Bengaluru loses Rs 12 Crore In Digital Arrest : కర్ణాటకలోని బెంగళూరుకు చెందిన ఓ టెకీ డిజిటల్ అరెస్ట్ అయ్యి రూ.11.8 కోట్లు పోగోట్టుకున్నాడు. పోలీసు అధికారులమని నమ్మించిన మోసగాళ్లు సాఫ్ట్వేర్ ఇంజినీర్కు భారీ మొత్తంలో టోకరా వేశారు. చివరికి తాను మోసపోయానని తెలుసుకున్న 39 ఏళ్ల బాధితుడు పోలీసులకు ఫిర్యాదు చేశాడు. ఈ ఘటనపై పోలీసులు దర్యాప్తు చేపట్టారు.
ఇదీ జరిగింది
పోలీసులు తెలిపిన వివరాలు ప్రకారం- నవంబర్ 25 నుంచి డిసెంబర్ 12 మధ్య ఈ మోసం జరిగింది. నవంబర్ 11న టెలికాం రెగ్యులేటరీ అథారిటీ ఆఫ్ ఇండియా(ట్రాయ్) అధికారినంటూ ఓ వ్యక్తి బాధితుడికి కాల్ చేశాడు. తన ఆధార్ కార్డుతో అనుసంధామైన సిమ్ను చట్టవ్యతిరేక వాణిజ్య ప్రకటనలకు, వేధింపులకు గురిచేయడానికి ఉపయోగించారని బాధితుడికి మోసగాడు చెప్పాడు. ఇదే విషయంపై ముంబయిలోని కొలాబ సైబర్ పోలీస్ స్టేషన్లో కేసు నమోదైందని బెదిరించాడు. ఆ తర్వాత మరో వ్యక్తి బాధితుడికి కాల్ చేసి స్కైప్ యాప్ డౌన్లోడ్ చేసుకోమన్నాడు.
అనంతరం ముంబయి పోలీసుల లాగా డ్రెస్ వేసుకున్న మరో వ్యక్తి వీడియో కాల్ చేశాడు. 'మీ ఆధార్ కార్డు ఉపయోగించి ఓ వ్యాపారి బ్యాంక్ ఖాతా ఓపెన్ చేశాడు. దాని ద్వారా రూ.6కోట్ల లావాదేవీలు జరిపాడు. మనీ లాండరింగ్కు ఆ బ్యాంకు అకౌంట్ను ఉపయోగించారు' అని వీడియో కాల్లో బాధితుడిని భయపెట్టాడు. అంతేకాకుండా ఈ విషయాన్ని రహస్యంగా ఉంచకపోతే, దర్యాప్తునకు సహకరించకపోతే అరెస్ట్ చేస్తామని బెదిరించాడు.
నవంబర్ 25న పోలీసు డ్రెస్ వేసుకున్న మరో వ్యక్తి బాధితుడికి స్కైప్లో కాల్ చేశాడు. 'కేసు పెద్ద కోర్టులో ఉంది, మేము చెప్పిన విధంగా నడుచుకోకపోతే నీ కుటుంబాన్ని మొత్తం అరెస్ట్ చేస్తాం' అని బెదిరించాడు. అలా ఒకరి తర్వాత ఒకరు ఫోన్ చేసుకుంటూ బాధితుడిని భయాందోళనలకు గురి చేశారు.
ఆర్బీఐ మార్గదర్శకాలను వల్లెవేస్తూ బాధితుడిని భయపెట్టారు. అకౌంట్ వెరిఫికేషన్ అని నమ్మించి ఓ బ్యాంక్ అకౌంట్కు డబ్బులు పంపించమన్నారు. అలా చేయకపోతే చట్టరీత్యా చర్యలు తీసుకుంటామని చెప్పారు. దీంతో భయపడిపోయిన బాధితుడు క్రమంగా సైబర్ మోసగాళ్లకు మొత్తం రూ.11.8 కోట్లు పంపించాడు. అంతటితో ఆగని సైబర్ నేరగాళ్లు ఇంకా డబ్బులు డిమాండ్ చేస్తుండటం వల్ల తాను మోసపోయానని బాధితుడు గ్రహించాడు. అనంతరం పోలీసులు ఫిర్యాదు చేశాడు.
బాధితుడు ఫిర్యాదు ఆధారంగా ఐటీ చట్టం, బీఎన్ఎస్లోని సంబంధిత సెక్షన్ల కింద పోలీసులు కేసు నమోదు చేసుకున్నారు. ఈ కేసులో దర్యాప్తు కొనసాగుతోందని తెలిపారు.
