పెళ్లి వేడుకలో ఘోర అగ్నిప్రమాదం- ఒకే కుటుంబంలో ఆరుగురు మృతి- బాణసంచానే కారణం! - Fire Accident In Wedding Ceremony

Fire Accident In Wedding Ceremony : ఓ పెళ్లి వేడుకలో జరిగిన ఘోర అగ్ని ప్రమాదంలో ఒకే కుటుంబానికి చెందిన ఆరుగురు మృతి చెందారు. పలువురు గాయపడ్డారు. ఈ ఘటన బిహార్​లో జరిగింది.

Fire Accident In Wedding Ceremony : బిహార్​లో ఘోర అగ్ని ప్రమాదం జరిగింది. దర్భంగా ప్రాంతంలో జరిగిన ఓ వివాహ వేడుకలో మంటలు చెలరేగి ఒకే కుటుంబానికి చెందిన ఆరుగురు మృతిచెందగా, పలువురు గాయపడ్డారు. సమాచారం అందుకున్న పోలీసలు ఘటనాస్థలికి చేరుకుని స్థానికుల సహాయంతో మంటలను అదుపుచేశారు. బాణసంచా కాల్చడం వల్ల చెలరేగిన మంటలు వెంటనే సిలిండర్​, డీజిల్​ స్టాక్​లోకి వ్యాపించినట్లు సమాచారం. అనంతరం భారీ పేలుడు సంభవించినట్లు తెలుస్తోంది.

చెలరేగుతున్న మంటలు

ఇదీ జరిగింది
బహెరా పోలీస్​ స్టేషన్​లోని ఆంటోర్​ గ్రామంలో ఛగన్ పాశ్వాన్​ కుమార్తె వివాహ వేడుక జరిగింది. వేడుక కోసం టెంట్​ ఏర్పాటు చేసి, బస బోజన ఏర్పాట్లు చేశారు. అనంతరం పెళ్లి ఊరేగింపు వచ్చింది. ఈ క్రమంలో భారీగా బాణసంచా కాల్చారు. ఈ క్రమంలో టెంట్​కు నిప్పు అంటుకుంది. దీంతో అక్కడే ఉంచిన సిలిండర్లు, డీజిల్​కు మంటలు వ్యాపించి భారీ పేలుడు సంభవించింది. ఈ ఘటనలో తీవ్రంగా గాయపడి ఒకే కుటుంబానికి చెందిన ఆరుగురు మృతి చెందారు. మూడు పశువులు కూడా మరణించాయి.

ప్రమాదం జరిగిన ప్రాంతం

ఈ ఘటనపై సమాచారం అందుకున్న స్థానికులు అప్రమత్తమై పోలీసులకు సమాచారం అందించారు. వెంటనే ఘటనాస్థలికి చేరుకున్న పోలీసులు స్థానికులతో కలిసి మంటలను అదుపులోకి తీసుకొచ్చారు. ఈ ఘటనపై దర్భంగా జిల్లా మేజిస్ట్రేట్​ రాజీవ్​ రోషన్ స్పందించారు. బాధిత కుటుంబానికి ప్రభుత్వం సహాయం అందిస్తుందని తెలిపారు. ఈ ప్రమాదానికి గల కారణాలు అన్వేషించడానికి ఒక బృందాన్ని కూడా ఘటనాస్థలికి పంపించామని తెలిపారు. మృతదేహాలను స్వాధీనం చేసుకుని పోస్టు మార్టం నిమిత్తం ఆస్పత్రికి తరలించినట్లు చెప్పారు.

ప్రమాదం జరిగిన ప్రాంతం

రోడ్డు పక్కన నిద్రిస్తున్న వారిపైకి దూసుకెళ్లిన కారు- ముగ్గురు మృతి
రోడ్డు పక్కన నిద్రిస్తున్న 11మందిపై కారు దూసుకెళ్లింది. ఈ ఘటనలో ఆరేళ్ల బాలిక సహా ముగ్గురు మృతి చెందారు. మిగతా ఎనిమిది మంది గాయపడ్డారని పోలీసులు తెలిపారు. ఈ ఘటన రాజస్థాన్​లోని దౌసా జిల్లాలో గురువారం జరిగింది.

పోలీసులు తెలిపిన వివరాల ప్రకారం, మహ్వా పట్టణంలోని ఓ మురికివాడలో బాధితులు నివసిస్తున్నారు. ఈ క్రమంలో స్థానికంగా ఉన్న ప్రభుత్వ పాఠశాల సమీపంలోని రోడ్డు పక్కన నిద్రిస్తున్నారు. ఈ క్రమంలో వేగంగా ఓ కారు వారి పైనుంచి దూసుకెళ్లింది. ఈ ఘటనలో ఆరేళ్ల బాలిక సహా ముగ్గురు మృతిచెందారు. ఎనిమిది మంది గాయపడ్డారు. దీనిపై సమాచారం అందుకున్న పోలీసులు వెంటనే ఘటనాస్థలికి వెళ్లి క్షతగాత్రులను ఆస్పత్రికి తరలించారు. మృతదేహాలను స్వాధీనం చేసుకున్నారు. గాయపడిన వారిలో ప్రాథమిక చికిత్స తర్వాత ఇద్దరు డిశ్చార్జ్​ అయ్యారని, మరో ఆరుగురిని జైపుర్​లోని ఎస్​ఎంఎస్​ ఆస్పత్రికి రిఫర్​ చేసినట్లు మహ్వా ఎస్​ఐ అజయ్​ సింగ్ తెలిపారు. కారును స్వాధీనం చేసుకున్నామన్న అజయ్​ సింగ్, పరారీలో ఉన్న డ్రైవర్​ కోసం గాలింపు చర్యలు చేపట్టినట్లు వెల్లడించారు.