Arrangements For Devotees In Ayodhya : ఇలలో వెలసిన స్వర్గపురి సీమ అయోధ్యాపురి. దేవదేవుడైన శ్రీమన్నారాయణుడు శ్రీరాముడిగా కొలువు తీరుతున్న అయోధ్య నగరం ఆ పుణ్యఘట్టానికి సిద్ధమైంది. ఇందుకోసం రామజన్మభూమి తీర్థ క్షేత్ర ట్రస్ట్‌, ఉత్తర్ప్రదేశ్ ప్రభుత్వం అన్ని ఏర్పాట్లు చేసింది. కార్యక్రమానికి విచ్చేసే అతిథులు, భక్తులకు ఎలాంటి అసౌకర్యం కలుగకుండా సకల సౌకర్యాలు కల్పించింది.
భక్తులకు ప్రసాదంగా మోతీచూర్ లడ్డు
రామమందిరంతోపాటు ఇతర ఆధ్యాత్మిక ప్రదేశాలు, వసతి సమాచారాన్ని తెలుసుకునేందుకు యూపీ సర్కార్‌ దివ్య అయోధ్య యాప్‌ను ఏర్పాటు చేసింది. రాముడి దర్శనానికి వచ్చే భక్తులకు మోతీచూర్ లడ్డూ, శ్రీరాముని పురిటిగడ్డ మట్టిని మహాప్రసాదంగా ఇవ్వనున్నారు. జనవరి 23వ తేదీ నుంచి భక్తులకు రామ్ లల్లా దర్శనభాగ్యం లభించనుంది. ఉత్తర్ప్రదేశ్ పర్యటకశాఖ అయోధ్యకు వచ్చే అతిధుల కోసం ప్రత్యేకంగా టెంట్ సిటీ ఏర్పాటు చేసింది. హైటెక్ సదుపాయాలున్న ఇందులోని కాటేజ్లను వీవీఐపీల బసకోసం కేటాయించనున్నారు. నిషాద్ రాజ్ అతిథి గృహ్ పేరిట ఈ టెంట్ సిటీని నిర్మించారు.
ఒకేసారి 500 మంది భోజనం చేసేలా!
భోజనాల కోసం సీతారసోయి, శబరి రసోయి పేరిట రెండు డైనింగ్ హాళ్లు నిర్మించారు. ఇందులో ఒకేసారి 500 మంది వీఐపీలు భోజనం చేయవచ్చు. పర్యటకులు సరయూ నదిలో విహరించేందుకు సౌర శక్తి పడవలు ఏర్పాటు చేశారు. అయోధ్య నగరమంతా శాస్త్రీయ సంగీతం వినిపించేందుకు దేశంలోని వివిధ ప్రాంతాలకు చెందిన సంగీత విధ్వాంసుల్ని ఎంపిక చేశారు. అయోధ్య రామాలయ ప్రతిష్ఠ కోసం 50 దేశాల నుంచి 53 మంది ప్రత్యేక అతిధులు విచ్చేస్తున్నారు. అలాగే వివిధ సాంస్కృతిక కార్యక్రమాల వీక్షణ కోసం 8వేల మంది కూర్చునే భారీ ఆడిటోరియంను అయోధ్య నగరిలో ఏర్పాటు చేశారు.
స్పెషల్ అట్రాక్షన్గా 360 డిగ్రీల థియేటర్
Arrangements In Ayodhya : రామమందిరంతోపాటు అనేక ప్రత్యేకతలు రామమందిర ప్రాంగణంలో భక్తుల్ని ఆకర్షిస్తున్నాయి. 360 డిగ్రీల థియేటర్ ఇక్కడ ప్రత్యేకత సంతరించుకుంది. ఇక్కడ ఒకేసారి వేలాదిమంది భక్తులు కూర్చొని శ్రీరాముడికి సంబంధించిన అనేక గాథలు వీక్షించేలా ఏర్పాట్లు చేస్తున్నారు. ఆ పక్కనే గ్యాలరీ-1 నిర్మించారు. ఇందులో రామాయణానికి సంబంధించిన విశేషాలు ఉంటాయి. మరోపక్క మ్యూజియం నిర్మితమవుతోంది. దీనికి సమీపంలోనే రెండో గ్యాలరీ ఉండనుంది. శ్రీరాముడికి సంబంధించి దేశ విదేశాల నుంచి సేకరించిన జ్ఞాపికల్ని ఇక్కడ ఏర్పాటు చేయనున్నారు. రామమందిర నిర్మాణాన్ని ఎల్‌ అండ్ టీ సంస్థ భాగస్వామ్యమైంది.
