କୋଟା(ରାଜସ୍ଥାନ): ଯୁଗ୍ମ ପ୍ରବେଶିକା ପରୀକ୍ଷା ଜେଇଇ ମେନ ୨୦୨୫ରେ କମାଲ କଲେ ଓଡ଼ିଆ ପୁଅ । ଶତ ପ୍ରତିଶତ ସ୍କୋର (Perfect JEE main Score) ରଖି ରାଜ୍ୟକୁ ଗୌରବାନିତ୍ୱ କରିଛନ୍ତି ରାଜଧାନୀ ଭୁବନେଶ୍ୱରର ଓମ ପ୍ରକାଶ ବେହେରା । ୩୦୦ରୁ ୩୦୦ ମାର୍କ ଆଣି ଫରଫେକ୍ଟ ସ୍କୋର ରଖି ଟପ୍ପର ହୋଇଛନ୍ତି ଓମ । ସଫଳତା ପଛରେ ମାଆ ସ୍ମିତାରାଣୀଙ୍କ ତ୍ୟାଗ ରହିଥିବା କହିଛନ୍ତି ଓମ ।
ଜେଇ ମେନ ଟପ୍ପର ଓଡ଼ିଆ ପୁଅ ଓମ୍:
ପ୍ରକାଶ ପାଇଛି ଜେଇଇ ମେନ ୨୦୨୫ ରେଜଲ୍ଟ । ଏଥିରେ ଭୁବନେଶ୍ୱରର କମଳାକାନ୍ତ ବେହେରା ଓ ସ୍ମିତା ରାଣୀଙ୍କ ପୁଅ ଓମ ପ୍ରକାଶ ବେହେରା ଟପ୍ପର ହୋଇଛନ୍ତି । ସେ ଶତ ପ୍ରତିଶତ ଅର୍ଥାତ୍ ୩୦୦ରୁ ୩୦୦ ମାର୍କ ହାସଲ କରିଛନ୍ତି । ସେ ୩ ବର୍ଷ ହେଲା ରାଜସ୍ଥାନ କୋଟାରେ ରହି କୋଚିଂ ନେଉଛନ୍ତି । ଜେଇଇ ମେନ ସଫଳତା ମିଳିଯାଇଥିବା ବେଳେ ଜେଇଇ ଆଡଭାନ୍ସ କ୍ରାକ କରି ଆଇଆଇଟି(IIT) ବମ୍ବେରେ କମ୍ପ୍ୟୁଟର ସାଇନ୍ସ ବ୍ରାଞ୍ଚରୁ ବି-ଟେକ୍ କରିବା ପାଇଁ ଲକ୍ଷ୍ୟ ରଖିଛନ୍ତି ସେ ।
କୋଟାରେ କୋଚିଂ ନେଉଛନ୍ତି ଓମ ପ୍ରକାଶ:
୩ ବର୍ଷ ହେଲା ରାଜସ୍ଥାନ କୋଟାରେ ରହି କୋଚିଂ ନେଉଛନ୍ତି ଓମ ପ୍ରକାଶ ବେହେରା । ଓମ ପ୍ରକାଶ କହିଛନ୍ତି, "କୋଟାରେ କୋଚିଂ ବିଷୟରେ ଜଣେ ସମ୍ପକୀୟ ଭାଇଙ୍କଠାରୁ ଜାଣିବାକୁ ପାଇଥିଲି । ଯିଏ କୋଟାରେ ରହି ପାଠ ପଢୁଥିଲେ । ଦଶମ ପାସ କରିବା ପରେ ଜେଇଇ ମେନ ପାଇଁ ପାଠ ପଢୁଥିଲି । କୋଟାରେ ପାଠ ପଢିବା ପାଇଁ ଅନେକ ପ୍ରକାର ସୁବିଧା ରହିଛି । ଶିକ୍ଷକମାନେ ସମସ୍ତ ପ୍ରକାର ସାହାଯ୍ୟ କରିଥାନ୍ତି । କିଛି ସମସ୍ୟା ଥିଲେ ତାକୁ ତୁରନ୍ତ ସମାଧାନ କରିଥାନ୍ତି ।"
ବମ୍ବେରେ କମ୍ପ୍ୟୁଟର ସାଇନ୍ସ ବ୍ରାଞ୍ଚରୁ ବିଟେକ କରିବା ଲକ୍ଷ୍ୟ:
