அன்னூர் அருகே பேருந்து மீது இருசக்கர வாகனம் மோதி விபத்து - அதிர்ஷ்டவசமாக உயிர் தப்பிய தம்பதி!

கோயம்புத்தூர்: கோவை மாவட்டம், அன்னூரை சாணாம் பாளையம் பிரிவைச் சேர்ந்தவர்கள் எட்வின்- ஸ்டெபி ரோஜா தம்பதியினர். எட்வின் தனியார் நிறுவன ஊழியராகப் பணிபுரிந்து வருகிறார். இந்த நிலையில், இன்று காலை வீட்டிலிருந்து கோவை செல்வதற்காகத் தனது இரு சக்கர வாகனத்தில் மனைவியுடன் சென்றுள்ளார். 

அப்போது, அன்னூர் - சத்தி சாலை சிஎஸ்ஐ சர்ச் அருகே சென்று கொண்டிருக்கும் போது, சாலையைக் கடக்க முயன்ற மற்றொரு வாகனத்தின் மீது மோதியதில் தடுமாறி எதிரே வந்த அரசுப் பேருந்து மீது மோதி விபத்துக்குள்ளானது. இதில், தம்பதி இருவரும் படுகாயம் அடைந்தனர். 

சற்று சுதாரித்துக் கொண்ட பேருந்து ஓட்டுநர் பேருந்தை உடனடியாக நிறுத்தியதால் முன்பக்கச் சக்கரத்தின் கீழ் மாட்டிக்கொண்ட மனைவி உயிர் தப்பினார். எனினும், எட்வினின் கை பேருந்தின் சக்கரத்தில் சிக்கியதில் முழுவதுமாக சேதமடைந்தது. 

இதனைத் தொடர்ந்து அருகில் இருந்தவர்கள் இருவரையும் மீட்டு அன்னூர் அரசு மருத்துவமனைக்கு அனுப்பி வைத்தனர். அங்கு அவர்களுக்கு முதலுதவி அளிக்கப்பட்டு மேல் சிகிச்சைக்காக கோவில்பாளையம் தனியார் மருத்துவமனைக்கு அனுப்பி வைக்கப்பட்டனர்.