లిప్​స్టిక్ ఎక్కువ సేపు ఉండట్లేదా? - ఈ టిప్స్ పాటించండి!

Lipstick Long Lasting Tips: అందంగా కనిపించడం కోసం అమ్మాయిలు ఎంతగానో తాపత్రయపడుతుంటారు. ఇందుకోసం కొందరు డైలీ మేకప్ వేసుకుంటారు. మరి కొందరు లిప్​స్టిక్ మాత్రమే అప్లై చేస్తుంటారు. అయితే.. లిప్ స్టిక్ సరిగా వేసుకోకపోతే త్వరగా షేడ్ అయిపోతుంది. మేము చెప్పే ఈ టిప్స్ ఫాలో అయ్యారంటే మీ లిప్​స్టిక్ ఎక్కువసేపు ఉంటుంది.

Best Tips to Make Lipstick Long Lasting: అమ్మాయిలు బ్యూటీగా కనిపించడంలో ఫేస్​తో పాటు లిప్స్ కీలకం. దొండపండు లాంటి ఎర్రటి పెదాలు ఆడవాళ్ల అందాన్ని నిస్సందేహంగా రెట్టింపు చేస్తాయి. అయితే.. అయితే చాలా మందికి లిప్​ స్టిక్ వేసుకోవడం సరిగా రాదు. ఏదైనా తినేటప్పుడు లేదా తాగేటప్పుడు తొలగిపోతుంది. దాంతో మళ్లీ అప్లై చేయాల్సి వస్తుంది. అలాకాకుండా.. మేము చెప్పే టిప్స్ ఫాలో అవుతూ లిప్​స్టిక్ పెట్టుకున్నారంటే ఎక్కువ సేపు ఉండడంతో పాటు మీ అందాన్ని పెంచుతుంది. ఇంతకీ ఆ టిప్స్ ఏంటో ఈ స్టోరీలో తెలుసుకుందాం..

లిప్ స్క్రబ్: లిప్​స్టిక్ ఎక్కువసేపు ఉండకపోవడానికి కారణం.. మీ పెదవులపై డెడ్ ​స్కిన్ సెల్స్ ఉండడం. ఇవి లిప్​స్టిక్ తొందరగా పోయేలా చేస్తాయి. కాబట్టి ఎప్పుడైనా మీరు లిప్​స్టిక్ పెట్టుకునే ముందు పెదాలను బాగా క్లీన్ చేయాలి. అంటే.. డెడ్ స్కిన్ సెల్స్ లేకుండా చూసుకోవాలి. ఇందుకోసం మీరు లిప్స్​పై కొద్దిగా నూనె రాసి టూత్​ బ్రష్​తో సున్నితంగా స్క్రబ్ చేయండి. దాంతో డెడ్ స్కిన్ తొలగిపోతుందని నిపుణులు చెబుతున్నారు. ఆ తర్వాత పెదాలు కడిగి లిప్​స్టిక్ పెట్టుకోండి. ఈ లిప్ స్క్రబ్ అనేది మీ పెదాల రూపాన్ని మెరుగుపరచడమే కాకుండా లిప్​స్టిక్ బాగా అంటిపెట్టుకునేలా చేస్తుంది.

మాయిశ్చరైజ్ : లిప్​స్టిక్ అప్లై చేయడానికి ముందు లిప్స్​ను మాయిశ్చరైజ్ చేయండి. ఇది కూడా లిప్​స్టిక్ తొందరగా పోకుండా ఉండడానికి సహాయపడుతుంది. ఇందుకోసం.. వాజిలెన్​, లిప్ బామ్ పెదాలకు యూజ్ చేయండి. దీనివల్ల లిప్స్ పొడిబారకుండా చక్కగా కనిపిస్తాయి. దాంతోపాటు ఎక్కువసేపు ఉండే ఛాన్స్ ఉంటుందంటున్నారు నిపుణులు.

బ్రష్ అప్లికేషన్: లిప్​స్టిక్ ఎక్కువసేపు ఉంచడంలో బ్రష్ అప్లికేషన్ కూడా చాలా బాగా యూజ్ అవుతుంది. అంటే నేరుగా లిప్​స్టిక్ పెదాలకు అప్లై చేసే బదులు బ్రష్​ ఉపయోగించడం. ఇందుకోసం ముందుగా బ్రష్​కు లిప్​స్టిక్ అప్లై చేసి ఆ తర్వాత పెదాలకు పెట్టుకోవాలి. ఈ టెక్నిక్ లిప్​స్టిక్ అటుఇటు అంటుకోవడాన్ని కూడా తగ్గిస్తుంది. ఫలితంగా అందమైన, చక్కటి పెదవుల రూపం మీ సొంతమవుతుంది.

టిష్యూ పేపర్ టెక్నిక్: లిప్​స్టిక్ కలర్ తొందరగా పోకుండా, ఎక్కువసేపు ఉండేలా చేయడంలో.. ఈ టిష్యూ పేపర్ టెక్నిక్ చాలా ఎఫెక్టివ్​గా పనిచేస్తుంది. ఈ టెక్నిక్​ ఎలా ఫాలో అవ్వాలంటే.. మొదట లిప్‌స్టిక్‌ను లిప్స్​పై అప్లై చేయాలి. ఆ తర్వాత మీ పెదవుల మధ్య టిష్యూ పేపర్‌ను ఉంచి సున్నితంగా నొక్కిపట్టాలి. ఇది అదనపు లిప్‌స్టిక్‌ను తొలగిస్తుంది. ఆ తర్వాత పెదవులకు పౌడర్ అప్లై చేసి.. మళ్లీ లిప్‌స్టిక్‌ని అప్లై చేయాలి. ఈ టెక్నిక్ లిప్​స్టిక్ రంగును లాక్ చేయడంలో చాలా బాగా సహాయపడుతుంది. అలాగే ఎక్కువ సేపు ఉండేలా చేస్తుంది.