ରଥଖଳା ବୁଲିଲେ ୨ କେନ୍ଦ୍ରମନ୍ତ୍ରୀ

ପୁରୀ: ଆଉ କିଛି ଦିନ ପରେ ବିଶ୍ବପ୍ରସିଦ୍ଧ ରଥଯାତ୍ରା ଆୟୋଜିତ ହେବାକୁ ଥିବା ବେଳେ ରଥଖଳାରେ ଜୋରସୋରରେ କାମ ଆଗେଇ ଚାଲିଛି । ତେବେ ଆଜି ରଥଖଳା ପରିଦର୍ଶନ କଲେ ୨ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଅଶ୍ବିନୀ ବୈଷ୍ଣବ । ଆଜି ବନ୍ଦେ ଭାରତ ଏକ୍ସପ୍ରେସ ଉଦଘାଟନ ପୂର୍ବରୁ ୨ କେନ୍ଦ୍ରମନ୍ତ୍ରୀ ମହାପ୍ରଭୁଙ୍କ ଆଶୀର୍ବାଦ ଲାଗି ଶ୍ରୀମନ୍ଦିର ଗସ୍ତ କରିଥିଲେ । ଏହି ସମୟରେ ସେମାନେ ରଥଖଳା ବୁଲି ଦେଖିବା ସହିତ ମହାରଣା ସେବକମାନଙ୍କ ସହିତ ଆଲୋଚନା କରିଛନ୍ତି । ୨ କେନ୍ଦ୍ରମନ୍ତ୍ରୀଙ୍କ ସହିତ ବିଜେପି ପ୍ରବକ୍ତା ସମ୍ବିତ ପାତ୍ର ମଧ୍ୟ ସକାଳୁ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିଛନ୍ତି । ସେପଟେ ରଥଖଳା ବୁଲି ଦେଖିବା ସମୟରେ ନିର୍ମାଣ ହେଉଥିବା ରଥଚକକୁ ଉଭୟ କେନ୍ଦ୍ରମନ୍ତ୍ରୀ ମୁଣ୍ଡିଆ ମାରିଥିବା ଦେଖିବାକୁ ମିଳିଛି । ଏହି ସମୟରେ ଗଣମାଧ୍ୟମକୁ ପ୍ରତିକ୍ରିୟା ଦେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ ଯେ ପୁରୀକୁ ବିଶ୍ଵ ମାନଚିତ୍ରରେ ଏକ ନମ୍ବର ସ୍ଥାନରେ ରଖିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସବୁବେଳେ ପ୍ରଚେଷ୍ଟା ଜାରି ରଖିଛନ୍ତି । ପୂର୍ବ ଭାରତରୁ ଦେଶର ବିକାଶ କାର୍ଯ୍ୟ ଜାରି ରହିଛି । 

ଇଟିଭି ଭାରତ, ପୁରୀ