ଖୋର୍ଦ୍ଧାରେ ପଶିଲା ବନ୍ୟାଜଳ, ହିରିମୂଳ ଗାଁ ବାହ୍ୟ ଜଗତରୁ ବିଚ୍ଛିନ୍ନ

ଖୋର୍ଦ୍ଧା: ଖୋର୍ଦ୍ଧାରେ ପଶିଲା ବନ୍ୟାଜଳ । ରାସ୍ତା ଉପରେ ୪ ଫୁଟର ବନ୍ୟାଜଳ ପ୍ରବାହିତ ହେବା ଫଳରେ ହିରିମୂଳ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି । ଖୋର୍ଦ୍ଧା ଜିଲ୍ଲା ଓରବରସିଂ ପଞ୍ଚାୟତ ଡିହଖଳା ହିରିମୂଳ ରାସ୍ତା ଉପରେ ବନ୍ୟାଜଳ ପ୍ରବାହିତ ହେବାରୁ ଯାତାୟତ ଠପ ହୋଇଯାଇଛି । ଆଜି ସକାଳୁ ସ୍ଥିତି ଠିକ ଥିବାବେଳେ ହଠାତ ଅପରାହ୍ନରୁ ଜଳସ୍ତର ବୃଦ୍ଧି ପାଉଥିବା କହିଛନ୍ତି ଗ୍ରାମବାସୀ । ବନ୍ୟାଜଳ ପ୍ରବାହିତ ହେବା ଫଳରେ ଶହ ଶହ ହେକ୍ଟର ଚାଷ ଜମି ଜଳମଗ୍ନ ହୋଇଛି । ସେହିପରି ଜିଲ୍ଲା ପ୍ରଶାସନ ଓରବରସିଂ ପଞ୍ଚାୟତର ଜନପ୍ରତିନିଧିଙ୍କ ସହ ଆଲୋଚନା କରି ପ୍ରଭାବିତଙ୍କ ପାଇଁ ଶୁଖିଲା ଖାଦ୍ୟର ବ୍ୟବସ୍ଥା କରିଥିବା ଜଣାପଡ଼ିଛି । ସେହିପରି ପାଣି ବଢିଲେ ସେମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବା ସହ ରନ୍ଧା ଖାଦ୍ୟ ଯୋଗାଇ ଦିଆଯିବ ବୋଲି କହିଛନ୍ତି ସ୍ଥାନୀୟ ଜନପ୍ରତିନିଧି । ଲୋକଙ୍କ ଯାତାୟତ ପାଇଁ ବୋଟ୍‌ ଯୋଗାଇ ଦିଆଯାଇଛି । ସେହିପରି ବନ୍ୟାରେ ବିଶେଷଭାବେ ଗୃହପାଳିତ ପଶୁ ପ୍ରଭାବିତ ହେବାକୁ ଥିବାବେଳେ ସେମାନଙ୍କ ପାଇଁ ଗୋଖାଦ୍ୟର ବ୍ୟବସ୍ଥା ମଧ୍ୟ କରାଯାଇଛି ।

ଇଟିଭି ଭାରତ ଖୋର୍ଦ୍ଧା