రామేశ్వరం కేఫ్ పేలుడు కేసులో పోలీసుల అదుపులో నలుగురు

Rameswaram Cafe Blast Update : కర్ణాటకలోని రామేశ్వరం కేఫ్​ పేలుడు ఘటనలో నలుగురు అనుమానితులను పోలీసులు అదుపులోకి తీసుకున్నారు. వారిని విచారిస్తున్నట్లు తెలిపారు. మరోవైపు, కేఫ్​లో జరిగిన పేలుడుకు కారణమైన నిందితులను వీలైనంత త్వరగా పట్టుకుంటామని కర్ణాటక సీఎం సిద్ధరామయ్య పేర్కొన్నారు.

Rameswaram Cafe Blast Update : కర్ణాటక బెంగళూరులోని రామేశ్వరం కేఫ్​లో జరిగిన పేలుళ్ల కేసులో నలుగురిని అదుపులోకి తీసుకున్నట్లు పోలీసు వర్గాలు తెలిపాయి. వారిని విచారిస్తున్నట్లు పేర్కొన్నాయి. పేలుడు ఘటనపై దర్యాప్తు ముమ్మరంగా సాగుతోందని బెంగళూరు నగర కమిషనర్​ బీ దయానంద తెలిపారు. ఈ కేసుపై పోలీసులు బృందాలుగా ఏర్పడి దర్యాప్తు చేపడుతున్నారని చెప్పారు. కేసు సున్నితత్వం, భద్రతా సమస్యలను దృష్టిలో ఉంచుకుని మీడియా సహకరించాలని విజ్ఞప్తి చేశారు. ఎటువంటి ఊహాగానాలకు తావు ఇవ్వొద్దని కోరారు. మరోవైపు, కెంపెగౌడ అంతర్జాతీయ విమానాశ్రయంలో భద్రతను మరింత కట్టుదిట్టం చేశారు అధికారులు.

'నిందితులను వీలైనంత త్వరగా పట్టుకుంటాం'
రామేశ్వరం కేఫ్​లో జరిగిన పేలుడుకు కారణమైన నిందితులను వీలైనంత త్వరగా పట్టుకుంటామని కర్ణాటక సీఎం సిద్ధరామయ్య తెలిపారు. సీసీటీవీ ఆధారంగా ఘటన వెనుక ఉన్న వారిని పట్టుకుంటామని ఆయన విశ్వాసం వ్యక్తం చేశారు. అలాగే పేలుడు సంభవించిన రామేశ్వరం కేఫ్​ను కర్ణాటక ముఖ్యమంత్రి సిద్ధరామయ్య శనివారం సందర్శించారు. ఆ తర్వాత పేలుడు ఘటనలో గాయపడి బ్రూక్​ఫీల్డ్ ఆస్పత్రిలో చికిత్స పొందుతున్నవారిని పరామర్శించారు.

"రామేశ్వరం కేఫ్​లో పేలుడు ఘటనలో నిందితుడి కదలికలు సీసీ కెమెరాలకు చిక్కాయి. పేలుడు కారణమైనవారిని పట్టుకుంటాం. ఫేస్​ మాస్క్, క్యాప్ ధరించిన ఒక వ్యక్తి బస్సులో వచ్చి కేఫ్​కు వచ్చాడు. టిఫిన్​ను ఆర్డర్ చేసి కేఫ్​లో ఒక చోట కూర్చున్నాడు. ఆ తర్వాత బ్యాగ్ అక్కడే ఉంచి వెళ్లిపోయాడు. పేలుడు ఘటనలో గాయపడ్డవారు క్షేమంగా ఉన్నారు. కేఫ్​లో పేలుడుపై బీజేపీ రాజకీయాలు చేస్తోంది."
--సిద్ధరామయ్య, కర్ణాటక ముఖ్యమంత్రి

'బెంగళూరు ప్రజలు ఆందోళన చెందాల్సిన అవసరం లేదు'
2022లో మంగళూరులో జరిగిన కుక్కర్​ పేలుడుకు, రామేశ్వరం కేఫ్ పేలుడుకు మధ్య సంబంధం ఉందని కర్ణాటక డిప్యూటీ సీఎం డీకే శివకుమార్ తెలిపారు. రామేశ్వర్ పేలుడు ఘటనపై పోలీసులు అన్ని కోణాల్లోనూ దర్యాప్తు చేపడుతున్నారని చెప్పారు. 'బెంగళూరు ప్రజలు ఆందోళన చెందనవసరం లేదు. ఇది తక్కువ తీవ్రత కలిగిన పేలుడు. నిందితుడు క్యాప్, ఫేస్ మాస్క్ పెట్టుకున్నప్పటికీ అతడి ముఖం కనిపిస్తుంది.' అని చెప్పారు.

'శాంతిభద్రతల పరిరక్షణలో కాంగ్రెస్ విఫలం'
రామేశ్వరం కేఫ్​లో పేలుడు ఘటనపై కర్ణాటక మాజీ ముఖ్యమంత్రి, బీజేపీ నేత బసవరాజ్​ బొమ్మై స్పందించారు. రాష్ట్రంలో అధికారంలో ఉన్న కాంగ్రెస్ ప్రభుత్వం మొదటి రోజు నుంచి శాంతిభద్రతల పరిరక్షణలో విఫలమైందని విమర్శించారు. దేశ వ్యతిరేక శక్తులకు అధికార పార్టీ నేతలు నుంచి మద్దతు లభిస్తోందని ఆరోపించారు. బీజేపీ సర్కార్ రాష్ట్రంలో అధికారంలో ఉన్న సమయంలో 15మంది స్లీపర్ సెల్స్​ను జైల్లోకి పంపామని చెప్పారు. కాంగ్రెస్ ప్రభుత్వం బుజ్జగింపు రాజకీయాల వల్లే బెంగళూరు నగరంలో ఇలాంటి పేలుడు సంభవించిందని అన్నారు.