ପଥ ଉତ୍ସବ, ଯୁବ ଭୋଟରଙ୍କୁ ଆକୃଷ୍ଟ କରିବା ପାଇଁ ପ୍ରୟାସ

ବୌଦ୍ଧ: ଗଣତନ୍ତ୍ରକୁ ସୁଦୃଢ ତଥା ଯୁବ ଭୋଟରଙ୍କୁ ଆକର୍ଷିତ ପାଇଁ ଜିଲ୍ଲା ପ୍ରଶାସନ ପକ୍ଷରୁ ଆୟୋଜିତ ହେଲା ପଥ ଉତ୍ସବ। ନୃତ୍ୟ ସଙ୍ଗୀତ, ଚିତ୍ରକଳା, ପଦଯାତ୍ରା ଭଳି ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ବୌଦ୍ଧ ଜିଲ୍ଲା ସଦରମହକୁମା ଠାରେ ପଥ ଉତ୍ସବର ଆୟୋଜନ କରାଯାଇଥିଲା। ଏହି କାର୍ଯ୍ୟକ୍ରମର ଆୟୋଜନ କରିଥିଲେ ବୌଦ୍ଧ ଜିଲ୍ଲା ପ୍ରଶାସନ ଓ ନିର୍ବାଚନ ବିଭାଗ। ଭାରତୀୟ ଗଣତନ୍ତ୍ରର ପ୍ରମୁଖ ମାଧ୍ୟମ ମତଦାନ ଓ ନିର୍ବାଚନ ହୋଇଥିବା ବେଳେ ସମସ୍ତ ବର୍ଗର ନାଗରିକମାନଙ୍କୁ ମତଦାନ ପ୍ରକ୍ରିୟାରେ ସକ୍ରିୟ ଅଂଶ ଗ୍ରହଣ ଏକାନ୍ତ ଆବଶ୍ୟକ ବୋଲି ଅବଦତ କରାଯାଇଥିଲା। ଏହି ଅବସରରେ ବିଭିନ୍ନ ବର୍ଗର ନାଗରିକ ତଥା ଛାତ୍ରଛାତ୍ରୀଙ୍କୁ ନେଇ ଏକ ପଦଯାତ୍ରାର ଆୟୋଜନ କରାଯାଇଥିବା ବେଳେ ଏଥିରେ ଜିଲ୍ଲାପାଳ ନୃସିଂହ ଚରଣ ସ୍ବାଇଁ ଓ ଏସପି ରାଜ ପ୍ରସାଦ ସାମିଲ ହୋଇ ବୌଦ୍ଧ ସହର ପରିକ୍ରମା କରିଥିଲେ। ପଥ ଉତ୍ସବରେ ଚିତ୍ତାକର୍ଷକ ରଙ୍ଗୋଲୀ ସହିତ ପାରମ୍ପରିକ ନୃତ୍ୟ ସଙ୍ଗୀତ ପରିବେଷଣ କରାଯାଇଥିଲା । ଏହି ଅବସରରେ ଜିଲ୍ଲାର କିନ୍ନର ତଥା ଭିନ୍ନକ୍ଷମ ନାଗରିକ ତଥା ଭୋଟରଙ୍କୁ ଜିଲ୍ଲା ପ୍ରଶାସନ ପକ୍ଷରୁ ସ୍ବତନ୍ତ୍ର ଭାବରେ ସମ୍ମାନିତ କରାଯାଇଥିଲା। ନୂତନ ଭୋଟର ତାଲିକାରେ ସ୍ଥାନ ପାଇଥିବା ଯୁବ ଭୋଟରମାନେ ପଥ ଉତ୍ସବକୁ ନେଇ ବେଶ ଆନନ୍ଦ ପ୍ରକାଶ କରିଛନ୍ତି ।

ଇଟିଭି ଭାରତ, ବୌଦ୍ଧ