பாத்திரத்தில் சிக்கிய குழந்தை.. 20 நிமிடம் போராடிய தீயணைப்பு வீரர்கள்.. இறுதியில் நடந்தது என்ன? - Baby rescued from Cook ware

சென்னை: சென்னையில் உள்ள கொடுங்கையூர் எருக்கஞ்சேரி பகுதியைச் சேர்ந்தவர் சதீஷ் குமார். இவருக்கு 3 வயதில் ஆண் குழந்தை உள்ளார். இந்த நிலையில், சதீஷ் குமாரின் 3 வயது குழந்தை வீட்டில் விளையாடிக் கொண்டிருந்து உள்ளது. அப்போது, எதிர்பாராத விதமாக வீட்டில் உள்ள பாத்திரத்தில் குழந்தை மாட்டிக் கொண்டு உள்ளது.

இவ்வாறு குழந்தை விளையாடும் போது பாத்திரத்தில் மாட்டிக் கொண்டதால், நீண்ட நேரமாக குழந்தையை வெளியே எடுக்க பெற்றோர் முயற்சித்தும் குழந்தையை எடுக்க முடியவில்லை. எனவே, இதனையடுத்து முல்லை நகர் தீயணைப்புத் துறையினருக்கு பெற்றோர் தகவல் தெரிவித்து உள்ளனர். 

இதன் பேரில், சம்பவ இடத்திற்கு வந்த தீயணைப்பு வீரர்கள், சுமார் 20 நிமிடம் போராடி பாத்திரத்தை நேர்த்தியாக திட்டமிட்டு வெட்டி குழந்தையை பத்திரமாக மீட்டனர். அப்போது, குழந்தை எந்த வித சிறு காயங்களும் இன்றி பாதுகாப்பாக மீட்கப்பட்டார். இதனையடுத்து, பத்திரமாக மீட்டுக் கொடுத்த தீயணைப்பு வீரர்களுக்கு குழந்தையின் பெற்றோர் கண்ணீர் மல்க நன்றி தெரிவித்தனர்.