ଓମ ପ୍ରକାଶ ଆଉ ମଧ୍ୟ କହିଛନ୍ତି ଯେ, ଯେତେବେଳେ ସେ ଦଶମ ପାସ କରିବା ପରେ କୋଟା ଆସିଥିଲେ, ସେତେବେଳେ ସେ ଭାବି ନଥିଲେ ଯେ ସେ ଶତପ୍ରତିଶତ ସ୍କୋର କରିବେ । ସେହି ସମୟରେ କେବଳ ପାଠ ପଢିବା ପାଇଁ ସେ କୋଟା ଆସିଥିଲେ । କେବଳ ଲକ୍ଷ୍ୟ ଥିଲା ଜେଇଇ ମେନ ଓ ଆଡଭାନ୍ସ କ୍ରାକ୍ କରିବା । ଏବେ ଜେଇଇ ମେନ ସଫଳତା ମିଳିଯାଇଥିବା ବେଳେ ଆଡଭାନ୍ସକୁ କ୍ରାକ କରି ଆଇଆଇଟି ବମ୍ବେରେ କମ୍ପ୍ୟୁଟର ସାଇନ୍ସ ବ୍ରାଞ୍ଚରୁ ବିଟେକ କରିବା ପାଇଁ ଲକ୍ଷ୍ୟ ରହିଛି ।
ସଫଳତା ପଛରେ ରହିଛି ମାଆ-ବାପାଙ୍କ ତ୍ୟାଗ:
ଓମ ପ୍ରକାଶଙ୍କ ଏହି ସଫଳତା ପଛରେ ତାଙ୍କ ମାଆ ଓ ବାପାଙ୍କ ତ୍ୟାଗ ଅନେକ । ପୁଅର ଭବିଷ୍ୟତ ପାଇଁ ନିଜ ଅଧ୍ୟାପନା ଛାଡ଼ି ଦେଇଥିଲେ ମାଆ ଓ ବାପା । ଓଡ଼ିଶା ପ୍ରାଶାସନିକ ସେବାରେ କାର୍ଯ୍ୟ କରୁଥିବା ବେଳେ ପୁଅ ପାଇଁ ଦିଲ୍ଲୀ ଟ୍ରାନ୍ସଫର କରି ସେଠାରେ ଏକୁଟିଆ ରହିଥିଲେ । ଓମ ପ୍ରକାଶଙ୍କ ମାଆ ସ୍ମିତାରାଣୀ ଶିକ୍ଷା ବିଷୟରେ ଅଧ୍ୟାପିକା ଭାବେ କାର୍ଯ୍ୟ କରୁଥିଲେ । କିନ୍ତୁ ରାଜସ୍ଥାନ କୋଟାରେ ନିଜ ପୁଅ ପାଖରେ ରହିବା ପାଇଁ ଓ ତାଙ୍କୁ ପାଠପଢାରେ ସାହାଯ୍ୟ କରିବା ପାଇଁ ସେ ଚାକିରି ଛାଡି ଦେଇଥିଲେ ଏବଂ ଭୁବନେଶ୍ୱର ଛାଡି କୋଟାରେ ରହୁଥିଲେ । ସେହିପରି ବାପା କମଳାକାନ୍ତ ବେହେରା ମଧ୍ୟ ଓଡ଼ିଶା ପ୍ରଶାସନିକ ସେବାରେ ନିୟୋଜିତ ଥିବା ବେଳେ ସେ ମଧ୍ୟ ପୁଅ ପାଇଁ ଓଡ଼ିଶାରୁ ଟ୍ରାନ୍ସଫର କରି ଦିଲ୍ଲୀରେ ବର୍ତ୍ତମାନ କାର୍ଯ୍ୟ କରୁଛନ୍ତି । ଅନେକ ବର୍ଷ ହେଲା ତାଙ୍କ ବାପା ଦିଲ୍ଲୀରେ ଅଛନ୍ତି ।
ଓମଙ୍କ ପାଖରେ ନଥିଲା ମୋବାଇଲ :
