పునుగులు + టమాటా చట్నీ డెడ్లీ కాంబినేషన్ - ఇంట్లోనే ఇలా ఈజీగా తయారు చేసేయండి! - how to prepare punugulu at home

How To Prepare Punugulu At Home In Telugu : సాయంత్రం అయ్యిందంటే చాలు.. పునుగుల బండ్ల వద్ద జనాలు గుమిగూడుతారు. ఇష్టమైన పునుగులను.. టమాటా చట్నీతో ఆస్వాదిస్తుంటారు. కానీ ఇంట్లో తయారు చేసుకుంటే.. అంత టేస్టీగా ఉండవు. మరి.. స్ట్రీట్​ సైడ్​ టేస్ట్​ వచ్చేలా ఎలా ప్రిపేర్ చేయాలో మీకు తెలుసా?

How To Prepare Punugulu At Home in Telugu : సాయంత్రం సమయం.. వేడి వేడి పునుగులు.. టమాటా చట్నీ.. ఆహాఁ! చెబుతుంటూనే నోరూరుతోంది కదా! అట్లుంటది మరి టేస్ట్​!! ఇవి అందరికీ ఎంతో ఇష్టమైన ఈవెనింగ్​ స్నాక్​. అయితే.. కొన్నిసార్లు బయటకు వెళ్లలేని పరిస్థితుల్లో ఇంట్లోనే పునుగులు చేసుకుందాం అనుకుంటారు చాలామంది. కానీ.. రోడ్డు పక్కన​ దొరికే బండ్లపైన ఉండే టేస్ట్​ రాలేదని ఫీలవుతుంటారు. అయితే.. ఇలా చేస్తే స్ట్రీట్​ సైడ్​ దొరికే పునుగుల లాగానే సూపర్ టేస్టీగా ఉంటాయి. మరి ఇంకెందుకు ఆలస్యం? ఎలా తయారు చేయాలో ఇప్పుడు తెలుసుకుందాం.

పునుగుల కోసం కావాల్సిన పదార్థాలు..

• ఒక కప్పు మైదా పిండి
• ఒక కప్పు పుల్లటి పెరుగు
• పచ్చిమిర్చీ
• ఒక టీ స్పూన్​ జీలకర్ర
• రుచికి సరిపడా ఉప్పు

చట్నీ కోసం కావాల్సిన పదార్థాలు

• నూనె
• ఒక టీ స్పూన్​ వేరుశనగ (పల్లీలు)
• ఒక టీ స్పూన్ దనియాలు
• ఎండు మిర్చీలు
• టమటాలు
• కొత్తిమీర
• వెల్లుల్లి ముక్కలు

పునుగుల తయారీ విధానం

• ముందుగా గిన్నెలో ఒక కప్పు మైదా పిండి తీసుకోండి.
• మనం ఎంత మైదాపిండి తీసుకుంటామో అంతే మోతాదులో పుల్లటి పెరుగు వేయాలి.
• ఆ తర్వాత సన్నగా కట్ చేసిన పచ్చిమిర్చీ, ఒక టీ స్పూన్ జీలకర్ర, ఉప్పు వేసి బాగా కలుపుకోవాలి. అవసరమైతే కొద్దిగా నీటిని కలుపుకోండి.
• పులిసిన పెరుగు వేస్తే మళ్లీ వంట సోడా వేయాల్సిన అవసరం లేదు. ఎందుకంటే సోడా వేస్తే నూనెను ఎక్కువ పీల్చుకుంటుంది.
• ఆ తర్వాత ఈ మిశ్రమాన్ని ఒక గంటపాటు నానబెట్టుకోవాలి. (పుల్లటి పెరుగు కాకపోతే ఇంకా రెండు గంటలు ఎక్కువే నానబెట్టాలి)
• ఒకవేళ పులిసిన పెరుగు లేకపోతే, బాగా పులిసిన దోశ పిండి ఉన్నా వేసుకోవచ్చు.
• గంటపాటు పిండిని నానబెట్టుకున్న తర్వాత స్టౌ ఆన్​ చేసుకుని ఫ్రైకి సరిపడా నూనె పోసుకోవాలి.
• నూనె బాగా వేడయ్యాక చిన్నచిన్నగా పునుగులు వేసుకోని ఫ్రై చేయాలి.
• పునుగులు వేసేటప్పడు మంటను మీడియం ఫ్లేమ్​లోకి మార్చండి.
• ఆ తర్వాత హై ఫ్లేమ్​లోకి మార్చి పునుగులు క్రిస్పీగా అయ్యేవరకు ఫ్రై చేయండి.

చట్నీ తయారీ విధానం

• స్టౌపైన ఒక పాన్​ పెట్టి వేడయ్యాక ఒక టేబుల్ స్పూన్​ నూనె పోయాలి.
• ఆ తర్వాత వేరుశనగ, దనియాలు, కారానికి సరిపడా ఎండు మిర్చీ వేసి ఫ్రై చేయండి.
• ఇవన్నీ వేగాక కట్ చేసిన టమాట ముక్కలను వేసి లో ఫ్లేమ్​లో మగ్గనివ్వాలి.
• టమాటాలు మెత్తగా అవ్వగానే స్టౌ ఆఫ్ చేసి చల్లారబెట్టాలి.
• అనంతరం వీటన్నింటిని మిక్సీ జార్​లోకి వేసి కొద్దిగా కొత్తిమీర, వెల్లుల్లి, ఉప్పు వేసి గ్రైండ్​ చేసుకోవాలి.
• అవసరాన్ని బట్టి కొద్దిగా నీటిని యాడ్ చేసుకోవచ్చు. ఆ తర్వాత దానిలో తాలింపు వేసుకుంటే సూపర్ టమటా చట్నీ రెడీ!