ଉତ୍ତରକାଶୀ ଟନେଲ ଟ୍ରାଜେଡି; ଭାଇରାଲ ହେଲା ଟନେଲ ଭିତରର ଭିଡିଓ

ରାଇରଙ୍ଗପୁର: ଉତ୍ତରାଖଣ୍ଡ ରାଜ୍ୟର ଉତ୍ତରକାଶୀ ସ୍ଥିତ ନିର୍ମାଣଧିନ ଟନେଲ ଭୁଶୁଡ଼ିବା ଘଟଣା ଏବେ ବି ମନରୁ ଲିଭି ନଥିବା ବେଳେ ସେହି ଟନେଲ ଭିତରର ଦୃଶ୍ୟ ଏବେ ଭାଇରାଲ ହେବାରେ ଲାଗିଛି । ଭାଇରାଲ ଭିଡିଓରେ ଟନେଲ ଭିତରର ଏହି ଦୃଶ୍ୟ ଦେଖିଲା ବେଳକୁ ଲୋମଟାଙ୍କୁରି ଉଠୁଛି । ଟନେଲ ଭୁଶୁଡ଼ି ଯିବାରୁ ଦୀର୍ଘ ୧୭ ଦିନ ଧରି ସେଠାରେ କାର୍ଯ୍ୟ କରୁଥିବା ୪୧ ଜଣ ଶ୍ରମିକ ତା' ଭିତରେ ଫସି ରହିଥିଲେ । ଅନ୍ଧାରୀ ଟନେଲରୁ ବାହାରି ପୁଣି ସୂର୍ଯ୍ୟାଲୋକ ଦେଖିପାରିବେ ନା ନାହିଁ ସେହି ଭୟ ଓ ଆଶଙ୍କା ମଧ୍ୟରେ ୧୭ ଦିନ କଟିଯାଇଥିଲା । ଜୀବନ ମରଣର ଏହି ଦୀର୍ଘ ଦିନର ସଂଘର୍ଷ ପରେ ରେସ୍କ୍ୟୁ ଟିମଙ୍କ ଆପ୍ରାଣ ଉଦ୍ୟମ ଯୋଗୁଁ ସମସ୍ତେ ସୁରକ୍ଷିତ ଉଦ୍ଧାର ହୋଇ ନିଜ ନିଜ ଘରକୁ ଫେରିଥିଲେ । ତେବେ ଶ୍ରମିକମାନେ କେମିତି ସେହି ଦୁର୍ଘଟଣାଗ୍ରସ୍ତ ଟନେଲ ଭିତରେ ଦିନ କାଟୁଥିଲ, କ'ଣ ଖାଉଥିଲେ, କେମିତି ଖାଦ୍ୟ ପଠାଯାଉଥିଲା, ତାହାର ଏକ ଭିଡିଓ ଭାଇରାଲ ହୋଇଛି । ସେହି ଫସି ରହିଥିବା ଶ୍ରମିକମାନଙ୍କ ମଧ୍ୟରୁ କେହି ଜଣେ ଟନେଲ ଭିତରର ଦୃଶ୍ୟ ମୋବାଇଲରେ କଏଦ୍ କରିଥିଲେ ।  

ଇଟିଭି ଭାରତ, ରାଇରଙ୍ଗପୁର