భారీ యాగశాల నిర్మాణం!
వైదిక సంప్రదాయాలకు అనుగుణంగా అయోధ్య రాముడి ఆలయ ఆవరణలో భారీ యాగశాలను నిర్మించనున్నారు. ఈ ఆలయానికి అనుసంధానంగా రీసెర్చ్ అండ్ డెవలప్‌మెంట్‌ సెంటర్ సైతం ఏర్పాటు చేయనున్నారు. అనేక ఆధ్యాత్మిక పరిశోధనలకు ఇది కేంద్రంగా నిలవనుంది. అలాగే భారీ గ్రంథాలయం ఏర్పాటు చేస్తారు. ఆలయ ప్రాంగణంలో సుందరమైన నీటి కొలను నిర్మిస్తారు. భారీస్థాయిలో నిర్మించనున్న కొలనులో ప్రత్యేకంగా సౌండ్ అండ్ లైటింగ్ షో ఏర్పాటు కానుంది. దేశ విదేశాల నుంచి విచ్చేసే భక్తుల ఆకలి తీర్చేలా అన్నదాన సత్రం ఏర్పాటు చేయనున్నారు.
ప్రదర్శనకు త్రేతాయుగ కళాకృతులు
అయోధ్య ఆలయ ప్రాంగణంలో పురాతన వస్తు ప్రదర్శనశాల ప్రత్యేకంగా ఆకట్టుకోనుంది. మందిర విశేషాలతో సహా తవ్వకాల్లో బయటపడిన విగ్రహాల్ని, వస్తువుల్ని, త్రేతాయుగం నాటి అనేక కళాకృతుల్ని, నమూనాల్ని ఇక్కడ ప్రదర్శించనున్నారు. రామాలయాన్ని మూడో అంతస్తుకు విస్తరించాలని నిర్ణయించడం వల్ల ఆలయం ఎత్తు 33 అడుగులకు పెరిగింది. 5 ప్రవేశద్వారాలు, 5 గుమ్మటాలు ప్రత్యేకంగా నిర్మింపజేశారు. 5 గుమ్మటాలు ఉండే ఆలయం ప్రపంచంలో ఇదొక్కటే కావడం విశేషం. మండపాల్లో 5వేల నుంచి 8వేల మంది భక్తులు వేచి ఉండేలా కాంప్లెక్స్ లు సైతం రూపుదిద్దుకోనున్నాయి. భవిష్యత్తులో భక్తులరద్దీ పెరిగినా, తట్టుకునేలా, వారికి ఎలాంటి అసౌకర్యం కలగకుండా అనేక ఏర్పాట్లకు ముందస్తుగానే ఇక్కడ ప్రణాళికలు సిద్ధం చేశారు.
సాధువుల కోసం ప్రత్యేక అన్నదాన సత్రం
అయోధ్యలో ఎవరూ ఆకలితో ఉండరాదని శ్రీరాముని ఆజ్ఞ! ఆ ఉద్దేశంతో, సాధుసంతుల కోసం ప్రత్యేకంగా అన్నదాన సత్రం ఏర్పాటు చేశారు. దాతల సహాయంతో అన్నదాన నిధిని ఏర్పాటు చేసి, ప్రతినిత్యం ఇక్కడ సాధువులకు అన్న వితరణ చేస్తారు. అలాగే ఇక్కడున్న గోశాలలో 200లకు పైగా గోవులున్నాయి. ఇక్కడి ఆవు పాలను ఆశ్రమాల్లో, అన్నదానాల్లో వినియోగిస్తారు.
సీతాదేవి స్వస్థలంలో ప్రాణప్రతిష్ఠ సందడి- జనక్పుర్లో అంగరంగ వైభవంగా వేడుకలు
