Maharashtra Road Accident Today : మహారాష్ట్రలోని గోండియా జిల్లాలో జరిగిన ఘోర రోడ్డు ప్రమాదంలో తొమ్మిది మంది ప్రయాణికులు మరణించారు. మరో 25 మంది గాయపడ్డారు. భండారా నుంచి గోండియా వెళ్తున్న ఆర్టీసీ బస్సు అదుపు తప్పి బోల్తా పడడం వల్ల జరిగిందీ విషాదం. సమాచారం అందుకున్న పోలీసులు ఘటనాస్థలానికి చేరుకుని సహాయక చర్యలు చేపట్టారు. క్షతగాత్రులను ఆసుపత్రికి తరలించి చికిత్స అందించారు. బైక్ను తప్పించే ఈ క్రమంలో ఈ ఘటన జరిగినట్లు ప్రాథమికంగా తెలుస్తోంది.
శుక్రవారం మధ్యాహ్నం 12.30 గంటల సమయంలో భండారా నుంచి బయల్దేరిన MSRTC బస్సు 'శివ్ షాహి' 36 మంది ప్రయాణికులతో కోహ్‌మారా హైవేపై వెళ్తుండగా ఉన్నట్టుండి ఓ ద్విచక్రవాహనం ఎదురుగా వచ్చింది. దాని తప్పించే క్రమంలో డ్రైవర్‌ ఒక్కసారిగా బస్సును ఇంకోవైపునకు తిప్పడం వల్ల బోల్తా పడినట్లు ప్రత్యక్ష సాక్షులు తెలిపారు. ప్రమాదాన్ని గుర్తించిన స్థానికులు వెంటనే పోలీసులకు సమాచారమిచ్చి వెంటనే సహాయక చర్యలు చేపట్టారు. ప్రమాదం జరగ్గానే డ్రైవర్‌ అక్కడి నుంచి పరారయ్యాడు. అతడి కోసం పోలీసులు గాలిస్తున్నారు. ఘటనపై కేసు నమోదు చేసిన దర్యాప్తు చేపట్టారు.
ఈ ఘటనపై ప్రధానమంత్రి నరేంద్ర మోదీ స్పందించారు. "మహారాష్ట్రలోని గోండియాలో జరిగిన బస్సు ప్రమాదంలో పలువురు ప్రాణాలు కోల్పోయినందుకు మోదీ బాధపడుతున్నారు. వారికి కుటుంబసభ్యులకు సానుభూతి తెలియజేస్తున్నారు. గాయపడినవారు త్వరగా కోలుకోవాలని కోరుకుంటున్నారు. PMNRF నుంచి మృతుల కుటుంబాలకు రూ. 2లక్షలు, గాయపడిన వారికి రూ.50లక్షల ఎక్స్గ్రేషియాను మోదీ అందిస్తున్నారు" అని పీఎంఓ కార్యాలయం ట్వీట్ చేసింది.
ఈ ప్రమాదంలో జరిగిన ప్రాణనష్టంపై ఆపద్ధర్మ ముఖ్యమంత్రి ఏక్‌నాథ్ శిందే సంతాపం వ్యక్తం చేశారు. మృతుల బంధువులకు ఒక్కొక్కరికి రూ.10 లక్షల చొప్పున పరిహారం ప్రకటించారు. గోండియా కలెక్టర్‌తో మాట్లాడి గాయపడిన ప్రయాణికులందరికీ మెరుగైన చికిత్స అందించి వైద్యం అందించాలని ఆదేశించారు. అవసరమైతే వారిని ప్రత్యేక చికిత్స కోసం ప్రైవేట్‌ ఆసుపత్రుల్లో చేర్పించాలని, అందుకు అయ్యే ఖర్చులను రాష్ట్ర ప్రభుత్వమే భరిస్తుందని తెలిపారు.
బస్సు ప్రమాద ఘటనపై బీజేపీ సీనియర్‌ నేత దేవేంద్ర ఫడణవీస్‌ తీవ్ర దిగ్భ్రాంతి వ్యక్తం చేశారు. గోండియా జిల్లాలోని సడక్‌ అర్జుని సమీపంలో జరిగిన ఘటన దురదృష్టకరమని తెలిపారు. మృతులకు తన ప్రగాఢ సంతాపం తెలియజేశారు. ఈ ఘటనలో క్షతగాత్రులకు అవసరమైన వైద్య సాయం అందించాలని కలెక్టర్‌ను ఆదేశించినట్లు పేర్కొన్నారు. ఉన్నతాధికారులు ఘటనా స్థలానికి చేరుకున్నారని, సమన్వయంతో సహాయక చర్యలు కొనసాగుతున్నాయని తెలిపారు. క్షతగాత్రులు త్వరగా కోలుకోవాలని భగవంతుడిని ప్రార్థిస్తున్నట్లు ఎక్స్‌లో పేర్కొన్నారు.