ପ୍ରତ୍ୟେକ ଦିନ ୮ରୁ ୯ ଘଣ୍ଟା ପାଠ ପଢୁଥିବା କହିଛନ୍ତି ଓମ ପ୍ରକାଶ । ଦଶମ ପରୀକ୍ଷାରେ ସେ ୯୨ ପ୍ରତିଶତ ମାର୍କ ରଖିଥିବା ବେଳେ ଦ୍ୱାଦଶ ବୋର୍ଡ ପରୀକ୍ଷା ଚଳିତ ବର୍ଷ ଦେବାକୁ ଯାଉଛନ୍ତି । ଅବସର ସମୟରେ ସେ ବ୍ୟାଡମିଣ୍ଟନ ଖେଳିବା ଏବଂ ଇଂରାଜୀ ଉପନ୍ୟାସ ପଢ଼ିବାକୁ ପସନ୍ଦ କରନ୍ତି । ପାଠପଢ଼ା ମଝିରେ ବ୍ରେକ ନେବାକୁ ଇଚ୍ଛା ହେଲେ ସାଙ୍ଗସାଥିଙ୍କ ସହ ବସି କଥା ହୁଅନ୍ତି । ସେ ବାହାରକୁ ବୁଲିବାକୁ ଯାଉନଥିଲେ କିମ୍ବା ନିଜ ପାଖରେ କେବେ ମୋବାଇଲ ରଖୁନଥିଲେ । ସକାଳ ୮ଟାରେ ଉଠି ରାତି ୧୨ଟାରେ ଶୋଇ ଯାଉଥିଲେ ଓମ । ଏହି ସମୟ ମଧ୍ୟରେ କେବଳ ପାଠ ପଢାରେ ଅଧିକ ସମୟ କାଟୁଥିଲେ ।
ଏହାମଧ୍ୟ ପଢନ୍ତୁ... JEE-NEET କୋଚିଂ ପାଇଁ ପ୍ରଥମ ଚଏସ 'କୋଟା', ମାସକୁ ୫ ହଜାର କମ୍ ଖର୍ଚ୍ଚ - Kota Coaching OAS ଟପ୍ପର ଭଦ୍ରକ ଝିଅ ଶ୍ଵେତାଶ୍ରୀ ମହାପାତ୍ର, କେମିତି ଥିଲା ଯାତ୍ରା ଆସନ୍ତୁ ଶୁଣିବା ... |
ଆତ୍ମ-ବିଶ୍ଳେଷଣ ଜରୁରୀ:
ଓମ ପ୍ରକାଶଙ୍କ କହିବା କଥା, "କୋଟାର ଶିକ୍ଷା ଓ ପାଠ୍ୟ ସାମଗ୍ରୀ ବହୁତ ଭଲ । ଅଧ୍ୟାପକମାନଙ୍କୁ ଏହିସବୁ ପରୀକ୍ଷା ବିଷୟରେ ବହୁତ ଭଲ ଭାବରେ ଜଣା । ଜେଇଇ ମେନ ପାଇଁ ଏନସିଇଆରଟି ସିଲାବସ ଉପରେ ଅଧିକ ଫୋକସ କରିଥିଲି । ସାପ୍ତାହିକ ପରୀକ୍ଷାରେ ମାର୍କ କମ ବେଶୀ ହୋଇଥାଏ । କିନ୍ତୁ ମୁଁ ସବୁବେଳେ ମୋ ନିଜର ସର୍ବୋତ୍ତମ ଦେବାକୁ ଚେଷ୍ଟା କରେ । ପ୍ରତି ପରୀକ୍ଷା ପରେ, ମୁଁ ଆତ୍ମ-ବିଶ୍ଳେଷଣ କରୁଥିଲି ଏବଂ ଦେଖୁଥିଲି କେଉଁ ଭୁଲ ଯୋଗୁଁ କମ ମାର୍କ ମିଳିଛି । ପରବର୍ତ୍ତୀ ପରୀକ୍ଷାରେ ସେହି ଭୁଲଗୁଡିକର ଯେପରି ପୁନରାବୃତ୍ତି ନହୁଏ ସେନେଇ ଚେଷ୍ଟା କରୁଥିଲି । ମୋ ପାଇଁ ସଫଳତାର ମନ୍ତ୍ର ହେଉଛି, ଯାହା ବିତି ଯାଇଛି ତାହା ଉପରେ ଧ୍ୟାନ ଦେବା ପରିବର୍ତ୍ତେ, ଆଗକୁ କଣ ଘଟୁଛି ତାହା ଉପରେ ଧ୍ୟାନ ଦେବା ।"
ବ୍ୟୁରୋ ରିପୋର୍ଟ, ଇଟିଭି ଭାରତ
