్యోగి 50 ఏళ్లలోపు మరణిస్తే వారికి పెన్షన్ అందుతుందా? ఇలాంటి అనుమానాలు చాలా మందిలో ఉంటాయి. వాటికి సరైన సమాధానం ఇప్పుడు చూద్దాం.
1. సూపర్‌ యాన్యుయేషన్ పెన్షన్ : 10 ఏళ్ల సర్వీసు పూర్తి చేసిన వారికి లేదా 58 ఏళ్లు నిండి రిటైర్ అయిన ఉద్యోగులకు ఈ పెన్షన్ అందిస్తారు.
2. ముందస్తు పింఛను : 50 ఏళ్లు పైబడినవారు, 10 ఏళ్ల సర్వీస్ పూర్తి చేసినవారు ముందస్తు పెన్షన్ పొందడానికి అర్హులు. కనుక ఈపీఎఫ్ చందాదారులు 50 ఏళ్ల నుంచే ముందస్తు పెన్షన్ను పొందొచ్చు. ముందస్తు పెన్షన్ విషయంలో చందాదారులు కొన్ని ముఖ్యమైన విషయాలను గుర్తుంచుకోవాలి. మీరు కనుక ముందస్తు పెన్షన్ను ఎంచుకుంటే, ప్రతి సంవత్సరం 4 శాతం తక్కువగా పెన్షన్ అందుకుంటారు. ఉదాహరణకు 58 ఏళ్లు నిండిన వారికి రూ.10వేలు పెన్షన్ అందుతుంది అనుకుందాం. అప్పుడు 57 ఏళ్లు ఉన్నవారికి రూ.9,600 మాత్రమే పెన్షన్ వస్తుంది. అంటే 4 శాతం పెన్షన్ తక్కువగా వస్తుంది. 56 ఏళ్ల వయస్సు ఉన్నవారికి అయితే రూ.9,216 మాత్రమే పెన్షన్ వస్తుంది. అంటే ఇతనికి వచ్చే పెన్షన్ మరో 4 శాతం తక్కువగా ఉంటుంది. ఈ విధంగా వివిధ వయస్సుల వారికి ఇచ్చే పెన్షన్ మారుతూ ఉంటుంది.
3. డిజేబుల్డ్ పెన్షన్ : తమ సర్వీస్ కాలంలో టెంపరరీగా లేదా శాశ్వతంగా అంగవైకల్యం పొందిన ఈపీఎఫ్ చందాదారులు పెన్షన్ పొందడానికి అర్హులు అవుతారు. ఈ పెన్షన్ తీసుకోవడానికి కనీస వయసు 50 ఏళ్లు లేదా 58 ఏళ్లు నిండి ఉండాల్సిన పనిలేదు. 10 ఏళ్ల సర్వీసు ఉండాల్సిన అవసరం లేదు. చందాదారుడు కేవలం ఒక నెల ఈపీఎఫ్ కంట్రిబ్యూషన్ చెల్లించినా ఈ డిజేబుల్డ్ పెన్షన్ పొందవచ్చు.
4. వితంతు పింఛన్ లేదా పిల్లల పెన్షన్ : ఈపీఎఫ్ చందాదారుడు మరణిస్తే, అతని భార్యకు, 25 ఏళ్లలోపు ఉన్న ఇద్దరు పిల్లలు ఈ పెన్షన్ కు అర్హులు అవుతారు. ఒకవేళ మృతుడి మొదటి సంతానానికి 25 ఏళ్లు దాటిపోయి, మూడో బిడ్డ ఉంటే, అతను కూడా పెన్షన్ను పొందొచ్చు. ఈ పెన్షన్ పొందేందుకు మినిమం ఏజ్ లిమిట్ లేదా మినిమం సర్వీసు కాలం అనేవి ఉండవు. చందాదారుడు ఒక నెల ఈపీఎఫ్ కంట్రిబ్యూషన్ ను చెల్లించినా, అతని భార్య, పిల్లలు ఈ పెన్షన్ను పొందేందుకు అర్హులు అవుతారు.
5. అనాథ పెన్షన్ : చందాదారుడు, అతని భార్య ఇద్దరూ మరణిస్తే, వారి ఇద్దరు పిల్లలకు కూడా ఆర్ఫాన్ పెన్షన్ అందిస్తారు. అయితే వాళ్ల వయస్సు 25 ఏళ్ల లోపు ఉండాలి. ఇక్కడ గమనించాల్సిన విషయం ఏమిటంటే, పెద్ద పిల్లవాడు లేదా పెద్దమ్మాయికి 25 ఏళ్లు నిండగానే వాళ్లకు ఇచ్చే పెన్షన్ ఆగిపోతుంది.
6. నామినీ పెన్షన్ : చందాదారుడు మరణించిన తర్వాత అతడి నామినీ ఈ పెన్షన్ పొందడానికి అర్హుడు అవుతాడు. ఇక్కడ గమనించాల్సిన విషయం ఏమిటంటే, చందాదారుడు ఈపీఎఫ్ఓ పోర్టల్లో ఈ-నామినేషన్ ఫారంలో పేర్కొన్న వ్యక్తే నామినీ అవుతారు.
7. తల్లిదండ్రులకు పెన్షన్ (Dependent Parents Pension) : ఈపీఎఫ్ఓ చందాదారుడు పెళ్లికాకుండానే మరణిస్తే, అతనిపై ఆధారపడిన తండ్రికి పెన్షన్ వస్తుంది. తండ్రి మరణాంతరం, చందాదారుడి తల్లికి పెన్షన్ వస్తుంది. ఇలావారు బతికున్నంతకాలం ఈ పెన్షన్ కొనసాగుతుంది. అయితే దీనికోసం ఫారం 10డీని నింపాల్సి ఉంటుంది.
ఐటీ రీఫండ్ స్టేటస్ - ఆన్లైన్లో ఈజీగా చెక్ చేసుకోండిలా! - Income Tax Refund Status Check
