రైతులకు గుడ్​న్యూస్​- రూ.14వేల కోట్లతో 7 కొత్త పథకాలు - Union Cabinet Meeting Highlights

Union Cabinet Meeting Highlights : వ్యవసాయం, అనుబంధ రంగాల సమగ్రాభివృద్ధి లక్ష్యంగా కేంద్ర ప్రభుత్వం ఏడు పథకాలు ప్రకటించింది. సుమారు 14వేల కోట్ల రూపాయలతో ఈ కార్యక్రమాలు చేపట్టేందుకు కేంద్ర కేబినెట్‌ ఆమోదం తెలిపింది. మరోవైపు, ముంబయి, ఇందౌర్​ మధ్య కొత్త రైలు మార్గం నిర్మాణానికి కూడా పచ్చజెండా ఊపింది.

Union Cabinet Meeting Highlights : దేశంలో వ్యవసాయ రంగానికి సంబంధించి ఏడు పథకాలకు కేంద్ర మంత్రివర్గం ఆమోదం తెలిపింది. సుమారు 14వేల కోట్ల రూపాయలతో ఈ కార్యక్రమాలు చేపట్టనున్నట్లు సమావేశం తర్వాత కేంద్ర మంత్రి అశ్వినీ వైష్ణవ్ చెప్పారు. వ్యవసాయ రంగంలో పరిశోధనలు, విద్య, వాతావరణ మార్పులు, సహజ వనరుల నిర్వాహణ, డిజిటలైజేషన్‌, పాడిపరిశ్రమ, ఉద్యాన పంటలకు ప్రోత్సాహకాలే లక్ష్యంగా ఈ పథకాలు అమలు చేయనున్నట్లు ఆయన వివరించారు.

#WATCH | Union Minister Ashwini Vaishnaw says, " today, 7 major decisions have been taken in the cabinet meeting for improving the lives of farmers and increasing their income...the first is digital agriculture mission. this is being developed on lines of the structure of digital… pic.twitter.com/rcLcjT7Lxh

— ANI (@ANI) September 2, 2024

కేంద్రం ఆమోదించిన పథకాల వివరాలు :

1. డిజిటల్ అగ్రికల్చర్ మిషన్- రూ.2,817 కోట్లు
2. క్రాప్​ సైన్స్ పథకం- రూ.3,979 కోట్లు
3. వ్యవసాయ విద్యా రంగం బలోపేతం- రూ. 2,291 కోట్లు
4. పాడిపశువుల ఆరోగ్యం, ఉత్పత్తి పథకం- రూ. 1,702
5. హార్టికల్చర్ అభివృద్ధి- రూ.860 కోట్ల
6. కృషి విజ్ఞాన కేంద్రాల బలోపేతం- రూ. 1,202 కోట్లు
7. సహజ వనరుల నిర్వహణ- రూ. 1,115 కోట్లు

ముంబయి, ఇండోర్ మధ్య కొత్త రైలు మార్గం
ముంబయి, ఇందౌర్ మధ్య 309 కిలోమీటర్ల మేర కొత్త రైలు మార్గం ఏర్పాటుకు కేంద్ర ఆర్థిక వ్యవహారాల కేబినెట్‌ కమిటీ ఆమోదం తెలిపింది. రూ.18,036 కోట్లతో చేపట్టే ఈ ప్రాజెక్టును 2028-29నాటికి పూర్తి చేయాలని లక్ష్యంగా పెట్టుకున్నట్లు కేంద్ర మంత్రి అశ్వినీ వైష్ణవ్ చెప్పారు. ఉజ్జయిన్‌లోని ప్రముఖ జ్యోతిర్లింగ క్షేత్రమైన మహాకాళేశ్వర్‌ ఆలయం సహా అనేక పారిశ్రామిక ప్రాంతాలను అనుసంధానం చేస్తూ ఈ కొత్త రైలు మార్గం ఉంటుందని కేంద్ర మంత్రి తెలిపారు. ఈ మార్గంలో 30 కొత్త రైల్వేస్టేషన్లు ఏర్పాటు చేయనున్నట్లు వివరించారు.

కేనెస్‌ సెమీకండక్టర్‌ ప్లాంట్
గుజరాత్‌లోని సనంద్‌లో కేనెస్‌ సెమీకండక్టర్‌ తయారీ పరిశ్రమ ఏర్పాటుచేసేందుకు సైతం కేబినెట్‌ ఆమోదం తెలిపింది. 3,307 కోట్ల పెట్టుబడితో రోజుకు 63లక్షల చిప్‌లు తయారీ సామర్థ్యంతో ఈ పరిశ్రమను ఏర్పాటు చేయన్నట్లు కేంద్రమంత్రి వివరించారు. విద్యుత్‌ రంగానికి సంబంధించిన, ఆటోమొబైల్స్‌, గృహోపకరణాల్లో ఉపయోగించే విద్యుత్‌ ఆధారిత చిప్‌లను ఈ కంపెనీ తయారు చేస్తుందని ఆయన చెప్పారు.